ಕೂದಲು ದಪ್ಪವಾಗಿ ಕಾಣಲು ಈ ಕೇಶ ಆರೈಕೆ

ತುಂಬಾ ತೆಳುವಾದ ಕೂದಲಿದ್ದರೆ ಎಷ್ಟೇ ಅಲಂಕಾರ ಮಾಡಲಿ ಮುಖ ಡಲ್ಲಾಗಿ ಕಾಣುತ್ತದೆ. ಕೆಲವರಿಗೆ ನೈಸರ್ಗಿಕವಾಗಿ ದಪ್ಪವಾದ ಕೂದಲು ಇರುತ್ತದೆ. ಅಂತಹವರಿಗೆ ಕೂದಲು ಉದುರಿದರೆ ಮಾತ್ರ ಕೂದಲು ತೆಳ್ಳಗಾಗಿ ಕೂದಲಿನ ಸಮಸ್ಯೆ ಕಂಡು ಬರುವುದು. ಆದರೆ ಮತ್ತೆ ಕೆಲವರು ನೈಸರ್ಗಿಕವಾಗಿ ತುಂಬಾ ತೆಳು ಕೂದಲು ಹೊಂದಿರುತ್ತಾರೆ. ಅಂತಹ ಕೂದಲಿದ್ದರೆ ಮುಖದ ಲಕ್ಷಣ ಕೂಡ ಕಡಿಮೆಯಾಗುವುದು. ಇಂತಹ ಕೂದಲನ್ನು ಸ್ವಲ್ಪ ಆರೈಕೆ ಮಾಡಿದರೆ ಆಕರ್ಷಕವಾಗಿ ಕಾಣುವಂತೆ ಮಾಡಬಹುದು. ಒಂದು ವೇಳೆ ನಿಮ್ಮ ಕೂದಲು ತುಂಬಾ ತೆಳ್ಳಗಿದ್ದರೆ ಈ ಕೆಳಗಿನ ಸಲಹೆಗಳನ್ನು ಪಾಲಿಸಿ ಕೂದಲು ಆಕರ್ಷಕವಾಗಿ ಕಾಣುವಂತೆ ಮಾಡಬಹುದು.

ಎಣ್ಣೆ ಮಸಾಜ್: 2ಚಮಚ ಹರಳೆಣ್ಣೆ, ಒಂದು ಚಮಚ ತೆಂಗಿನೆಣ್ಣೆ, ಒಂದು ಚಮಚ ಬಾದಾಮಿ ಎಣ್ಣೆ ಇವುಗಳನ್ನು ಮಿಶ್ರ ಮಾಡಿ ಎಣ್ಣೆ ಬಿಸಿ ಮಾಡಿ ಆ ಎಣ್ಣೆಯಿಂದ ಮಸಾಜ್ ಮಾಡಬೇಕು. ಈ ರೀತಿ ವಾರಕ್ಕೆ ಎರಡು ಬಾರಿ ಮಾಡಬೇಕು. ಈ ರೀತಿ ಮಾಡುತ್ತಾ ಬಂದರೆ ಹೊಸ ಕೂದಲು ಬಂದು ಕೂದಲು ಸೊಂಪಾಗಿ ಬೆಳೆಯಲಾರಂಭಿಸುತ್ತದೆ.

ಕೂದಲು ಕತ್ತರಿಸುವುದು: ಕೂದಲು ಕತ್ತರಿಸಿದರೆ ಕೂದಲು ಸ್ವಲ್ಪ ದಪ್ಪವಾಗಿ ಕಾಣುತ್ತದೆ. ತಲೆಯನ್ನು ತುಂಬಾ ಬಾರಿ ಬಾಚಬೇಡಿ, ಒದ್ದೆ ಕೂದಲನ್ನು ಬಾಚಬೇಡಿ.

ಈ ರೀತಿಯ ಕೂದಲಿಗೆ ಈ ಕೆಳಗಿನಂತೆ ನೈಸರ್ಗಿಕವಾದ ಹೇರ್ ಪ್ಯಾಕ್ ಮಾಡಿದರೆ ಕೂದಲು ಆಕರ್ಷಕವಾಗಿ ಕಾಣುವುದು.

ಬಾಳೆಹಣ್ಣಿನಿಂದ ಹೇರ್ ಪ್ಯಾಕ್: ಹಣ್ಣಾದ ಬಾಳೆಹಣ್ಣು ಮತ್ತು ಒಂದು ಚಮಚ ಜೇನು ಮಿಶ್ರ ಮಾಡಿ ತಲೆಗೆ ಹಚ್ಚಿ 20-25 ನಿಮಿಷ ಬಿಟ್ಟು ತಲೆ ತೊಳೆಬೇಕು. ಈ ರೀತಿ ಮಾಡಿದರೆ ಕೂದಲು ದಪ್ಪವಾಗಿ ಕಾಣುವುದು ಮತ್ತು ಹೊಳಪನ್ನು ಹೊಂದುತ್ತದೆ.

ಬೆಣ್ಣೆ ಹಣ್ಣು: ಬೆಣ್ಣೆ ಹಣ್ಣು ತ್ವಚೆ ಆರೈಕೆ, ಕೂದಲಿನ ಆರೈಕೆಯಲ್ಲಿ ಬಳಸಿದರೆ ತುಂಬಾ ಒಳ್ಳೆಯದು. ಒಂದು ಅವಕಾಡೊ ಅಥವಾ ಬೆಣ್ಣೆ ಹಣ್ಣಿಗೆ ಒಂದು ಚಮಚ ಆಲೀವ್ ಎಣ್ಣೆ, ಒಂದು ಚಮಚ ಹರಳೆಣ್ಣೆ ಮಿಶ್ರ ಮಾಡಿ ಈ ಮಿಶ್ರಣವನ್ನು ತಲೆಗೆ ಹಚ್ಚಿ 20-25 ನಿಮಿಷ ಬಿಟ್ಟು ತಲೆ ತೊಳೆದರೆ ಕೂದಲು ದಪ್ಪವಾಗಿ ಕಾಣುತ್ತದೆ.

ಮೊಟ್ಟೆ: ಮೊಟ್ಟೆಯ ಬಿಳಿ ಬಳಸಿದರೆ ಕೂದಲಿನ ಆರೋಗ್ಯ ಹೆಚ್ಚಾಗುವುದು. ಮೊಟ್ಟೆಯ ಬಿಳಿ ಹಚ್ಚಿ 15 ನಿಮಿಷದ ನಂತರ ತಲೆ ತೊಳೆಯಬೇಕು. ಈ ರೀತಿ ವಾರದಲ್ಲಿ 2 ಬಾರಿ ಮಾಡಿದರೆ ಕೂದಲು ದಪ್ಪವಾಗಿ ಆಕರ್ಷಕವಾಗಿ ಕಾಣುವುದು.