ಅಷ್ಟಕ್ಕೂ ದಿನಕ್ಕೆಷ್ಟು ಬಾರಿ ಮುಖ ತೊಳೆಯಬೇಕು?

ಬೆಳಿಗ್ಗೆ

ಬೆಳಿಗ್ಗೆ ನಿದ್ದೆಯಿಂದೆದ್ದಾಕ್ಷಣ ಮೊತ್ತ ಮೊದಲು ನಿಮ್ಮ ಮುಖವನ್ನು ಕೇವಲ ತಣ್ಣೀರಿನಿಂದ ತೊಳೆದುಕೊಂಡು ಹಲ್ಲುಗಳನ್ನೂ ಸ್ವಚ್ಛಗೊಳಿಸಿ. ಬಳಿಕವೇ ಮೊಡವೆ ನಿವಾರಕ ದ್ರಾವಣ ಅಥವಾ ಸೌಮ್ಯವಾದ ಮುಖಕ್ಕೆ ಉಪಯೋಗಿಸುವ ಸೋಪು ಅಥವಾ ಫೇಸ್ ವಾಶ್ ಮಾತ್ರವೇ ಬಳಸಿ. ಇದರಿಂದ ರಾತ್ರಿಯ ವೇಳೆ ಮುಖದ ಗ್ರಂಥಿಗಳಿಂದ ಸ್ರವಿಸಿದ್ದ ಕಲ್ಮಶಗಳು ನಿವಾರಣೆಯಾಗುತ್ತವೆ. ವಿಶೇಷವಾಗಿ ತೆರೆದಿರುವ ಸೂಕ್ಷ್ಮರಂಧ್ರಗಳು ಸ್ವಚ್ಛಗೊಂಡು ಇಡಿಯ ದಿನ ತಾಜಾತನ ಅನುಭವಿಸಲು ಸಾಧ್ಯವಾಗುತ್ತದೆ.

ಮಧ್ಯಾಹ್ನ

ಒಂದು ವೇಳೆ ನಿಮ್ಮ ಚರ್ಮ ಎಣ್ಣೆಚರ್ಮವಾಗಿದ್ದರೆ ಮದ್ಯಾಹ್ನ ಉಪಯೋಗಿಸಲು ಯಾವ ಸೋಪು ಅಥವಾ ದ್ರಾವಣ ಅಗತ್ಯ ಎಂದು ಚರ್ಮವೈದ್ಯರಿಂದ ಸಲಹೆ ಪಡೆದು ಖರೀದಿಸಿರುವ ಪ್ರಸಾದನವನ್ನು ಬಳಸಿ ಮುಖ ತೊಳೆದುಕೊಳ್ಳಿ. ಇದು ಎಣ್ಣೆಯ ಪಸೆಯ ಪ್ರಮಾಣ ಹೆಚ್ಚಿದ್ದರೆ ಮಾತ್ರ. ಇಲ್ಲದಿದ್ದರೆ ಬರೆಯ ತಣ್ಣೀರು ಮಾತ್ರ ಸಾಕು. ಇದರಿಂದ ಮುಖದ ಮೇಲಿದ್ದ ಎಣ್ಣೆಯ ಪಸೆ ನಿವಾರಣೆಯಾಗುತ್ತದೆ. ವಿಶೇಷವಾಗಿ ಮೂಗಿನ ಪಕ್ಕ ಮತ್ತು ಹಣೆಯ ಕೆಳಭಾಗದಲ್ಲಿ ಎಣ್ಣೆಯ ಪಸೆ ಹೆಚ್ಚಾಗಿದ್ದು ಇಲ್ಲಿ ಕೊಂಚ ಹೆಚ್ಚಾಗಿ ತೊಳೆದುಕೊಳ್ಳುವುದು ಅಗತ್ಯವಾಗಿದೆ. ಉಳಿದ ಬಗೆಯ ಚರ್ಮದವರು ಕೇವಲ ಕೊಂಚವೇ ಪ್ರೋಕ್ಷಳಿಸಿಕೊಂಡರೆ ಸಾಕು.

ಸಂಜೆ

ಸಂಜೆ ಕೆಲಸದಿಂದ ಮನೆಗೆ ಹಿಂದಿರುಗಿದ ಬಳಿಕ ಸ್ನಾನ ಮಾಡಿ ಮುಖವನ್ನು ಒದ್ದೆಯಾಗಿಸಿಕೊಳ್ಳಿ. ನಿಮ್ಮ ಚರ್ಮಕ್ಕೆ ಸೂಕ್ತವಾದ ಪ್ರಸಾದನ ಬಳಸಿ ಮುಖದ ಕೊಳೆಯನ್ನೆಲ್ಲಾ ತೊಳೆದುಕೊಳ್ಳಿ. ಬಳಿಕ ಮನೆಯಲ್ಲಿಯೇ ತಯಾರಿಸಿದ ಅಥವಾ ಸೂಕ್ತವಾದ ನೈಸರ್ಗಿಕ ಸಾಮಾಗ್ರಿಗಳಿರುವ ಮುಖಲೇಪ ಹಚ್ಚಿ ಕೊಂಚ ಹೊತ್ತು ಬಿಟ್ಟು ನಿವಾರಿಸಿಕೊಳ್ಳಿ. ಈ ಮೂಲಕ ದಿನವಿಡೀ ನಿಮ್ಮ ಮುಖ ತಾಜಾತನವನ್ನು ಉಳಿಸಿಕೊಳ್ಳುತ್ತದೆ.

ಕೆಲವು ಅಗತ್ಯ ಸಲಹೆಗಳು

*ಇನ್ನೂ ಚೆನ್ನಾಗಿ ಕಾಣುವಂತಹ ಚರ್ಮಕ್ಕಾಗಿ: ಮುಖವನ್ನು ತೊಳೆದುಕೊಳ್ಳಲು ಪ್ರತಿಬಾರಿಯೂ ಫೇಸ್ ವಾಶ್ ಬಳಸಬೇಡಿ, ಏಕೆಂದರೆ ಇದರಲ್ಲಿರುವ ರಾಸಾಯನಿಕಗಳು ಕೊಳೆಯ ಜೊತೆಗೇ ಚರ್ಮಕ್ಕೆ ಆರ್ದ್ರತೆ ನೀಡುವ ತೈಲಗಳನ್ನೂ ಸೆಳೆದುಕೊಳ್ಳುವ ಮೂಲಕ ಚರ್ಮವನ್ನು ಒಣದಾಗಿಸುತ್ತದೆ. ಇದು ಚರ್ಮವನ್ನು ನಿಸ್ತೇಜವಾಗಿಸುತ್ತದೆ.

*ಒಂದು ವೇಳೆ ಎಣ್ಣೆ ಪಸೆ ಹೆಚ್ಚಾಗಿದ್ದರೆ: ಫೇಸ್ ವಾಶ್ ಬದಲು ಟೋನರ್ ದ್ರಾವಣವನ್ನು ಬಳಸಿ. ಬಳಿಕ ಕೇವಲ ತಣ್ಣೀರಿನಿಂದ ಮುಖ ತೊಳೆದುಕೊಳ್ಳಿ.

ಒಂದು ವೇಳೆ ಸೂಕ್ಷ್ಮಸಂವೇದಿ ಚರ್ಮವಾಗಿದ್ದರೆ ಉಗುರುಬೆಚ್ಚನೆಯ ನೀರು ಬಳಸಿ ಮಕ್ಕಳಿಗೆ ಉಪಯೋಗಿಸುವ ಬೇಬಿ ಸೋಪ್ ಬಳಸಿ ಮುಖವನ್ನು ತೊಳೆದುಕೊಳ್ಳಿ.

ಕೆಲವು ಅಗತ್ಯ ಸಲಹೆಗಳು

ಎರಡು ನಿಮಿಷಕ್ಕಿಂತ ಹೆಚ್ಚು ಕಾಲ ತೆಗೆದುಕೊಳ್ಳದಿರಿ: ನಮ್ಮ ದೇಹದಲ್ಲಿ ಮುಖದ ಚರ್ಮವೇ ಅತ್ಯಂತ ಹೆಚ್ಚು ಸಂವೇದಿಯಾಗಿರುವ ಕಾರಣ ಹೆಚ್ಚಿನ ಹೊತ್ತು ತೊಳೆದುಕೊಳ್ಳುವ ಮೂಲಕ ಇದು ಒಳ್ಳೆಯದು ಮಾಡುವ ಬದಲಿಗೆ ಕೆಟ್ಟದ್ದನ್ನೇ ಮಾಡಬಹುದು. ತಜ್ಞರ ಪ್ರಕಾರ ಮುಖ ತೊಳೆಯಲು ಎರಡು ನಿಮಿಷಕ್ಕಿಂತ ಹೆಚ್ಚು ಸಮಯ ತೆಗೆದುಕೊಳ್ಳಬಾರದು.

ಕೆಲವು ಅಗತ್ಯ ಸಲಹೆಗಳು

ಟವೆಲ್ ಒತ್ತಿಕೊಳ್ಳಿ, ಉಜ್ಜಬೇಡಿ: ಮುಖ ತೊಳೆದ ಬಳಿಕ ಕೆಲವರು ಟವೆಲ್ ನಿಂದ ಗಸಗಸ ಉಜ್ಜಿ ಒರೆಸಿಕೊಳ್ಳುತ್ತಾರೆ. ಇದರಿಂದ ಮುಖದ ಚರ್ಮದ ಜೀವಕೋಶಗಳು ಕಿತ್ತು ಬರುತ್ತವೆ. ಬದಲಿಗೆ ಕೇವಲ ಒತ್ತಿಕೊಂಡು ಮುಖ ಒರೆಸಿಕೊಳ್ಳಿ.