ಆಪಲ್ ತಿಂದರೆ ಆರೋಗ್ಯ, ಮುಖಕ್ಕೆ ಹಚ್ಚಿದರೆ ಸೌಂದರ್ಯ

Skin Care

oi-Reena

By Hema S

Updated: Monday, July 30, 2012, 12:35 [IST]

ಸೇಬು ತ್ವಚೆ ಹೊಳಪು ಹೆಚ್ಚಿಸಲು ತುಂಬಾ ಒಳ್ಳೆಯದು. ಇದಕ್ಕಾಗಿ ಒಂದು ಇಡೀ ಸೇಬು ಬಳಸಬೇಕಾಗಿಲ್ಲ, ಒಂದು ಸೇಬಿನಲ್ಲಿ ಒಂದು ಚಿಕ್ಕ ತುಂಡು ತೆಗೆದಿಟ್ಟರೆ ಸಾಕು. ನಿಮ್ಮ ತ್ವಚೆಯನ್ನು ಅತ್ಯುತ್ತಮ ರೀತಿಯಲ್ಲಿ ಆರೈಕೆ ಮಾಡಬಹುದು. ತ್ವಚೆ ಕಾಂತಿಯನ್ನು ಹೆಚ್ಚಿಸಲು ಈ ಕೆಳಗಿನ ವಿಧಾನಗಳನ್ನು ಅನುಸರಿಸಿದರೆ ಸಾಕು ತ್ವಚೆ ಸಮಸ್ಯೆ ನಿವಾರಣೆಯಾಗುವುದು, ನಿಮ್ಮ ಸೌಂದರ್ಯ ಹೆಚ್ಚುವುದು.

ಸೇಬಿನಿಂದ ತ್ವಚೆ ಆರೈಕೆ:

* ಸೇಬನ್ನು ಕತ್ತರಿಸಿ ಅದರ ಸಿಪ್ಪೆ ತೆಗೆದು ಮುಖಕ್ಕೆ ಉಜ್ಜಬೇಕು, ಈ ರೀತಿ 3 ನಿಮಿಷ ಉಜ್ಜಿ 15 ನಿಮಿಷ ಬಿಟ್ಟು ಮುಖ ತೊಳೆಯಬೇಕು. ಈ ರೀತಿ 2 ದಿನಕ್ಕೆ ಒಮ್ಮೆ ಮಾಡಿದರೆ ಒಳ್ಳೆಯದು.

* ಫೇಶಿಯಲ್ ಮಾಡುವಾಗ ಸೇಬಿನಿಂದ ಮಾಡಿದರೆ ಒಳ್ಳೆಯದು.

* ಸ್ವಲ್ಪ ಸೇಬಿನ ಪೇಸ್ಟ್ ಗೆ ಒಂದು ಚಮಚ ಜೇನು ಹಾಕಿ ಮಿಶ್ರ ಮಾಡಿ ಮುಖಕ್ಕೆ ಹಚ್ಚಿ 10 ನಿಮಿಷದ ಬಳಿಕ ಹದ ಬಿಸಿ ನೀರಿನಿಂದ ಮುಖ ತೊಳೆದರೆ ಒಳ್ಳೆಯದು. ಈ ರೀತಿ ವಾರಕ್ಕೊಮ್ಮೆ ಮಾಡಿ.

ಈ ರೀತಿ ಅನುಸರಿಸಿದರೆ ಈ ಕೆಳಗಿನ ಪ್ರಯೋಜನಗಳನ್ನು ಪಡೆಯಬಹುದು:

ನೆರಿಗೆಯನ್ನು ಹೋಗಲಾಡಿಸಲು ಸಹಕಾರಿಯಾಗಿದೆ: ಸೇಬನ್ನು ಮುಖಕ್ಕೆ ಹಚ್ಚಿದರೆ ಮುಖದಲ್ಲಿ ಕೊಲೇಜಿನ್ ಹೆಚ್ಚಿಸುವುದರಿಂದ ಬೇಗನೆ ಮುಪ್ಪಾಗುವ ಸಮಸ್ಯೆ ಉಂಟಾಗುವುದಿಲ್ಲ.

ಇದು ನೈಸರ್ಗಿಕವಾದ ಕ್ಲೆನ್ಸರ್ ಆಗಿದೆ: ಇದರಲ್ಲಿ ನೈಸರ್ಗಿಕವಾದ ಕ್ಲೆನ್ಸಿಂಗ್ ಆಸಿಡ್ ಇರುವುದರಿಂದ ಮುಖದಲ್ಲಿರುವ ಅಧಿಕ ಎಣ್ಣೆ ಅಂಶವನ್ನು ಹೋಗಲಾಡಿಸಲು ಸಹಕಾರಿಯಾಗಿದೆ. 1/4 ಭಾಗ ಸೇಬು ಸ್ವಲ್ಪ ಹಾಲು ಮತ್ತು ಒಂದು ಚಮಚ ಜೇನು ಮಿಶ್ರ ಮಾಡಿ ಪೇಸ್ಟ್ ರೀತಿ ಮಾಡಿ ಇದರಿಂದ ಫೇಸ್ ಪ್ಯಾಕ್ ಮಾಡುತ್ತಾ ಬಂದರೆ ಮುಖದ ಹೊಳಪು ಹೆಚ್ಚಾಗುವುದು.

ತ್ವಚೆ ಬೆಳ್ಳಗಾಗುವುದು: ಬೆಳ್ಳಗೆ ಕಾಣಬೇಕೆಂದು ಅನೇಕ ಕ್ರೀಮ್ ಗಳನ್ನು ಹಚ್ಚುತ್ತೇವೆ. ಅದರ ಬದಲು ಪ್ರತಿದಿನ ಸೇಬಿನ ತುಂಡನ್ನು ಮುಖಕ್ಕೆ ಹಚ್ಚಿ 20 ನಿಮಿಷ ಬಿಟ್ಟು ಬಿಸಿ ನೀರಿನಿಂದ ಮುಖ ತೊಳೆಯಬೇಕು. ಈ ರೀತಿ ಮಾಡುತ್ತಾ ಬಂದರೆ ಮುಖ ಬೆಳ್ಳಗಾಗುವುದು.

ಮೊಡವೆ ನಿಯಂತ್ರಿಸುತ್ತದೆ: ತ್ವಚೆಯಲ್ಲಿ ಕಶ್ಮಲ ಜಾಸ್ತಿಯಿದ್ದರೆ ಮೊಡವೆ ಹೆಚ್ಚಾಗುವುದು. ಸೇಬಿನಿಂದ ಫೇಸ್ ಪ್ಯಾಕ್ ಮಾಡಿದರೆ ಮುಖದಲ್ಲಿ ಬ್ಲ್ಯಾಕ್ ಹೆಡ್ಸ್ ಸಮಸ್ಯೆ ನಿವಾರಣೆಯಾಗುವುದು ಮತ್ತು ಮೊಡವೆ ಕಡಿಮೆಯಾಗುತ್ತದೆ.

ಈ ರೀತಿ ಸೇಬಿನಿಂದ ತ್ವಚೆ ಆರೈಕೆ ಮಾಡಿದರೆ ಮುಖದಲ್ಲಿ ಕಪ್ಪು ಕಲೆಗಳು ಉಂಟಾಗುವುದು, ಬಿಸಿಲಿಗೆ ಹೋದರೆ ಮುಖ ಕಪ್ಪಾಗುವುದು ಮುಂತಾದ ಸಮಸ್ಯೆಗಳು ಕಂಡು ಬರುವುದಿಲ್ಲ.