ಅಡುಗೆಮನೆಯಲ್ಲೇ ಇದೆ ನಿಮ್ಮ ಸೌಂದರ್ಯದ ಗುಟ್ಟು

Skin Care

oi-Staff

By Super

Published: Friday, March 30, 2012, 16:33 [IST]

ಸುಂದರ ತ್ವಚೆ ಪಡೆಯುವ ಆಸೆ ಎಲ್ಲರಿಗೂ ಇರುತ್ತೆ. ಆದರೆ ಇದೇ ಕಾರಣಕ್ಕೆ ಯಾವಾಗಲೂ ಪಾರ್ಲರ್ ಗಳಿಗೆ ಹೋಗಲೂ ಸಾಧ್ಯವಿಲ್ಲ. ಆದ್ದರಿಂದ ಹೊಳೆಯುವ ಮತ್ತು ಆರೋಗ್ಯಕರ ತ್ವಚೆ ಹೊಂದಲು ನಿಮ್ಮ ಅಡುಗೆ ಮನೆಯಲ್ಲೇ ಸಿಗುವ ಕೆಲವು ಸಾಮಗ್ರಿಗಳನ್ನು ಉಪಯೋಗಿಸಿಕೊಂಡರೆ ಸಾಕು.

ಅಡುಗೆ ಮನೆ ಸಾಮಾಗ್ರಿಯಿಂದ ಸುಂದರ ತ್ವಚೆ ಪಡೆಯುವುದು ಹೇಗೆ?

1. ಮೊಸರಿನೊಂದಿಗೆ ಟೊಮೆಟೊ ಮತ್ತು ಓಟ್ ಮೀಲ್ ಬೆರೆಸಿ ಮುಖಕ್ಕೆ ಹಚ್ಚಿಕೊಳ್ಳಬೇಕು. ಅದು ಒಣಗುವವರೆಗೂ ಕಾದು ನಂತರ ತೊಳೆದುಕೊಳ್ಳಬೇಕು. ಹೀಗೆ ವಾರಕ್ಕೆ ಎರಡು ಬಾರಿ ಮಾಡಿಕೊಂಡರೆ ನಿಮ್ಮ ಮುಖದ ಮೇಲೆ ಸೂರ್ಯನ ಕಿರಣಗಳಿಂದಾದ ಕಪ್ಪು ಹೋಗುತ್ತದೆ.

2. ಹಸಿ ಆಲೂಗಡ್ಡೆ ಹೋಳನ್ನು ಮುಖದ ಮೇಲೆ ಅರ್ಧ ಗಂಟೆ ಇಟ್ಟುಕೊಳ್ಳಿ. ಇದು ಕಪ್ಪು ಕಲೆ, ಚುಕ್ಕೆಗಳನ್ನು ಹೋಗಲಾಡಿಸುತ್ತದೆ. ಕಲೆ ಸಂಪೂರ್ಣವಾಗಿ ಹೋಗುವವರೆಗೂ ಈ ನಿಯಮ ಅನುಸರಿಸಬೇಕು.

3. ಒಂದು ಚಮಚ ಹಾಲಿನ ಪುಡಿಗೆ ಒಂದು ಚಮಚ ನಿಂಬೆರಸ ಸ್ವಲ್ಪ ಜೇನು ಬೆರೆಸಿ ಚೆನ್ನಾಗಿ ಕದಡಬೇಕು. ಇದಕ್ಕೆ ಬಾದಾಮಿ ಎಣ್ಣೆ ಬೆರೆಸಿ ಮತ್ತೆ ಕಲೆಸಿ ಮುಖಕ್ಕೆ ಹಚ್ಚಿಕೊಂಡು 20 ನಿಮಿಷದ ನಂತರ ತೊಳೆದುಕೊಂಡರೆ ಕ್ರಮೇಣ ಬದಲಾವಣೆ ನಿಮಗೇ ಗೋಚರಿಸುತ್ತದೆ.

4. ಒಂದು ಟೊಮೆಟೊವನ್ನು ಚೆನ್ನಾಗಿ ಹಿಸುಕಿ ಅದಕ್ಕೆ 6 ಹನಿ ನಿಂಬೆರಸ ಬೆರೆಸಿ ಈ ಮಿಶ್ರಣವನ್ನು ಹಚ್ಚಿಕೊಂಡು 20 ನಿಮಿಷ ಬಿಟ್ಟು ತೊಳೆದುಕೊಂಡರೆ ತಕ್ಷಣದ ಹೊಳಪು ನಿಮ್ಮದಾಗುತ್ತದೆ.

5. ಕೆಲವು ಬಾದಾಮಿಯನ್ನು ತೆಗೆದುಕೊಂಡು ಒಂದು ರಾತ್ರಿ ತಣ್ಣಗಿನ ನೀರಿನಲ್ಲಿ ನೆನೆಸಿಡಬೇಕು. ಬೆಳಗ್ಗೆ ಎದ್ದು ಅದನ್ನು ಪೇಸ್ಟ್ ಮಾಡಿ 20 ಮಿಲಿ ಜೇನನ್ನು ಬೆರೆಸಿ ಈ ಮಿಶ್ರಣವನ್ನು ಮುಖದ ಮೇಲೆ 30 ನಿಮಿಷ ಹಚ್ಚಿಕೊಳ್ಳಬೇಕು. ನಂತರ ತಣ್ಣಗಿನ ನೀರಿನಲ್ಲಿ ತೊಳೆದುಕೊಳ್ಳಬೇಕು. ಹೀಗೆ ಮಾಡಿದರೆ ಪಾರ್ಲರ್ ಗೆ ಹೋಗುವ ಅವಶ್ಯಕತೆ ಬರುವುದಿಲ್ಲ.