ಮೊಡವೆಯಿಂದ ಕಲೆ ಉಟಾಗದಿರಲು ಕೆಲ ಸಲಹೆಗಳು

ಮೊಡವೆ ಬಂದರೆ ಸ್ವಲ್ಪ ದಿನದಲ್ಲಿ ಅದು ಕಡಿಮೆಯಾಗುತ್ತದೆ, ಆದರೆ ಅದರ ಕಲೆ ಹಾಗೇ ಉಳಿದುಕೊಳ್ಳುತ್ತದೆ. ಆದ್ದರಿಂದ ಯುವಕ-ಯುವತಿಯರು ಮೊಡವೆಯೆಂದರೆ ದುಃಸ್ವಪ್ನ ಕಂಡಂತೆ ಬೆಚ್ಚಿ ಬೀಳುತ್ತಾರೆ. ದೇಹದಲ್ಲಿ ಹಾರ್ಮೋನ್ ಗಳ ವ್ಯತ್ಯಾಸ ಅಥವಾ ಎಣ್ಣೆ ಪದಾರ್ಥಗಳನ್ನು ಹೆಚ್ಚಾಗಿ ತಿನ್ನುವುದು, ಟೆನ್ಷನ್, ದೂಳಿನಲ್ಲಿ ಓಡಾಟ ಈ ಕಾರಣಗಳಿಂದ ಮೊಡವೆಗಳು ಉಂಟಾಗುತ್ತದೆ. ಇದರಿಂದಾಗಿ ಮುಖದಲ್ಲಿ ಕಲೆಗಳು ಉಂಟಾಗುತ್ತವೆ. ಮೊಡವೆ ಬಂದಾಗ ಕಲೆಗಳು ಉಳಿಯದಂತೆ ತಡೆಯಲು ಈ ಕೆಳಗಿನ ಸಲಹೆಗಳನ್ನು ಪಾಲಿಸಿ ಸ್ವಚ್ಛ ತ್ವಚೆಯನ್ನು ಪಡೆಯಿರಿ.

1. ಮೊಡವೆಯನ್ನು ಕಿವುಚಬೇಡಿ: ಮೊಡವೆ ಬಂದರೆ ಹೆಚ್ಚಿನವರು ಅದನ್ನು ಕಿವುಚುವ ಅಭ್ಯಾಸವಿರುತ್ತದೆ. ಈ ರೀತಿ ಮಾಡಿದರೆ ಮೊಡವೆ ಬೇಗನೆ ಒಣಗುತ್ತದೆ ಎಂದು ಭಾವಿಸಿ ಆ ರೀತಿ ಮಾಡುತ್ತಾರೆ. ಆದರೆ ಈ ರೀತಿ ಮಾಡಿದರೆ ಅದರಿಂದ ಮುಖದಲ್ಲಿ ಕಲೆ ಹಾಗೂ ಚಿಕ್ಕ-ಚಿಕ್ಕ ರಂಧ್ರಗಳು ಬೀಳುತ್ತದೆ.

2. ಆಗಾಗ ಮುಖ ತೊಳೆಯಬೇಕು: ಮೊಡವೆ ಇರುವವರು ದಿನದಲ್ಲಿ 6-7 ಬಾರಿ ಮುಖ ತೊಳೆಯಬೇಕು. ದಿನದಲ್ಲಿ 2 ಬಾರಿ ಮೊಡವೆ ಕಡಿಮೆಯಾಗಲು ಬಳಸುವ ಸೋಪು ಬಳಸಿ ಮುಖ ತೊಳೆಯಿರಿ, ನಂತರ ತಣ್ಣೀರಿನಿಂದ ಮುಖ ತೊಳೆಯಿರಿ. ಮೇಕಪ್ ಸಾಧನಗಳನ್ನು ಬಳಸಲು ಹೋಗಬೇಡಿ. ಈ ರೀತಿ ಮಾಡಿದರೆ ಕೆಲವೇ ದಿನದಲ್ಲಿ ಮೊಡವೆ ಕಡಿಮೆಯಾಗುವುದು, ಅಲ್ಲದೆ ಕಲೆ ಸಮಸ್ಯೆ ಕೂಡ ಕಂಡು ಬರುವುದಿಲ್ಲ.

3. ಬಿಸಿಲಿಗೆ ಹೋಗಬೇಡಿ: ಮೊಡವೆಯ ಸೂರ್ಯನ ಕಿರಣಗಳು ತಾಗಿದಾಗ ಕಲೆ ಉಂಟಾಗುವ ಸಾಧ್ಯತೆ ಹೆಚ್ಚು. ಆದ್ದರಿಂದ ಬಿಸಿಲಿಗೆ ಹೋಗಬಾರದು. ಒಂದು ವೇಳೆ ಹೋಗವುದಾದರೆ ಕೊಡೆ ಹಿಡಿದು ಹೋಗಿ.

4. ಫೇಸ್ ಪ್ಯಾಕ್: ಪ್ರತಿದಿನ ಸ್ವಲ್ಪ ರೋಸ್ ವಾಟರ್ ಗೆ ಗಂಧವನ್ನು ಅರೆದು ಮಿಶ್ರಣ ಮಾಡಿ ಮುಖಕ್ಕೆ ಹಚ್ಚುತ್ತಾ ಬಂದರೆ ಮೊಡವೆ ಕಡಿಮೆಯಾಗುವುದು ಹಾಗೂ ಮೊಡವೆಯ ಕಲೆಗಳಿದ್ದರೆ ಅವುಗಳು ಮಾಯವಾಗಿ ಮೃದುವಾದ, ಸುಂದರವಾದ ತ್ವಚೆ ನಿಮ್ಮದಾಗುವುದು.

ಸಲಹೆ: ಬೆಳ್ಳುಳ್ಳಿಯನ್ನು ಹಚ್ಚಿ ಸುಲಭವಾಗಿ ಮೊಡವೆಯನ್ನು ಹೋಗಲಾಡಿಸಬಹುದು, ಈ ವಿಧಾನದಿಂದ ಮೊಡವೆ ಕಡಿಮೆಯಾಗುವುದು ಆದರೆ ಕಲೆಗಳು ಉಂಟಾಗುತ್ತವೆ. ಆದ್ದರಿಂದ ಬೆಳ್ಳುಳ್ಳಿ ಬದಲು ಗಂಧ ಅಥವಾ ಚಂದನ ಬಳಸುವುದು ಒಳ್ಳೆಯದು.