ಮಗುವಿನಂತಹ ಕೋಮಲ ತ್ವಚೆ ಪಡೆಯುವ ಇರಾದೆಯೇ?

ಕಾಫಿ ಬೀಜಗಳು

ಹುರಿಯದ ಕೆಲವು ಕಾಫಿ ಬೀಜಗಳನ್ನು ಮಿಕ್ಸಿಯ ಚಿಕ್ಕಜಾರಿನಲ್ಲಿ ನುಣ್ಣನೆಯ ಪುಡಿಯಾಗುವಂತೆ ಅರೆಯಿರಿ. ಇದನ್ನು ಸಮಪ್ರಮಾಣದಲ್ಲಿ ಜೇನು ಮತ್ತು ಆಲಿವ್ ಎಣ್ಣೆಯೊಡನೆ ಬೆರೆಸಿ ನುಣುಪಾದ ಲೇಪನ ತಯಾರಿಸಿ. ಇದನ್ನು ಈಗ ತಾನೇ ತೊಳೆದ ಮುಖಕ್ಕೆ ಹಚ್ಚಿ ಸುಮಾರು ಹದಿನೈದು ನಿಮಿಷಗಳವರೆಗೆ ನಯವಾಗಿ ಮಸಾಜ್ ಮಾಡಿ. ಬಳಿಕ ತಣ್ಣೀರಿನಿಂದ ತೊಳೆದುಕೊಳ್ಳಿ, ಸೋಪು ಉಪಯೋಗಿಸಬೇಡಿ. ಮೊಡವೆಗಳಿರುವ ಮುಖಕ್ಕೆ ಈ ಲೇಪನ ಅತ್ಯುತ್ತಮವಾಗಿದೆ.

ಕಪ್ಪು ಚಾಕಲೇಟು

ಕೊಂಚ ಕಪ್ಪು ಚಾಕಲೇಟನ್ನು ಬಿಸಿಯಾಗಿಸಿ. ಕರಗಲು ತೊಡಗಿದಾಕ್ಷಣ ಒಲೆಯಿಂದ ಇಳಿಸಿ ಸಮಪ್ರಮಾಣದಲ್ಲಿ ಬಾದಾಮಿ ಎಣ್ಣೆ ಮತ್ತು ಸಕ್ಕರೆ ಸೇರಿಸಿ ಮಿಶ್ರಣ ಮಾಡಿ. ನೀವು ತಾಳಿಕೊಳ್ಳುವಷ್ಟು ಬಿಸಿಯಿರುವಂತೆಯೇ ಮುಖಕ್ಕೆ ಹಚ್ಚಿಕೊಳ್ಳಿ. ಸುಮಾರು ಹತ್ತರಿಂದ ಹದಿನೈದು ನಿಮಿಷ ಬಿಟ್ಟು ತಣ್ಣೀರಿನಿಂದ ತೊಳೆದುಕೊಳ್ಳಿ, ಸೋಪು ಬಳಸಬೇಡಿ. ಇದು ಚರ್ಮಕ್ಕೆ ಉತ್ತಮ ಆರೈಕೆ ನೀಡುವ ಮೂಲಕ ಮುಖದ ಕಾಂತಿಯನ್ನು ಹೆಚ್ಚಿಸುತ್ತದೆ.

ಹಸಿರು ಚಹಾ

ಒಂದು ಕಪ್ ಕುದಿನೀರಿಗೆ ಹಸಿರ್ ಚಹಾ ಬ್ಯಾಗ್ ಒಂದನ್ನು ಹಾಕಿ ನೀರು ತಣ್ಣಗಾಗುವವರೆಗೆ ಚಮಚದಿಂದಿ ಕೆಲವು ಬಾರಿ ತಿರುವಿ. ತಣ್ಣಗಾದ ಬಳಿಕ ಬ್ಯಾಗ್ ನಿವಾರಿಸಿ ಕೊಂಚ ಸಕ್ಕರೆ ಮತ್ತು ಜೇನು ಹಾಕಿ. ಈಗ ದ್ರಾವಣ ನೀರಿಗಿಂತ ಕೊಂಚ ಗಾಢವಿರಬೇಕು. ಇಲ್ಲದಿದ್ದರೆ ಇನ್ನೂ ಕೊಂಚ ಸಕ್ಕರೆ ಹಾಕಿ ಗಾಢವಾಗಿಸಿ. ಇದನ್ನು ಈಗತಾನೇ ತೊಳೆದ ಮುಖಕ್ಕೆ ಹಚ್ಚಿ ನಯವಾಗಿ ಸುಮಾರು ಐದು ನಿಮಿಷಗಳವರೆಗೆ ಮಸಾಜ್ ಮಾಡಿ. ಸುಮಾರು ಹತ್ತರಿಂದ ಹದಿನೈದು ನಿಮಿಷ ಬಿಟ್ಟು ತಣ್ಣೀರಿನಿಂದ ತೊಳೆದುಕೊಳ್ಳಿ, ಸೋಪು ಬಳಸಬೇಡಿ. ಇದರಿಂದ ನೈಸರ್ಗಿಕ ಬಣ್ಣ ಮತ್ತು ಕಾಂತಿಯುಕ್ತ ಚರ್ಮ ನಿಮ್ಮದಾಗುತ್ತದೆ.

ಬ್ಲೂಬೆರಿ

ಕೆಲವು ಬ್ಲೂಬೆರಿ ಹಣ್ಣುಗಳನ್ನು ಚೆನ್ನಾಗಿ ಹಿಚುಕಿ ಸ್ವಲ್ಪ ಲಿಂಬೆರಸ ಮತ್ತು ಕಂದುಸಕ್ಕರೆಯನ್ನು ಬಳಸಿ ಮಿಶ್ರಣ ಮಾಡಿ. ಇದನ್ನು ಈಗತಾನೇ ತೊಳೆದ ಮುಖದ ಮೇಲೆ ವೃತ್ತಾಕಾರದಲ್ಲಿ ಸುಮಾರು ಐದು ನಿಮಿಷಗಳವರೆಗೆ ಮಸಾಜ್ ಮಾಡಿ. ನಂತರ ಉಗುರುಬೆಚ್ಚನೆಯ ನೀರಿನಿಂದ ತೊಳೆದುಕೊಳ್ಳಿ.

ಬಾದಾಮಿ

ಕೆಲವು ಒಣಬಾದಾಮಿಗಳನ್ನು ಸ್ವಲ್ಪ ದೊರಗಾರಿವಂತೆ ಅರೆಯಿರಿ. ಇದಕ್ಕೆ ಸ್ವಲ್ಪ ಆಲಿವ್ ಎಣ್ಣೆ ಹಾಕಿ ಮಿಶ್ರಣ ಮಾಡಿ. ಈ ಲೇಪನವನ್ನು ಈಗತಾನೇ ತೊಳೆದ ಮುಖಕ್ಕೆ ಹಚ್ಚಿ ಸುಮಾರು ಹದಿನೈದು ನಿಮಿಷ ಒಣಗಲು ಬಿಡಿ. ಬಳಿಕ ತಣ್ಣೀರಿನಿಂದ ತೊಳೆದುಕೊಳ್ಳಿ, ಸೋಪು ಉಪಯೋಗಿಸಬೇಡಿ.

ಓಟ್ಸ್

ಸಮಪ್ರಮಾಣದಲ್ಲಿ ಕೊಂಚ ಬಿಳಿ ಓಟ್ಸ್, ಹಾಲುಪುಡಿಯಿಂದ ತಯಾರಿಸಿದ ಹಸಿ ಹಾಲು, ಲ್ಯಾವೆಂಡರ್ ಎಣ್ಣೆ ಸೇರಿಸಿ ಚೆನ್ನಾಗಿ ಮಿಶ್ರಣ ಮಾಡಿ. ಬಳಿಕ ಈಗತಾನೇ ತೊಳೆದ ಮುಖಕ್ಕೆ ನಯವಾದ ಮಸಾಜ್ ಮೂಲಕ ಹಚ್ಚಿ. ಮೂಗಿನ ಅಕ್ಕಪಕ್ಕ ಮತ್ತು ಹಣೆಗೆ ಈ ಲೇಪನ ಅತ್ಯುತ್ತಮವಾಗಿದೆ. ಸುಮಾರು ಹದಿನೈದು ನಿಮಿಷದ ಬಳಿಕ ತಣ್ಣೀರಿನಿಂದ ತೊಳೆದುಕೊಳ್ಳಿ, ಸೋಪು ಉಪಯೋಗಿಸಬೇಡಿ.

ಪಪ್ಪಾಯಿ

ಚೆನ್ನಾಗಿ ಕಳಿತ ಪಪ್ಪಾಯಿ ಹಣ್ಣನ್ನು ಸ್ವಲ್ಪ ಸಕ್ಕರೆ ಮತ್ತು ಜೇನು ಸೇರಿಸಿ ನಯವಾದ ಲೇಪನ ತಯಾರಿಸಿ. ಇದನ್ನು ಈಗತಾನೇ ತೊಳೆದ ಮುಖಕ್ಕೆ ಬೆರಳ ತುದಿಗಳಿಂದ ನಯವಾಗಿ ಮಸಾಜ್ ಮಾಡಿ. ಕೆಲವು ನಿಮಿಷ ಒಣಗಲು ಬಿಟ್ಟು ಬಳಿಕ ತಣ್ಣೀರಿನಿಂದ ತೊಳೆದುಕೊಳ್ಳಿ, ಸೋಪು ಉಪಯೋಗಿಸಬೇಡಿ.