ತ್ವಚೆ ರಕ್ಷಣೆಗೆ ನೀವು ಕಲಿಯಲೇಬಾರದ ಅಭ್ಯಾಸಗಳು

Skin Care

oi-Reena

By Hema S

Published: Saturday, April 28, 2012, 17:21 [IST]

ಹೊಳಪಿನ ತ್ವಚೆ ಬೇಕೆಂದು ಕ್ಲೆನ್ಸಿಂಗ್, ಮಾಯಿಶ್ಚರೈಸಿಂಗ್ ಅಂತ ಅನೇಕ ರೀತಿಯಲ್ಲಿ ಆರೈಕೆ ಮಾಡುತ್ತೇವೆ. ಆದರೆ ಜನರು ಕೆಲವೊಂದು ಹವ್ಯಾಸವನ್ನು ಹೊಂದಿರುತ್ತಾರೆ. ಅ ಹವ್ಯಾಸಗಳು ಅವರ ಸೌಂದರ್ಯ ಹಾಳುಮಾಡುತ್ತದೆ ಎಂಬ ಅಂಶ ಗೊತ್ತಿರುವುದೇ ಇಲ್ಲ. ಆ ಅಭ್ಯಾಸಗಳನ್ನು ನೀವೂ ಹೊಂದಿರಬಹುದು. ತ್ವಚೆಗೆ ಮಾರಕವಾಗಿರುವ ಈ ಕೆಳಗಿನ ಹವ್ಯಾಸಗಳು ನಿಮ್ಮಲ್ಲಿಯೂ ಇದ್ದರೆ ಅದನ್ನು ಬಿಡುವುದು ಒಳ್ಳೆಯದು.

1. ಕಣ್ಣಿನ ತ್ವಚೆ ಎಳೆದು ಮೇಕಪ್ ಮಾಡುವುದು: ಮಸ್ಕರಾಅಥವಾ ಕಾಜಲ್ ಹಾಕುವಾಗ ಕಣ್ಣಿನ ತ್ವಚೆಯನ್ನು ಎಳೆದು ಹಾಕುವುದು, ನಂತರ ಮುಖ ತೊಳೆಯುವಾಗ ಆ ರೀತಿ ಮಾಡುವ ಅಭ್ಯಾಸವನ್ನು ಹೊಂದಿದ್ದರೆ ಕಣ್ಣಿನ ಕೆಳಭಾಗದಲ್ಲಿ ಬೇಗನೆ ನೆರಿಗೆ ಬೀಳುವುದು. ಆದ್ದರಿಂದ ಕಣ್ಣಿಗೆ ಅಲಂಕಾರ ಮಾಡುವಾಗ ಸ್ವಲ್ಪ ಜಾಗೃತಿವಹಿಸಿ ಮಾಡಬೇಕು.

2. ಮೇಕಪ್ ಟೋನರ್: ಮೇಕಪ್ ಟೋನರ್ ಅನ್ನು ಹಾಗೇ ಹಾಕಿ ಬಿಡುತ್ತೇವೆ, ಟೋನರ್ ಅನ್ನು ಮುಖದಿಂದ ಉಜ್ಜಿ ತೆಗೆಯಲು ಹೋಗುವುದಿಲ್ಲ.ಟೋನರ್ ಬಳಸಿ ಮೇಕಪ್ ಅನ್ನು ಕ್ಲೆನ್ಸ್ ಮಾಡಲು (ತೆಗೆಯಲು) ಉಪಯೋಗಿಸುತ್ತೇವೆ. ಆದರೆ ಅದನ್ನು ಮುಖದಿಂದ ಉಜ್ಜಿ ತೆಗೆಯದಿದ್ದರೆ ಮುಖದಲ್ಲಿರುವ ಮೇಕಪ್ ಸಂಪೂರ್ಣವಾಗಿ ಹೋಗುವುದಿಲ್ಲ. ಇದರಿಂದ ಕೆಮಿಕಲ್ ಹಾಗೇ ನಿಂತು ತ್ವಚೆಯ ಹೊಳಪು ಹಾಳಾಗುವುದು.

3. ದಿನಾ ಸ್ಕ್ರಬ್ಬಿಂಗ್ ಮಾಡುವುದು: ಕಂಪನಿಗಳು ದಿನಕ್ಕೆ 2 ಬಾರಿ ಸ್ಕ್ರಬ್ ಮಾಡುವಂತೆ ಜಾಹೀರಾತು ನೀಡಬಹುದು. ಆದರೆ ತ್ವಚೆಗೆ ಆ ರೀತಿ ಬಳಕೆ ಮಾಡುವುದು ಅಷ್ಟು ಒಳ್ಳೆಯದಲ್ಲ. ತ್ವಚೆ ಪೋಷಣೆ ಮತ್ತು ಮುಖದ ಕಾಂತಿಗೆ ವಾರಕ್ಕೆ 2 ಬಾರಿ ಸ್ಕ್ರಬ್ ಮಾಡುವುದು ಒಳ್ಳೆಯದು.

4. ಬೆಳಗ್ಗೆ ಎದ್ದ ತಕ್ಷಣ ಮುಖ ತೊಳೆಯುವುದು: ಹೆಚ್ಚಿನ ಜನರು ಬೆಳಗ್ಗೆ ಎದ್ದ ತಕ್ಷಣ ಮುಖ ತೊಳೆಯುವ ಅಭ್ಯಾಸ ಹೊಂದಿರುವುದಿಲ್ಲ. ಆದರೆ ಬೆಳಗ್ಗೆ ಎದ್ದ ತಕ್ಷಣ ಮುಖ ತೊಳೆಯುವುದರಿಂದ ತ್ವಚೆಯ ರಂಧ್ರಗಳು ಬೇಗನೆ ತೇವಾಂಶವನ್ನು ಹೀರಿಕೊಳ್ಳುತ್ತದೆ.

5. ಕಾಲಾವಧಿ ಮುಗಿದ ಮೇಕಪ್ ಬಳಸುವುದು: ಹೆಚ್ಚಿನ ಜನರು ಮೇಕಪ್ ಸಾಧನಗಳು ಖಾಲಿಯಾಗಿಲ್ಲ ಅಂತ ಅದರ ಕಾಲಾವಧಿ ಮುಗಿದು ಹೋಗಿದ್ದರೂ ಅದನ್ನೇ ಬಳಸುತ್ತಿರುತ್ತಾರೆ. ಈ ರೀತಿ ಮಾಡಿದರೆ ತ್ವಚೆಗೆ ಹಾನಿ ಉಂಟಾಗುವುದು.

6. ಕೈಯಿಂದ ಆಗಾಗ ಮುಖ ಮುಟ್ಟುತ್ತಾ ಇರುವುದು: ಇದೊಂದು ಅಭ್ಯಾಸ ಹೆಚ್ಚಿನ ಜನರಿಗೆ ಇರುತ್ತದೆ. ಮುಖದಲ್ಲಿ ಚಿಕ್ಕದಾಗಿ ಗುಳ್ಳೆಗಳು ಬಂದರೆ ಸಾಕು ಅದನ್ನು ಕಿತ್ತು ದೊಡ್ಡದಾಗಿ ಮಾಡುತ್ತಾರೆ. ಈ ಅಭ್ಯಾಸವಿದ್ದರೆ ಕೂಡಲೇ ನಿಲ್ಲಸಬೇಕು, ಇಲ್ಲದಿದ್ದರೆ ಮುಖದ ತುಂಬಾ ಕಲೆಗಳು ಉಂಟಾಗುವುದು.