ಸೂಕ್ಷ್ಮ ತ್ವಚೆಯವರೇ ಫೇಶಿಯಲ್ ಮಾಡಿಸುವ ಮುನ್ನ ಎಚ್ಚರ!

Published: Wednesday, June 13, 2012, 10:47 [IST]

ಸೂಕ್ಷ್ಮ ತ್ವಚೆ ಹೊಂದಿರುವವರೆಗೆ ಗೊತ್ತು ಅದನ್ನು ಆರೈಕೆ ಮಾಡುವುದು ಎಷ್ಟು ಕಷ್ಟಕರವಾದ ಕೆಲಸವೆಂದು. ಯಾವುದೇ ಕ್ರೀಮ್ ಅಥವಾ ಮೇಕಪ್ ಮಾಡುವ ಮುನ್ನ ತುಂಬಾ ಎಚ್ಚರಿಕೆವಹಿಸಬೇಕು. ಇಲ್ಲದಿದ್ದರೆ ಅವುಗಳು ತ್ವಚೆ ಅಲರ್ಜಿಯನ್ನು ಉಂಟು ಮಾಡುತ್ತದೆ. ಫೇಶಿಯಲ್ ಮಾಡುವಾಗ ಕೂಡ ಮುಖಕ್ಕೆ ಸೂಕ್ತವಾದ ಮೇಕಪ್ ಯಾವುದೆಂದು ತಿಳಿದುಕೊಂಡು ಮಾಡಬೇಕಾಗುತ್ತದೆ, ಇಲ್ಲದಿದ್ದರೆ ಮುಖ ಕಾಂತಿ ಹೆಚ್ಚುವ ಬದಲು ಇದ್ದ ಚೆಂದವೂ ಇಲ್ಲದಾಗುತ್ತದೆ. ಆದ್ದರಿಂದ ಸೂಕ್ಷ್ಮ ತ್ವಚೆಯವರು ತ್ವಚೆ ಕಾಂತಿಯನ್ನು ಹೆಚ್ಚಿಸಲು ಈ ಕೆಳಗಿನ ಅಂಶಗಳನ್ನು ತಿಳಿದಿರುವುದು ಒಳ್ಳೆಯದು.

ಸೂಕ್ಷ್ಮ (ಸೆನ್ಸಿಟಿವ್) ತ್ವಚೆ ಆರೈಕೆಗೆ ಈ ಕೆಳಗಿನ ವಿಧಾನದ ಫೇಶಿಯಲ್ ಮಾಡಬಹುದಾಗಿದೆ.

1. ಫ್ರೂಟ್ ಫೇಶಿಯಲ್ (ಹಣ್ಣುಗಳ ಫೇಶಿಯಲ್): ತಾಜಾ ಹಣ್ಣುಗಳನ್ನು ಬಳಸಿ ಫೇಶಿಯಲ್ ಮಾಡುವುದರಿಂದ ಈ ಫೇಶಿಯಲ್ ಮುಖಕ್ಕೆ ತುಂಬಾ ಒಳ್ಳೆಯದು. ಈ ಫೇಶಿಯಲ್ ಕೇವಲ ಸೂಕ್ಷ್ಮ ತ್ವಚೆಯವರಿಗೆ ಮಾತ್ರವಲ್ಲ ಎಲ್ಲಾ ರೀತಿಯ ತ್ವಚೆಯರು ಮಾಡಿಸಿಕೊಂಡರೂ ಉತ್ತಮ ಪ್ರಯೋಜನವನ್ನು ಕಾಣಬಹುದು. ಸೂಕ್ಷ್ಮ ತ್ವಚೆಯವರು ಮಿಶ್ರ ಹಣ್ಣುಗಳಿಂದ ತಯಾರಿಸಿದ ಫೇಶಿಯಲ್ ಬಳಸುವ ಬದಲು ಯಾವ ಹಣ್ಣು ತುಂಬಾ ಸೂಕ್ತ ಅನಿಸುತ್ತದೆಯೋ ಅದನ್ನು ಬಳಸುವುದು ಒಳ್ಳೆಯದು. ಪಪ್ಪಾಯಿ, ಬಾಳೆ ಹಣ್ಣಿನ ಫೇಶಿಯಲ್ ಬಳಸುವುದು ಒಳ್ಳೆಯದು.

2. ಚಾಕಲೇಟ್ ಫೇಶಿಯಲ್: ಸೂಕ್ಷ್ಮ ತ್ವಚೆಯವರಿಗೆ ತುಂಬಾ ಸೂಕ್ತವಾದ ಫೇಶಿಯಲ್ ಅಂದರೆ ಅದು ಚಾಕಲೇಟ್ ಫೇಶಿಯಲ್. ಇದರಲ್ಲಿ ಕೋಕಾ ಅಂಶವಿರುವುದರಿಂದ ಅಲರ್ಜಿ ಉಂಟಾಗುವುದಿಲ್ಲ.

3. ಅಕೈ ಬೆರಿ ಫೇಶಿಯಲ್: ಅಕೈ ಬೆರಿ ಹಣ್ಣುಗಳಿಂದ ಕೂಡ ಫೇಶಿಯಲ್ ಮಾಡಬಹುದು. ಇದರಲ್ಲಿ anti oxidants ಪ್ರಮಾಣ ಹೆಚ್ಚಾಗಿದ್ದು ಆರೋಗ್ಯಕ್ಕೂ ತುಂಬಾ ಒಳ್ಳೆಯದು. ಇದನ್ನು ಬಳಸಿದರೆ ತ್ವಚೆ ಬೇಗನೆ ನೆರಿಗೆ ಮೂಡುವುದನ್ನು ತಡೆಗಟ್ಟಬಹುದು.

4. ಗಂಧದ ಫೇಶಿಯಲ್: ಗಂಧ ಆಕರ್ಷಕವಾದ ತ್ವಚೆಯನ್ನು ನೀಡುತ್ತದೆ. ಗಂಧ ಅಥವಾ ಚಂದನ ದಿನಾ ಹಚ್ಚಿದರೆ ಮುಖದಲ್ಲಿರುವ ಮೊಡವೆ ಮತ್ತು ಕಲೆಗಳು ಕಡಿಮೆಯಾಗುತ್ತದೆ.

ಸೂಕ್ಷ್ಮ (ಸೆನ್ಸಿಟಿವ್) ತ್ವಚೆ ಆರೈಕೆಗೆ ಈ ಕೆಳಗಿನ ಫೇಶಿಯಲ್ ಮಾಡಲೇಬಾರದು:

1.ಕ್ಲೀನ್ ಅಪ್: ಕ್ಲೀನ್ ಅಪ್ ಮಾಡುವ ಮೊದಲು ಮುಖಕ್ಕೆ ಸ್ಟೀಮ್ ಕೊಟ್ಟು ನಂತರ ಮಾಡಲಾಗುವುದು. ಈ ರೀತಿ ಮಾಡಿ ಬ್ಲ್ಯಾಕ್ ಹೆಡ್ಸ್ ತೆಗೆಯಲಾಗುವುದು. ಆದರೆ ಸೂಕ್ಷ್ಮ ತ್ವಚೆಯವರು ಕ್ಲೀನ್ ಅಪ್ ಮಾಡಿಸದಿರುವುದು ಒಳ್ಳೆಯದು. ಏಕೆಂದರೆ ಈ ರೀತಿ ಮಾಡಿಸಿದಾಗ ಮುಖ ಕೆಂಪಾಗುವುದು. ಆದ್ದರಿಂದ ಬ್ಲ್ಯಾಕ್ ಹೆಡ್ಸ್ ತೆಗೆಯಲು ಸ್ಕ್ರಬ್ಬರ್ ಬಳಸುವುದು ಸೂಕ್ತ.

2. ಪರ್ಲ್ ಫೇಶಿಯಲ್ (ಮುತ್ತಿನ ಫೇಶಿಯಲ್): ಇದನ್ನು ಯಾವುದೇ ಕಾರಣಕ್ಕೂ ಸೂಕ್ಷ್ಮ ತ್ವಚೆಯವರು ಮಾಡಿಸಲು ಹೋಗಬಾರದು. ಇದರಿಂದ ಅಲರ್ಜಿ ಉಂಟಾಗುವ ಸಾಧ್ಯತೆ.

3. ಪಾರಾಫಿನ್ ಫೇಶಿಯಲ್: ಇದನ್ನು ಕೂಡ ಸೂಕ್ಷ್ಮ ತ್ವಚೆಯವರು ಬಳಸದಿರುವುದು ಒಳ್ಳೆಯದು.

4. ಡೈಮೆಂಡ್ ಫೇಶಿಯಲ್: ಡೈಮೆಂಡ್ ಫೇಶಿಯಲ್ ಹೆಚ್ಚಿನವರಿಗೆ ಅಲರ್ಜಿ ಉಂಟು ಮಾಡುತ್ತದೆ. ಆದ್ದರಿಂದ ಇದನ್ನು ಬಳಸುವ ಮೊದಲು ಅಲರ್ಜಿ ಉಂಟಾಗುತ್ತದೆಯೇ ಎಂದು ಕೈಯಲ್ಲಿ ಪರೀಕ್ಷಿಸಿ ನಂತರ ಬಳಸಬಹುದು. ಸೂಕ್ಷ್ಮ ತ್ವಚೆಯವರು ಇದನ್ನು ಬಳಸುವ ಪ್ರಯತ್ನಕ್ಕೆ ಹೋಗದಿರುವುದೇ ಒಳ್ಳೆಯದು.