ಬ್ಲಾಕ್ ಹೆಡ್ಸ್ ನಿವಾರಿಸುತ್ತೆ ಈ ಫೇಸ್ ಮಾಸ್ಕ್

Skin Care

oi-Reena

By Hema S

Updated: Wednesday, August 8, 2012, 12:05 [IST]

ಸ್ವಚ್ಛವಾದ ಮುಖವನ್ನು ಒಮ್ಮೆ ನೋಡಿದರೆ ಮತ್ತೊಮ್ಮೆ ನೋಡಬೇಕೆನಿಸುತ್ತದೆ. ಛೇ, ಅಂತಹ ಮುಖ ನಮಗೆ ಇಲ್ವಲ್ಲಾ ಎಂಬ ಕೊರಗು, ಅವರ ಮೇಲೆ ಸ್ವಲ್ಪ ಹೊಟ್ಟೆಕಿಚ್ಚೂ ಆಗುತ್ತದೆ. ಮನೆಗೆ ಬಂದ ತಕ್ಷಣ ನಮ್ಮ ಮುಖದ ಅಂದವನ್ನು ಮರೆಮಾಚಿಸುತ್ತಿರುವ ಬ್ಲಾಕ್ ಹೆಡ್ಸ್ ನೋಡಿ ಇದನ್ನು ಹೇಗಪ್ಪಾ ಹೋಗಿಸುವುದು ಎಂದ ಯೋಚಿಸುತ್ತೇವೆ ಅಲ್ವಾ?

ಇನ್ನು ಮುಂದೆ ಬ್ಲಾಕ್ ಹೆಡ್ಸ್ ಚಿಂತೆ ಬಿಡಿ, ಈ ಕೆಳಗಿನ ಫೇಸ್ ಮಾಸ್ಕ್ ನಲ್ಲಿ ಯಾವುದಾದರು ಒಂದನ್ನು ಮಾಡಿ ನೋಡಿ ಸ್ವಚ್ಛ ಮತ್ತು ಸುಂದರ ತ್ವಚೆಯ ಒಡೆಯರು ನೀವಾಗುವಿರಿ.

ಫೇಸ್ ಮಾಸ್ಕ್:

ಮೊಟ್ಟೆಯ ಮಾಸ್ಕ್: ಮುಖದಲ್ಲಿ ಬ್ಲಾಕ್ ಹೆಡ್ಸ್ ಸಮಸ್ಯೆ ನಿವಾರಿಸಲು ಮಾತ್ರವಲ್ಲ, ಮುಖದಲ್ಲಿ ಚಿಕ್ಕ ರಂಧ್ರಗಳಿದ್ದರೆ ಅದು ಎದ್ದು ಕಾಣದಂತೆ ಮಾಡುವಲ್ಲಿ ಈ ಮಾಸ್ಕ್ ತುಂಬಾ ಪ್ರಯೋಜನಕಾರಿಯಾಗಿದೆ. ಒಂದು ಮೊಟ್ಟೆಯ ಬಿಳಿಗೆ 1 ಚಮಚ ಜೆಲಾಟಿನ್ ಮತ್ತು 2 ಚಮಚ ಹಾಲು ಮಿಶ್ರ ಮಾಡಿ ಕಡಿಮೆ ಉರಿಯಲ್ಲಿ ಒಂದು ನಿಮಿಷ ಬಿಸಿ ಮಾಡಬೇಕು. ನಂತರ ಅದನ್ನು ಚೆನ್ನಾಗಿ ತಿರುಗಿಸಿ ಪೇಸ್ಟ್ ರೀತಿ ಮಾಡಿ ಆರಲು ಬಿಡಬೇಕು. ನಂತರ ಈ ಪೇಸ್ಟ್ ಅನ್ನು ಮುಖಕ್ಕೆ ಹಚ್ಚಿ 5-10 ನಿಮಿಷ ಬಿಡಬೇಕು. ಮಾಸ್ಕ್ ಒಣಗಿದ ನಂತರ ಕಿತ್ತು ತೆಗೆಯಬೇಕು. ನಂತರ ಮುಖವನ್ನು ತಣ್ಣೀರಿನಿಂದ ತೊಳೆಯಿರಿ. ಈ ರೀತಿ ವಾರಕ್ಕೆ ಎರಡು ಬಾರಿ ಮಾಡುತ್ತಾ ಬಂದರೆ ಬ್ಲಾಕ್ ಹೆಡ್ಸ್ ಕಡಿಮೆಯಾಗುವುದು.

ನಿಂಬೆರಸ ಮತ್ತು ಮೊಟ್ಟೆಯ ಬಿಳಿಯಿಂದ ಮಾಸ್ಕ್: ನಿಂಬೆರಸದಲ್ಲಿರುವ ಆಲ್ಫಾ ಹೈಡ್ರೋಕ್ಸಿ ಆಸಿಡ್ ಅಂಶವು ಬ್ಯಾಕ್ಟೀರಿಯಾಗಳನ್ನು ಕೊಲ್ಲುವುದರ ಜೊತೆಗೆ ತ್ವಚೆಯನ್ನು ಬಿಗಿಗೊಳಿಸುತ್ತದೆ. ಆದ್ದರಿಂದ ಮೊಟ್ಟೆಯ ಬಿಳಿಗೆ ಸ್ವಲ್ಪ ನಿಂಬೆ ರಸ ಹಾಕಿ ಮಿಶ್ರ ಮಾಡಿ ಮುಖಕ್ಕೆ ಹಚ್ಚಿ ಒಣಗಿದ ನಂತರ ತೆಗೆಯಬೇಕು. ನಂತರ ತಣ್ಣೀರಿನಿಂದ ಮುಖ ತೊಳೆಯಿರಿ. ಈ ರೀತಿ ವಾರದಲ್ಲಿ ಎರಡು ಬಾರಿ ಮಾಡುತ್ತಾ ಬನ್ನಿ.

ಕಿತ್ತಳೆಯ ಸಿಪ್ಪೆಯಿಂದ ಮಾಸ್ಕ್: ಬ್ಲಾಕ್ ಹೆಡ್ಸ್ ನಿವಾರಣೆಗೆ ಈ ಫೇಸ್ ಮಾಸ್ಕ್ ಅನ್ನು ಹೆಚ್ಚಾಗಿ ಮಾಡಲಾಗುವುದು. ಇದಕ್ಕಾಗಿ ಕಿತ್ತಳೆ ಸಿಪ್ಪೆಯನ್ನು ಬಿಸಾಡದೆ ಒಣಗಿಸಿ ಇಡಬೇಕು. ನಂತರ ಇದನ್ನು ಹಾಲಿನ ಜೊತೆ ಅರೆದು ಪೇಸ್ಟ್ ಮಾಡಿ ಅದನ್ನು ಪ್ರತಿದಿನ ಮುಖಕ್ಕೆ ಹಚ್ಚಿ 15 ನಿಮಿಷ ಬಿಡಬೇಕು. ಈ ರೀತಿ ವಾರದಲ್ಲಿ 2-3 ಬಾರಿ ಮಾಡುತ್ತಾ ಬಂದರೆ ಬ್ಲಾಕ್ ಹೆಡ್ಸ್ ಸಮಸ್ಯೆ ಇರುವುದಿಲ್ಲ, ಮುಖ ತುಂಬಾ ಕ್ಲಿಯರ್ ಆಗಿ ಕಾಣಿಸುವುದು.