ಟೊಮೊಟೊ ತಿನ್ನಿ, ತ್ವಚೆ ತಾಜಾ ಆಗಿರುತ್ತೆ

ಮ್ಯಾಂಚೆಸ್ಟರ್ ವಿಶ್ವವಿದ್ಯಾಲಯ ನಡೆಸಿದ ಸಂಶೋಧನೆಯಿಂದ ಈ ಅಂಶ ತಿಳಿದುಬಂದಿದೆ. ಪ್ರತಿನಿತ್ಯ 5 ಚಮಚದಷ್ಟು ಟೊಮೊಟೊ ರಸ ನಮ್ಮ ಆಹಾರದಲ್ಲಿದ್ದರೆ ಸಾಕು, ಅದು ಚರ್ಮವನ್ನು ಸೂರ್ಯನ ಯುವಿ ಕಿರಣಗಳ ವಿರುದ್ಧ ಹೋರಾಡಲು ಸಹಾಯ ಮಾಡುತ್ತದೆ ಎಂದು ತಿಳಿಸಿದೆ.

ಯುವಿ ಕಿರಣಗಳಿಂದ ಚರ್ಮ ಕಪ್ಪುಗಟ್ಟುವುದು ಮಾತ್ರವಲ್ಲ, ಇದರಿಂದ ಬೇಗನೆ ಸುಕ್ಕು ಮೂಡುವುದು ಮತ್ತು ಚರ್ಮ ಕ್ಯಾನ್ಸರ್ ನಂತರ ಗಂಭೀರ ತೊಂದರೆಗಳೂ ಕಾಣಿಸಿಕೊಳ್ಳುತ್ತವೆ. ಆದ್ದರಿಂದ ಟೊಮೊಟೊ ಪ್ರಮಾಣ ನಮ್ಮ ಆಹಾರದಲ್ಲಿ ಹೆಚ್ಚಿದ್ದರೆ ಅಂತಹ ತೊಂದರೆಗಳನ್ನು ನಿವಾರಿಸಬಹುದು ಎಂದು ಈ ಸಂಶೋಧನೆ ವರದಿ ಮಾಡಿದೆ.

ಟೊಮೊಟೊವನ್ನು ಬೇಯಿಸಿದಾಗ ಅದರಿಂದ ಹೆಚ್ಚಾಗಿ ದೊರೆಯುವ ಲೈಸೊಪೀನ್ ಎಂಬ ಅಂಶ ಚರ್ಮದ ರಕ್ಷಣೆಗೆ ಮುಂದಾಗುತ್ತದೆ ಎಂದು ಸಂಶೋಧನಾಕಾರರು ಕಂಡು ಹಿಡಿದಿದ್ದಾರೆ.

ಸಂಶೋಧನೆಯ ಅಂಗವಾಗಿ 3 ತಿಂಗಳ ಅವಧಿ 10 ಮಂದಿಗೆ ಪ್ರತಿನಿತ್ಯ 55ಗ್ರಾಂ ಟೊಮೊಟೊ ಪೇಸ್ಟ್ ಸೇವಿಸಲು ಹೇಳಲಾಯಿತು. ಇದರಿಂದ ಟೊಮೊಟೊ ಪೇಸ್ಟ್ ತಿಂದವರು ಚರ್ಮದ ರೋಗಗಳ ವಿರುದ್ಧ ಹೋರಾಡುವ ಶಕ್ತಿಯನ್ನು ಶೇ.33ರಷ್ಟು ಹೆಚ್ಚು ಗಳಿಸಿದ್ದಾಗಿ ವರದಿಯಾಗಿದೆ. ಹಾಗೆಯೇ ಚರ್ಮಕ್ಕೆ ಪೋಷಣೆ ನೀಡುವ ಪ್ರೊಕೊಲಾಗೆನ್ ಎಂಬ ಅಂಶ ಇವರಲ್ಲಿ ಏರಿಕೆಯಾಗಿದ್ದು ಕಂಡು ಬಂದಿದೆ.

ಆಹಾರದಲ್ಲಿ ಟೊಮೊಟೊ ಸೇವನೆ ಹೆಚ್ಚಿದ್ದಷ್ಟು ಚರ್ಮದಲ್ಲಿನ ಪ್ರೊಕೊಲಾಗೆನ್ ಅಂಶ ಹೆಚ್ಚಾಗಿ ಚರ್ಮವನ್ನು ಪೋಷಿಸುತ್ತದೆ, ಇದರಿಂದ ನಮ್ಮ ಚರ್ಮವನ್ನು ತಾಜಾ ಮತ್ತು ಆರೋಗ್ಯಕರವಾಗಿ ಇಟ್ಟುಕೊಳ್ಳಬಹುದು ಎಂದು ತಿಳಿದುಬಂದಿದೆ.