ನಿರಂತರ ಸೌಂದರ್ಯದ ರಹಸ್ಯ ಇದರಲ್ಲಿದೆ ನೋಡಿ

Skin Care

oi-Staff

By Super

Published: Friday, March 30, 2012, 16:35 [IST]

ಬಹುತೇಕ ಭಾರತೀಯ ಅಡುಗೆಗಳಲ್ಲಿ ಅರಿಶಿಣದ ಬಳಕೆಯಾಗುತ್ತೆ. ಆಯುರ್ವೇದದ ಮೂಲ ಗಿಡಮೂಲಿಕೆ ಅರಿಶಿಣದಲ್ಲಿ ಅನೇಕ ಔಷಧೀಯ ಮತ್ತು ಸೌಂದರ್ಯವರ್ಧಕ ಗುಣಗಳಿವೆ ಎಂಬುದು ತಿಳಿದಿರುವ ಸಂಗತಿ. ಆದರೆ ಅರಿಶಿಣವನ್ನು ಸೌಂದರ್ಯ ವೃದ್ಧಿಗೆ ಬಳಕೆ ಮಾಡಬಹುದಾದ ಸುಲಭ ವಿಧಾನ ಯಾವುದು ಎಂದು ತಿಳಿಯಬೇಕಿದ್ದರೆ ಮುಂದೆ ನೋಡಿ.

ಮನೆಯಲ್ಲೇ ಒಂದಿಷ್ಟು ಬಿಡುವು ಸಿಕ್ಕಾಗ ಅರಿಶಿಣವನ್ನು ಸಮರ್ಥವಾಗಿ ತ್ವಚೆಗೆ ಬಳಸಿಕೊಂಡರೆ ಕಷ್ಟ ಪಡದೆಯೇ ನೈಸರ್ಗಿಕವಾಗಿ ತ್ವಚೆಯನ್ನು ದೀರ್ಘಕಾಲ ಬಾಳುವಂತೆ ನೋಡಿಕೊಳ್ಳಬಹುದು. ಅಷ್ಟೇ ಅಲ್ಲ, ಅನೇಕ ಚರ್ಮ ರೋಗಗಳನ್ನು ಅರಿಶಿಣದ ಬಳಕೆಯಿಂದ ದೂರವಿಡಬಹುದು.

1. ಶೀತ ಶಮನ: ಶೀತವಾದಾಗ ಹಾಲಿನೊಂದಿಗೆ ಸ್ವಲ್ಪ ಅರಿಶಿಣ ಬೆರೆಸಿ ಕುಡಿದರೆ ಶೀತ ಕಡಿಮೆಯಾಗುತ್ತದೆ.

2. ನಿಷ್ಕಳಂಕ ತ್ವಚೆ ಪಡೆಯಲು: ನಿಮ್ಮ ತ್ವಚೆಯಲ್ಲಿ ಏನೋ ಕೊರತೆ ಕಾಣುತ್ತಿದ್ದರೆ, ಹಳೆಯ ಕಲೆಗಳು ಹಾಗೆಯೇ ಉಳಿದಂತೆ ಕಂಡರೆ ಚಿಂತಿಸುವ ಅಗತ್ಯವಿಲ್ಲ. ಸೌತೆ ಕಾಯಿ ಮತ್ತು ನಿಂಬೆರಸದೊಂದಿಗೆ ಅರಿಶಿಣ ಬೆರೆಸಿ ಹಚ್ಚಿಕೊಂಡು 15 ನಿಮಿಷದ ನಂತರ ತೊಳೆದುಕೊಂಡರೆ ಕ್ರಮೇಣ ಫಲವನ್ನು ನೀವೇ ಕಾಣುತ್ತೀರ. ಆದರೆ ಫಲಿತಾಂಶ ಗೋಚರಿಸಬೇಕೆಂದರೆ ದಿನವೂ ಈ ವಿಧಾನವನ್ನು ಅನುಸರಿಸಬೇಕು.

3. ದೇಹಕ್ಕೆ ಒಳ್ಳೆ ಸ್ಕ್ರಬ್: ಅರಿಶಿಣ ದೇಹಕ್ಕೂ ಒಳ್ಳೆ ಸ್ಕ್ರಬ್. ಕಡಲೆ ಹಿಟ್ಟಿನೊಂದಿಗೆ ಅರಿಶಿಣ ಬೆರೆಸಿ ಹಚ್ಚಿಕೊಂಡರೆ ತ್ವಚೆ ಕ್ರಮೇಣ ಹೊಳಪು ಪಡೆದುಕೊಳ್ಳುತ್ತೆ. ಅಷ್ಟೇ ಅಲ್ಲ, ಚರ್ಮ ವ್ಯಾಧಿಗಳನ್ನೂ ದೂರವಿರಿಸುತ್ತೆ.

4. ಸುಕ್ಕು ತಡೆಯಲು: ಹಾಲಿನ ಕೆನೆಯೊಂದಿಗೆ ಸ್ವಲ್ಪ ಅರಿಶಿಣ ಬೆರೆಸಿ ಹಚ್ಚಿಕೊಂಡು 10 ನಿಮಿಷದ ನಂತರ ತೊಳೆದುಕೊಳ್ಳಬೇಕು. ಈ ವಿಧಾನವನ್ನು ಪ್ರತಿನಿತ್ಯ ಅನುಸರಿಸುತ್ತಾ ಬಂದರೆ ಸುಕ್ಕು ಬೇಗನೆ ಮೂಡುವುದನ್ನು ತಡೆಯಬಹುದು. ಆದರೆ ಈ ಲೇಪನವನ್ನು ಹಚ್ಚಿಕೊಂಡಾಗ ಯಾರೊಂದಿಗೂ ಮಾತನಾಡದೆ ಇದ್ದರೆ ಒಳಿತು. ಇದರಿಂದ ಮುಖದಲ್ಲಿ ಗೆರೆಗಳು ಮೂಡುವ ಸಾಧ್ಯತೆಯಿದೆ.