ಎಲೆಕ್ಟ್ರಾಲಿಸಿಸ್ ನಂತರ ತ್ವಚೆ ಆರೈಕೆ

ಸ್ವಲ್ಪ ದುಬಾರಿಯಾಗಿರುವ ಈ ವಿಧಾನದಲ್ಲಿ ಬೇಡದ ಕೂದಲನ್ನು ಬುಡದಿಂದಲೆ ಕೀಳುವುದರಿಂದ ಬೇಡದ ಕೂದಲನ್ನು ಪದೇಪದೆ ತೆಗೆಯುವ ಕಿರಿಕಿರಿ ಇರುವುದಿಲ್ಲ. ಆದ್ದರಿಂದ ಈ ವಿಧಾನ ತುಂಬಾ ಜನಪ್ರಿಯವಾಗುತ್ತಿದೆ. ಆದರೆ ಈ ರೀತಿ ಮಾಡಿಸಿದ ಮೇಲೆ ಸ್ವಲ್ಪ ಮುನ್ನಚ್ಚರಿಕೆವಹಿಸದಿದ್ದರೆ ಕಪ್ಪು ಕಲೆಗಳು ಉಂಟಾಗುವುದು, ತ್ವಚೆ ಕೆಂಪಾಗುವುದು, ತುರಿತ ಮುಂತಾದ ಅಡ್ಡಪರಿಣಾಮ ಉಂಟಾಗುವುದು.

ಆದ್ದರಿಂದ ಎಲೆಕ್ಟ್ರಾಲಿಸಿಸ್ ಮಾಡಿಸಿದ ನಂತರ ಈ ಕೆಳಗಿನ ವಿಧಾನಗಳನ್ನು ಅನುಸರಿಸಿದರೆ ತ್ವಚೆಗೆ ಯಾವುದೆ ಹಾನಿ ಉಂಟಾಗುವುದಿಲ್ಲ.

1. ತುಂಬಾ ಕೆಮಿಕಲ್ ಇರುವ ಸೋಪ್ ಗಳನ್ನು ಬಳಸಬಾರದು. ಕೂದಲು ತೆಗೆದ ಜಾಗದಲ್ಲಿ ತುಂಬಾ ಹೊತ್ತು ಸೋಪಿನಿಂದ ಉಜ್ಜಬಾರದು.

2. ವೈದ್ಯರನ್ನು ಸಂಪರ್ಕಿಸಿ ಆಂಟಿಬೈಯೊಟಿಕ್ ಮಾತ್ರೆಯನ್ನು ಎಲೆಕ್ಟ್ರಾಲಿಸಿಸ್ ಮಾಡಿಸಿದ ದಿನ ತೆಗೆದುಕೊಳ್ಳಬೇಕು. ಈ ರೀತಿ ಮಾಡಿದರೆ ಯಾವುದೇ ರೀತಿಯ ತುರಿಕೆ, ಸೋಂಕು ಉಂಟಾಗುವುದಿಲ್ಲ.

3. ಚಿಕಿತ್ಸೆ ಮಾಡಿಸಿದ ದಿನ ಯಾವುದೇ ಕ್ರೀಮ್ ಅಥವಾ ಲೋಷನ್ ಹಚ್ಚಿಕೊಳ್ಳಬಾರದು.

4. ಚಿಕಿತ್ಸೆ ಮಾಡಿಸಿದ 24 ಗಂಟೆವರೆಗೆ ಮುಖಕ್ಕೆ ಮೇಕಪ್ ಮಾಡಬಾರದು.

5. ಆ ದಿನ ಈಜಲು ಹೋಗಬಾರದು (ಎರಡು ದಿನಗಳವರೆಗೆ ಕ್ಲೊರೀನ್ ನೀರು ಮುಟ್ಟದಿರುವುದು ಒಳ್ಳೆಯದು).

6. ಚಿಕಿತ್ಸೆ ಮಾಡಿಸಿದ ಜಾಗಕ್ಕೆ ಉಗುರು ತಾಗಿಸಬಾರದು.