ಸೌಂದರ್ಯ ಇಮ್ಮಡಿಸುವ ಸೀರಮ್ ದ್ರವ್ಯಗಳು

ವಿಟಮಿನ್ ಸಿ

ಚರ್ಮದ ಆರೈಕೆಗೆ ಅತ್ಯುತ್ತಮ ಪೋಷಕಾಂಶ ಎಂದರೆ ವಿಟಮಿನ್ ಸಿ. ಒಂದು ವೇಳೆ ನಿಮ್ಮ ಮುಖದಲ್ಲಿ ಕಲೆ, ಮೊಡವೆ ಅಳಿದ ಮೇಲೆ ಮೂಡಿದ ಗುಳಿ ಅಥವಾ ಇತರ ಗುರುತುಗಳಿದ್ದರೆ ಅಥವಾ ಗಾಯದ ಗುರುತುಗಳಿದ್ದರೆ ಇದನ್ನು ನಿವಾರಿಸಲು ನೀವು ಆಯ್ಕೆ ಮಾಡಿರುವ ಸೀರಂ ನಲ್ಲಿ ವಿಟಮಿನ್ ಸಿ ಹೆಚ್ಚಿನ ಪ್ರಮಾಣದಲ್ಲಿರಬೇಕು. ಅತಿ ಹೆಚ್ಚಿನ ಪ್ರಮಾಣದಲ್ಲಿ ವಿಟಮಿನ್ ಸಿ ಇರುವ ಸೀರಮ್ ನಿಮಗೆ ಸೂಕ್ತ.

ನೈಸರ್ಗಿಕ ತೈಲಗಳು

ಒಂದು ವೇಳೆ ನಿಮ್ಮ ಚರ್ಮ ಆರ್ದ್ರತೆಯ ಕೊರತೆಯಿಂದ ಬಳಲಿದಂತೆ ಅಥವಾ ಸೂಕ್ಷ್ಮವಾಗಿ ಚಳಿಗೆ ಒಡೆದಂತೆ ಕಂಡರೆ ಇದಕ್ಕೆ ನೈಸರ್ಗಿಕ ತೈಲವಿರುವ ಸೀರಂ ಆಯ್ದುಕೊಳ್ಳುವುದು ಉತ್ತಮ. ಈ ತೈಲಗಳು ಚರ್ಮಕ್ಕೆ ಅಗತ್ಯವಾದ ಆದ್ರತೆಯನ್ನು ನೀಡಿ ಚರ್ಮವನ್ನು ಸದಾ ಕೋಮಲವಾಗಿರುವಂತೆ ನೋಡಿಕೊಳ್ಳುತ್ತವೆ.

ಆಂಟಿ ಆಕ್ಸಿಡೆಂಟುಗಳು

ನಮ್ಮ ಚರ್ಮದಲ್ಲಿ ಕಪ್ಪು ಕಲೆ, ನೆರಿಗೆಗಳು ಮೂಡಲು ಮುಖ್ಯ ಕಾರಣ ಫ್ರೀ ರ್‍ಯಾಡಿಕಲ್ ಎಂಬ ಕಣಗಳು. ಇವುಗಳು ದೇಹದಲ್ಲಿ ಕ್ಯಾನ್ಸರ್ ರೋಗಕ್ಕೂ ಕಾರಣವಾಗುತ್ತವೆ. ಆಂಟಿ ಆಕ್ಸಿಡೆಂಟ್ ಇರುವ ಸೀರಂ ಆಯ್ಕೆ ಮಾಡಿಕೊಳ್ಳುವ ಮೂಲಕ ಈ ಕಣಗಳ ಧಾಳಿಗೆ ನಲುಗಿದ ಚರ್ಮಕ್ಕೆ ಉತ್ತಮ ಆರೈಕೆ ಪಡೆಯಬಹುದು. ವೃದ್ದಾಪ್ಯವನ್ನು ದೂರವಾಗಿಸಲು ಈ ಸೀರಂಗಳು ಅತ್ಯುತ್ತಮವಾಗಿವೆ.

ಅರ್ಗಾನ್ ತೈಲ

ಒಂದು ವೇಳೆ ಹಳೆಯ ಮೊಡವೆಗಳನ್ನು ಚಿವುಟಿದ್ದರ ಪರಿಣಾಮವಾಗಿ ಗಾಢ ಮತ್ತು ಕಪ್ಪು ಕಲೆಗಳು ಮೂಡಿದ್ದರೆ ಈಗ ಇವನ್ನು ನಿವಾರಿಸಲು ಉತ್ತಮ ಸೀರಂ ಲಭ್ಯವಿದೆ. ಯಾವ ಸೀರಂನಲ್ಲಿ ಅರ್ಗಾನ್ ತೈಲ (argan oil) ಪ್ರಮುಖವಾಗಿರುತ್ತದೆಯೋ ಅದೇ ನಿಮ್ಮ ಚರ್ಮಕ್ಕೆ ಅತ್ಯುತ್ತಮವಾದುದು! ಈ ತೈಲವನ್ನು ಚರ್ಮ ಪೂರ್ಣವಾಗಿ ಹೀರಿಕೊಳ್ಳುವ ಮೂಲಕ ಒಳಗಿನಿಂದ ಉತ್ತಮ ಪೋಷಣೆ ದೊರಕುತ್ತದೆ. ಇದು ಜೆಲ್ ನಂತಿರುವ ದ್ರವವಾದ ಕಾರಣ ಇದನ್ನು ಹಚ್ಚಿಕೊಂಡ ಬಳಿಕ ಚರ್ಮದಿಂದ ಆರ್ದ್ರತೆ ಆವಿಯಾಗದಿರುವಂತೆ ನೋಡಿಕೊಳ್ಳುವ ಮೂಲಕ ಚರ್ಮ ಕೋಮಲ ಮತ್ತು ಕಾಂತಿಯುಕ್ತವಾಗುತ್ತದೆ.

ಲಿಂಬೆಯ ಸಿಟ್ರಿಕ್ ಆಮ್ಲ

ಒಂದು ವೇಳೆ ಬಿಸಿಲು ಅಥವಾ ಬೇರೆ ಕಾರಣದಿಂದ ತ್ವಚೆಯ ವರ್ಣ ಸಹಜವರ್ಣಕ್ಕಿಂತ ಹೆಚ್ಚು ಗಾಢವಾಗಿದ್ದರೆ ಬಣ್ಣವನ್ನು ಸಹಜವರ್ಣಕ್ಕೆ ತರಲು ಲಿಂಬೆಯಲ್ಲಿರುವ ಸಿಟ್ರಿಕ್ ಆಮ್ಲ ಇರುವ ಸೀರಂ ಆಯ್ದುಕೊಳ್ಳಬೇಕು. ಇದರ ನಿಯಮಿತ ಬಳಕೆಯಿಂದ ವಿಶೇಷವಾಗಿ ಎಣ್ಣೆಚರ್ಮದವರಿಗೆ ಹೆಚ್ಚಿನ ಪ್ರಯೋಜನವಾಗುತ್ತದೆ ಹಾಗೂ ಗಾಢವಾಗಿದ್ದ ಚರ್ಮ ಪುನಃ ಸಹಜವರ್ಣ ಪಡೆಯಲು ಸಾಧ್ಯವಾಗುತ್ತದೆ.