ಬಯಸಿ ಪಡೆಯಬಹುದಾದ ಸೌಂದರ್ಯ ಹೆಸರುಬೇಳೆಯಲ್ಲಿದೆ

ದೇಹಕ್ಕೆ ಮತ್ತು ತ್ವಚೆಗೆ ಹೆಸರು ಬೇಳೆಯಿಂದ ಯಾವ ರೀತಿ ಉಪಯೋಗ ಕಂಡುಕೊಳ್ಳಬಹುದು ಎಂಬುದನ್ನು ಇಲ್ಲಿ ತಿಳಿದುಕೊಳ್ಳಿ:

ಸೂಚನೆ: ಮೊದಲು ಹೆಸರುಬೇಳೆಯನ್ನು ಚೆನ್ನಾಗಿ ಪುಡಿ ಮಾಡಿಕೊಳ್ಳಬೇಕು. ಅದು ಇನ್ನೂ ತರಿತರಿಯಾಗಿದ್ದರೆ ಅದರೊಂದಿಗೆ ಕಾರ್ನ್ ಫ್ಲೋರ್ ಬೆರೆಸಿ ಪುಡಿ ಮಾಡಬೇಕು.

1. ತುಂಬಾ ಸೂಕ್ಷ್ಮ ತ್ವಚೆ ಹೊಂದಿರುವವರು ಹೆಸರು ಬೇಳೆಯ ಸ್ಕ್ರಬ್ ತಯಾರಿಸಿಕೊಳ್ಳಬಹುದು. ಹೆಸರು ಬೇಳೆಯ ಹಿಟ್ಟನ್ನು ಸ್ವಲ್ಪ ಜೇನಿನೊಂದಿಗೆ ಬೆರೆಸಿ ಮುಖಕ್ಕೆ ಮತ್ತು ದೇಹಕ್ಕೆ ಲೇಪಿಸಿಕೊಳ್ಳಬೇಕು. ಅದು ಒಣಗಿದ ನಂತರ ಬಿಸಿ ನೀರಿನಲ್ಲಿ ಹತ್ತಿಯನ್ನು ಅದ್ದಿ ಅದರಿಂದ ಪೂರ್ತಿ ಒರೆಸಿಕೊಳ್ಳಬೇಕು. ಸ್ನಾನಕ್ಕೆ ಮುಂಚೆ ಈ ರೀತಿ ಮಾಡಿಕೊಂಡರೆ ಉತ್ತಮ. ಇದರಿಂದ ದೇಹದ ಹೊಳಪು ಹೆಚ್ಚುತ್ತದೆ.

2. ಮನೆಯಲ್ಲೇ ತಯಾರಿಸಿದ ತುಪ್ಪದೊಂದಿಗೆ ಹೆಸರು ಬೇಳೆ ಹಿಟ್ಟನ್ನು ಬೆರೆಸಿ ಮೇಲ್ಮುಖವಾಗಿ ದೇಹಕ್ಕೆ ಮಸಾಜ್ ಮಾಡಬೇಕು. ತುಪ್ಪ ಚರ್ಮಕ್ಕೆ ಹೊಳಪು ನೀಡಿದರೆ ಹೆಸರಿನ ಹಿಟ್ಟು ಚರ್ಮದ ನಿರ್ಜೀವ ಕಣಗಳನ್ನು ಕಿತ್ತೊಗೆಯುತ್ತದೆ.

3. ಹೆಸರು ಬೇಳೆಯ ವಾಸನೆ ಸಹಿಸಲು ನಿಮಗೆ ಅಸಾಧ್ಯವೆನಿಸಿದರೆ ಅದರೊಂದಿಗೆ ರುಬ್ಬಿದ ಗುಲಾಬಿ ದಳ ಅಥವಾ ತುಳಸಿ ದಳವನ್ನು ಬೆರೆಸಿ ಹಚ್ಚಿಕೊಳ್ಳಬಹುದು. ಇದು ದೇಹವನ್ನು ಮೃದುಗೊಳಿಸುವುದರೊಂದಿಗೆ ದೇಹದ ದುರ್ವಾಸನೆಯನ್ನು ತೊಲಗಿಸುವ ನೈಸರ್ಗಿಕ ವಿಧಾನವಾಗಿದೆ.