ಚಳಿಗಾಲ: ಸ್ಟ್ರಾಬೆರ್ರಿಯನ್ನು ಈ 5 ರೀತಿ ಬಳಸಿ ತ್ವಚೆ ಕಾಂತಿ ಹೆಚ್ಚಿಸಬಹುದು

ಚಳಿಗಾಲದಲ್ಲಿ ಸಿಗುವ ಸೀಸನ್‌ ಫುಡ್‌ಗಳಲ್ಲೊಂದು ಸ್ಟ್ರಾಬೆರ್ರಿ. ಚಳಿಗಾಲದಲ್ಲಿ ಇದನ್ನು ತಿನ್ನುವುದರಿಂದ ಇದರಲ್ಲಿ ವಿಟಮಿನ್‌ ಸಿ ಹೇರಳವಾಗಿ ಇರುವುದರಿಂದ ಆರೋಗ್ಯಕ್ಕೆ ಒಳ್ಳೆಯದು, ಇನ್ನು ನಿಮ್ಮ ಮುಖದ ಅಂದ ಹೆಚ್ಚಿಸಲು ಕೂಡ ಬಳಸಬಹುದು. ಇದನ್ನು ಸ್ಕ್ರಬ್ಬರ್, ಫೇಸ್‌ ಮಾಸ್ಕ್‌ ಹೀಗೆ ಅನೇಕ ರೀತಿಯಲ್ಲಿ ಬಳಸಿ ನಿಮ್ಮ ಮುಖ ಅಂದ ಹೆಚ್ಚಿಸಬಹುದು.

ನಾವಿಲ್ಲಿ ಸ್ಟ್ರಾಬೆರ್ರಿ ಬಳಸಿ ಮುಖದ ಅಂದ ಹೆಚ್ಚಿಸುವ 5 ವಿಧಾನಗಳ ಬಗ್ಗೆ ಹೇಳಿದ್ದೇವೆ ನೋಡಿ:

1. ಸ್ಟ್ರಾಬೆರ್ರಿ ಮತ್ತು ಹಾಲಿನ ಕೆನೆ
ಇದನ್ನು ಚಳಿಗಾಲ, ಬೇಸಿಗೆ, ಮಳೆಗಾಲ ಹೀಗೆ ಯಾವುದೇ ಸಮಯದಲ್ಲಿ ಬಳಸಿ ಮುಖದ ಕಾಂತಿ ಹೆಚ್ಚಿಸಬಹುದು. ನಿಮ್ಮದು ಡ್ರೈ ಸ್ಕಿನ್ ಆಗಿದ್ದರೆ ಈ ವಿಧಾನ ನಿಮ್ಮ ತ್ವಚೆ ಸಮಸ್ಯೆ ದೂರ ಮಾಡುವಲ್ಲಿ ತುಂಬಾನೇ ಸಹಕಾರಿ. ಒಂದು ಬೌಲ್‌ಗೆ ಒಂದು ಸ್ಟ್ರಾಬೆರ್ರಿ ಹಾಕಿ ಮ್ಯಾಶ್ ಮಾಡಿ, ಅದಕ್ಕೆ ಹಾಲಿನ ಕೆನೆ ಸೇರಿಸಿ ಮಿಕ್ಸ್ ಮಾಡಿ ಮುಖಕ್ಕೆ ಹಚ್ಚಿ ಅರ್ಧ ಗಂಟೆ ಬಿಟ್ಟು ಹದ ಬಿಸಿ ನೀರಿನಿಂದ ಮುಖ ತೊಳೆಯಿರಿ. ಈ ರೀತಿ ಪ್ರತಿದಿನ ಮಾಡಿದರೆ 15-20 ದಿನದಲ್ಲಿ ಮುಖದ ಕಾಂತಿ ಹೆಚ್ಚುವುದು, ಡ್ರೈ ತ್ವಚೆ ಸಮಸ್ಯೆ ಇರಲ್ಲ.

2. ಸ್ಟ್ರಾಬೆರ್ರಿ ಫೇಸ್‌ ಮಾಸ್ಕ್‌
ಸ್ಟ್ರಾಬೆರ್ರಿಯನ್ನು ಕೈಯಿಂದಲೇ ಪೇಸ್ಟ್ ರೀತಿ ಮಾಡಿ ಅದಕ್ಕೆ 2 ಚಮಚ ಮೊಸರು, 1 ವಿಟಮಿನ್‌ ಇ ಕ್ಯಾಪ್ಸೂಲ್ ಹಾಕಿ ಮಿಕ್ಸ್ ಮಾಡಿ ಮುಖಕ್ಕೆ ಹಚ್ಚಿ 20 ನಿಮಿಷ ಬಿಟ್ಟು ಮುಖ ತೊಳೆಯಿರಿ. ಈ ರೀತಿ ವಾರದಲ್ಲಿ 2 ಬಾರಿ ಮಾಡಿ. ಎಲ್ಲಾ ಬಗೆಯ ತ್ವಚೆಯವರಿಗೆ ಇದು ಸೂಟ್ ಆಗುತ್ತೆ.

3. ಸ್ಟ್ರಾಬೆರ್ರಿ ಸ್ಕ್ರಬ್'
ಒಂದು ಸ್ಟ್ರಾಬೆರ್ರಿಯನ್ನು ಪೇಸ್ಟ್ ರೀತಿ ಮಾಡಿ ಅದಕ್ಕೆ ಸ್ವಲ್ಪ ಓಟ್ಸ್ ಸೇರಿಸಿ ಮಿಕ್ಸ್ ಮಾಡಿ ಸ್ಕ್ರಬ್‌ ಮಾಡಿದರೆ ಡೆಡ್‌ಸ್ಕಿನ್ ಹೋಗಿ ಮುಖದ ತ್ವಚೆ ಮೃದುವಾಗುವುದು, ಹೊಳಪು ಹೆಚ್ಚುವುದು.

4. ಸ್ಟ್ರಾಬೆರ್ರಿ ಮತ್ತು ಚಾಕೋಲೆಟ್ ಮಾಸ್ಕ್‌
ಸ್ಟ್ರಾಬೆರ್ರಿ ಹಾಗೂ ಡಾರ್ಕ್‌ಚಾಕೋಲೆಟ್‌ ಮಿಕ್ಸ್ ಮಾಡಿ ಆ ಪೇಸ್ಟ್‌ ಮುಖಕ್ಕೆ ಹಚ್ಚಿದರೆ ಮುಖದ ಕಾಂತಿ ಹೆಚ್ಚುವುದು. ಈ ಮಿಶ್ರಣ ಮುಖಕ್ಕೆ ಹಚ್ಚಿ 15 ನಿಮಿಷ ಬಿಟ್ಟು ಮುಖ ತೊಳೆಯಿರಿ. ಚಾಕೋಲೆಟ್ ಬದಲಿಗೆ ಕಾಫಿಪುಡಿ ಕೂಡ ಮಿಕ್ಸ್ ಮಾಡಬಹುದು.

5. ಸ್ಟ್ರಾಬೆರ್ರಿ ಹಾಗೂ ನಿಂಬೆರಸ
ಸನ್‌ಬರ್ನ್ ಆಗಿದ್ದರೆ ಹೋಗಲಾಡಿಸಲು ಈ ಮಾಸ್ಕ್‌ ಪರಿಣಾಮಕಾರಿ. ಸ್ಟ್ರಾಬೆರ್ರಿಗೆ ಸ್ವಲ್ಪ ನಿಂಬೆರಸ ಹಾಕಿ ಮಿಕ್ಸ್ ಮಾಡಿ ಮುಖವನ್ನು ಸ್ಕ್ರಬ್ ಮಾಡಿ ಮುಖದ ಹೊಳಪು ಹೆಚ್ಚುವುದು.