ಕೋಮಲ ತ್ವಚೆಗಾಗಿ ಮನೆಮದ್ದುಗಳನ್ನು ಆಶ್ರಯಿಸಿ..!

ಮೊಟ್ಟೆಯ ಬಿಳಿಭಾಗ

ನೀವು ಆಮ್ಲೆಟ್ ಮಾಡಲು ಮೊಟ್ಟೆಯನ್ನು ಒಡೆಯುತ್ತೀರಿ ಅಲ್ಲವೇ? ಅಂತೆಯೇ ಮೋಟೆಯ ಹಳದಿ ಭಾಗವನ್ನೆಲ್ಲಾ ಹಾಕಿದ ಮೇಲೆ ಅದರ ಒಳ ಕವಚಕ್ಕೆ ಅಂಟಿರುವ ಬಿಳಿಭಾಗವನ್ನು ನಿಮ್ಮ ಕಣ್ಣುಗಳ ಕೆಳಗೆ ಲೇಪಿಸಿಕೊಳ್ಳಿ. ಇದು ನಿಮ್ಮ ಕಣ್ಣ ಕೆಳಗಿನ ಸುಕ್ಕುಗಳನ್ನು ನಿವಾರಿಸುತ್ತದೆ. ಅಥವಾ ನೀವು ಮೊಟ್ಟೆಯ ಬಿಳಿಭಾಗವನ್ನು ಇಡೀ ಮುಖಕ್ಕೂ ಲೇಪಿಸಿಕೊಳ್ಳ ಬಹುದು. 15 ನಿಮಿಷಗಳ ನಂತರ ಮುಖ ತೊಳೆದರೆ ಮೃದುವಾದ, ನೆರಿಗೆಗಳಿಲ್ಲದ, ಹೊಳೆಯುವ ತ್ವಚೆ ಪಡೆಯಬಹುದು.

ವಿಟಮಿನ್ ಇ ಕ್ಯಾಪ್ಸೂಲ್ ಮತ್ತು ರೋಸ್ ವಾಟರ್

ಯಾವುದೇ ಮೆಡಿಕಲ್ ಅಂಗಡಿಯಲ್ಲಿ ವಿಟಮಿನ್ ಇ ಗುಳಿಗೆಗಳು ದೊರೆಯುತ್ತವೆ. 2 ವಿಟಮಿನ್ ಇ ಗುಳಿಗೆಗಳನ್ನು ಒಡೆದು ರಸತೆಗೆದು ಅದಕ್ಕೆ ಒಂದು ಚಮಚ ರೋಸ್ ವಾಟರ್ ಬೆರೆಸಿ ಚನ್ನಾಗಿ ಕಲಿಸಿಕೊಂಡು, ಮುಖ ಮತ್ತು ಕುತ್ತಿಗೆಯ ಭಾಗಕ್ಕೆ ಲೇಪಿಸಿ ನಿಧಾನವಾಗಿ ಮಸಾಜ್ ಮಾಡಿಕೊಳ್ಳಿ. ತದನಂತರ 10 - 15 ನಿಮಿಷಗಳ ನಂತರ ಮುಖ ತೊಳೆಯಿರಿ.

ಲೋಳೆಸರದ ರಸ ಮತ್ತು ಆಲಿವ್ ಎಣ್ಣೆ

ಲೋಳೆಸರದ ರಸ ಮತ್ತು ಆಲಿವ್ ಎಣ್ಣೆ ಎರಡನ್ನೂ ಒಂದೊಂದು ಚಮಚ ಹಾಕಿ ಕಲಸಿ ಮುಖಕ್ಕೆ ಲೇಪಿಸಿ. ರಾತ್ರಿ ಮಲಗುವಾಗ ಹಚ್ಚಿ ಇಡೀ ರಾತ್ರಿ ಬಿಟ್ಟು ಬೆಳಿಗ್ಗೆ ಮುಖ ತೊಳೆದರೆ ನುಣುಪಾದ ನೈಜ ತ್ವಚೆ ನಿಮ್ಮದಾಗುವುದು.

ಮೊಸರು ಹಾಗು ಕಡಲೆ ಹಿಟ್ಟು

ಇವೆರಡೂ ಸಾಮಾನ್ಯವಾಗಿ ಎಲ್ಲರ ಮನೆಯಲ್ಲಿರುವಂತಹೆ ಪದಾರ್ಥಗಳೇ. ಎರಡನ್ನೂ ಒಂದೊಂದು ಚಮಚದಷ್ಟು ಹಾಕಿ ಕಲಸಿ ಮುಖ ಹಾಗೂ ಕುತ್ತಿಗೆಗೆ ಹಚ್ಚಿ 15 ನಿಮಿಷಗಳ ನಂತರ ತಣ್ಣೀರಿನಲ್ಲಿ ಮುಖ ತೊಳೆಯಿರಿ. ತ್ವರಿತ ಹಾಗೂ ಆರೋಗ್ಯಕರ ಗೌರವರ್ಣಕ್ಕೆ ಇದಕ್ಕಿಂತ ಒಳ್ಳೆಯ ಉಪಾಯ ಇರಲಾರದು.

ಸೌತೆಕಾಯಿ ಮತ್ತು ಓಟ್ ಮೀಲ್

ಮುಖವನ್ನು ರೋಸ್ ವಾಟರ್‌ನಿಂದ ಒದ್ದೆ ಮಾಡಿ ಓಟ್ ಮೀಲ್‌ನಿಂದ 10 ನಿಮಿಷ ಉಜ್ಜಿರಿ. ನಂತರ ಮುಖ ತೊಳೆದು ಸೌತೆಕಾಯಿ ಚೂರುಗಳಿಂದ ನಿಧಾನವಾಗಿ ಮಸಾಜ್ ಮಾಡಿಕೊಳ್ಳಿ. ಅನಂತರ ಮುಖಕ್ಕೆ ಸ್ವಲ್ಪ ಮೊಯಿಶ್ಚರೈಜರ್ ಹಚ್ಚಿ. ಈ ಸರಳ ಮಾರ್ಗೋಪಾಯಗಳನ್ನು ಬಳಸಿ ಕಾಂತಿಯುತ ತ್ವಚೆಯನ್ನು ನಿಮ್ಮದಾಗಿಸಿಕೊಳ್ಳಿ.