ಪ್ರಾಚೀನ ಕಾಲದ ಬ್ಯೂಟಿ ಸೀಕ್ರೆಟ್ ಇಲ್ಲಿದೆ

ಮುಖದ ಹೊಳಪು ಹೆಚ್ಚಿಸಿಕೊಳ್ಳಲು ಕೆಮಿಕಲ್ ಮೊರೆ ಹೋಗುವ ಬದಲು ನೈಸರ್ಗಿಕ ದಾರಿ ಹಿಡಿದರೆ ಒಳ್ಳೆಯದು. ನೈಸರ್ಗಿಕ ವಿಧಾನ ಒಂದೇ ರಾತ್ರಿಯಲ್ಲಿ ಫಲಿತಾಂಶ ನೀಡದಿದ್ದರೂ ಉತ್ತಮ ಫಲಿತಾಂಶವಂತೂ ಗ್ಯಾರಂಟಿ. ಈ ವಿಧಾನವನ್ನು ನಿರಂತರವಾಗಿ ಅನುಸರಿಸಿದರೆ ಕೆಲವೇ ವಾರಗಳಲ್ಲಿ ಬದಲಾವಣೆಯನ್ನು ನೀವೇ ಕಂಡುಕೊಳ್ಳುತ್ತೀರ.

ಪ್ರಾಚೀನ ಕಾಲದಲ್ಲಿ ತ್ವಚೆ ಬಣ್ಣ ಕಾಪಾಡಲು ಬಳಸುತ್ತಿದ್ದ ನೈಸರ್ಗಿಕ ಸಾಧನ:

* ಅರಿಶಿಣದ ಕೊಂಬಿನೊಂದಿಗೆ ಕೆನೆ: ತ್ವಚೆಯ ಬಣ್ಣ ಬೆಳ್ಳಗಾಗಿಸುವುದರಲ್ಲಿ ಅರಿಶಿಣ ಹೆಚ್ಚು ಪರಿಣಾಮಕಾರಿ. ಅಂಗಡಿಗಳಲ್ಲಿ ದೊರೆಯುವ ಅರಿಶಿಣ ಪುಡಿಯ ಬದಲು ಅರಿಶಿಣದ ಕೊಂಬನ್ನು ಉಪಯೋಗಿಸಿ. ಮಿಕ್ಸಿಯಲ್ಲಿ ಕೆನೆಯೊಂದಿಗೆ ಅರಿಶಿಣದ ಕೊಂಬನ್ನು ರುಬ್ಬಿಕೊಂಡು ಅದಕ್ಕೆ ಸಮನಾಗಿ ಕಡಲೆ ಹಿಟ್ಟು ಬೆರೆಸಿ ಪೇಸ್ಟ್ ಮಾಡಿ ಮುಖಕ್ಕೆ ಹಚ್ಚಿಕೊಂಡು 10 ನಿಮಿಷ ಬಿಡಬೇಕು. ಈ ವಿಧಾನವನ್ನು ಅನುಸರಿಸಿದರೆ ಕ್ರಮೇಣ ತ್ವಚೆ ಬೆಳ್ಳಗಾಗುವುದರಲ್ಲಿ ಸಂಶಯವಿಲ್ಲ.

* ಬಾದಾಮಿ, ಜೇನು ಮಿಶ್ರಿತ ಸ್ಕ್ರಬ್: ತ್ವಚೆಯನ್ನು ಬೆಳ್ಳಗಾಗಿಸುವ ಅನೇಕ ಅಂಶವನ್ನು ಬಾದಾಮಿ ಹೊಂದಿದೆ. ನೀರಿನಲ್ಲಿ 10 ಬಾದಾಮಿಯನ್ನು ರಾತ್ರಿಯಿಡೀ ನೆನೆಹಾಕಿ ಬೆಳಗ್ಗೆ ಅದರ ಸಿಪ್ಪೆ ಬಿಡಿಸಿ ಪೇಸ್ಟ್ ಮಾಡಿಕೊಳ್ಳಬೇಕು. ಈ ಬಾದಾಮಿ ಪೇಸ್ಟನ್ನು ಒಂದು ಚಮಚ ಜೇನಿನೊಂದಿಗೆ ಬೆರೆಸಿ ಹಚ್ಚಿಕೊಂಡರೆ ಅತಿ ಬೇಗನೆ ಹೊಳೆಯುವ ಮತ್ತು ಬೆಳ್ಳನೆಯ ತ್ವಚೆ ನಿಮ್ಮದಾಗುತ್ತೆ.

* ಶ್ರೀಗಂಧದ ಲೇಪನ: ಪ್ರಾಚೀನ ಭಾರತೀಯ ಮಹಿಳೆಯರ ಸೌಂದರ್ಯದ ಗುಟ್ಟು ಶ್ರೀಗಂಧದಲ್ಲಿ ಅಡಗಿದೆ. ಶ್ರೀಗಂಧ ತ್ವಚೆಯನ್ನು ಬೆಳ್ಳಗೆ ಮಾಡುವುದಷ್ಟೇ ಅಲ್ಲ, ಮೃದುತ್ವ ನೀಡಿ ಅಲರ್ಜಿ, ಗುಳ್ಳೆಗಳಿಂದ ತ್ವಚೆಯನ್ನು ಕಾಪಾಡುತ್ತದೆ. ಶ್ರೀಗಂಧದ ಪುಡಿಗೆ ಒಂದು ಚಮಚ ನಿಂಬೆರಸ ಮತ್ತು ಟೊಮೆಟೊ ರಸ ಬೆರೆಸಿ ಹಚ್ಚಿಕೊಂಡರೆ ತ್ವಚೆ ನೈಸರ್ಗಿಕವಾಗಿ ಬೆಳ್ಳಗಾಗುತ್ತದೆ. ಹಿಂದಿನ ಕಾಲದಲ್ಲಿ ಮಹಿಳೆಯರು ಉಪಯೋಗಿಸುತ್ತಿದ್ದ ಸೌಂದರ್ಯ ವರ್ಧಕಗಳಲ್ಲಿ ಶ್ರೀಗಂಧದ್ದು ಮೊದಲ ಸ್ಥಾನ.

* ಕೇಸರಿ ಫೇಸ್ ಪ್ಯಾಕ್: ಕೇಸರಿ ಸ್ವಲ್ಪ ದುಬಾರಿ ಎನಿಸಿದರೂ ಅದನ್ನು ಸ್ವಲ್ಪವೇ ಬಳಸಿಕೊಳ್ಳುವುದರಿಂದ ತೊಂದರೆಯಿಲ್ಲ. ಕೇಸರಿಯನ್ನು ಮೊಸರು ಅಥವಾ ಹಾಲಿನಲ್ಲಿ ಬೆರೆಸಿ ಪೇಸ್ಟ್ ಮಾಡಿಕೊಂಡು ಮುಖಕ್ಕೆ ಹಚ್ಚಿಕೊಂಡು ಒಣಗಿದ ನಂತರ ಬಿಸಿ ನೀರಿನಲ್ಲಿ ಅದ್ದಿದ ಹತ್ತಿಯಿಂದ ಒರೆಸಿಕೊಳ್ಳಬೇಕು. ಹೀಗೆ ಮಾಡಿದರೆ ಸುಂದರ ಕಳಂಕರಹಿತ ತ್ವಚೆ ನಿಮ್ಮದಾಗುತ್ತದೆ.

ಈ ನೈಸರ್ಗಿಕ ವಿಧಾನಗಳನ್ನು ಕೆಲವು ವಾರ ತಪ್ಪದೇ ಅನುಸರಿಸಿದರೆ ಫಲಿತಾಂಶ ನಿಮಗೇ ಗೋಚರವಾಗುತ್ತದೆ.