ಮೈನಡುಗಿಸುವ ಮೇಕಪ್ ಹಿಂದಿರುವ ಕರಾಳ ಸತ್ಯ!

Make Up

oi-Manohar

By Manohar Shetty

Updated: Wednesday, November 18, 2015, 10:48 [IST]

ಸೌಂದರ್ಯ ಎಂಬುದು ಹೆಣ್ಣಿಗೆ ಭೂಷಣ. ಅಲಂಕಾರ ಪ್ರಿಯಳೂ ಆಗಿರುವ ನಾರಿಯ ಸಹಜ ಸೌಂದರ್ಯವನ್ನು ಇಮ್ಮಡಿಗೊಳಿಸುವುದು ಸೌಂದರ್ಯ ಪ್ರಸಾಧನಗಳಾಗಿವೆ. ಕಣ್ಣಿಗೆ ಕಣ್ಣುಗಪ್ಪು, ತುಟಿಗೆ ತೆಳುವಾಗಿ ಲೇಪಿಸಿದ ಲಿಪ್‌ಸ್ಟಿಕ್, ಮುಖದಲ್ಲಿ ಮಿರುಗುವ ಕಾಂಪ್ಯಾಕ್ಟ್ ಮೆರುಗು, ಐ ಲ್ಯಾಶಸ್ ಹೀಗೆ ಆಧುನಿಕ ಸ್ತ್ರೀಯರ ಸೌಂದರ್ಯ ಸಾಧನಗಳ ಪಟ್ಟಿ ಬೆಳೆಯುತ್ತಾ ಹೋಗುತ್ತದೆ.

ಆದರೆ ಈ ಸಾಮಾಗ್ರಿಗಳು ಪರಿಣಾಮಕಾರಿಯಾದರು ಸಹ ಅಷ್ಟೇ ಅಪಾಯಕಾರಿ ಎಂಬುದನ್ನು ಮರೆಯಬಾರದು. ಸೌಂದರ್ಯವರ್ಧಕಗಳು ಸ್ತ್ರೀಯ ಅಂದವನ್ನು ಇಮ್ಮಡಿಗೊಳಿಸುತ್ತವೆ. ಆದರೆ ಅದೇ ಸಮಯದಲ್ಲಿ ಇವುಗಳಲ್ಲಿರುವ ಅಪಾಯಕಾರಿ ರಾಸಾಯನಿಕಗಳು ತ್ವಚೆಯ ಆರೋಗ್ಯವನ್ನು ಹಾಳು ಮಾಡುತ್ತವೆ. ಹಲವಾರು ಸೌಂದರ್ಯವರ್ಧಕಗಳು ಮತ್ತು ಮೇಕಪ್ ಉತ್ಪನ್ನಗಳು ತ್ವಚೆಯ ಮೇಲೆ ಘೋರ ಪರಿಣಾಮವನ್ನು ಉಂಟು ಮಾಡುತ್ತವೆಯೆಂದು ಅಧ್ಯಯನಗಳಿಂದ ಧೃಡಪಟ್ಟಿದೆ. ಮೇಕಪ್ ಕಿಟ್ ಅನ್ನು ವ್ಯವಸ್ಥಿತವಾಗಿರಿಸಲು ಟಾಪ್ ಸಲಹೆಗಳು

ಹೌದು ಇತ್ತೀಚಿನ ದಿನಗಳಲ್ಲಿ ಮೇಕಪ್ ಇಲ್ಲದೆ ಯಾರೂ ಕೂಡ ಹೊರ ಹೊರಡುವುದಿಲ್ಲ, ಯಾವುದೇ ಕಾರ್ಯಕ್ರಮ, ಅಥವಾ ಮದುವೆ ಸಮಾರಂಭಕ್ಕೆ ಹೋಗಬೇಕಾದರೂ ಕೂಡ ಸಾಕಷ್ಟು ಬಾರಿ ಕನ್ನಡಿ ಮುಂದೆ ನಿಂತು ಮೇಕಪ್‌ನ ಮೊರೆಹೋಗುತ್ತಾರೆ, ಅದರಲ್ಲೂ ಹುಡುಗಿಯರಂತೂ ಕೇಳುವುದೇಬೇಡ, ಆದರೆ ಇದರ ಪರಿಣಾಮ ಮಾತ್ರ ನೇರವಾಗಿ ನಿಮ್ಮ ತ್ವಚೆ ಹಾಗೂ ಆರೋಗ್ಯದ ಮೇಲೆ ಬೀಳುತ್ತದೆ. ಮೇಕಪ್ ಕುರಿತು ಸರಿಯಾದ ಕಾಳಜಿವಹಿಸದಿದ್ದರೆ ಈ ಸಂಗಾತಿಯೇ ನಿಮ್ಮ ಶತ್ರು ಆಗುವುದರಲ್ಲಿ ಸಂಶಯವಿಲ್ಲ! ಅದಕ್ಕಾಗಿ ನಾವು ಇಲ್ಲಿ ನಿಮಗಾಗಿ ನಿಮ್ಮ ತ್ವಚೆಗೆ ಹಾನಿಯುಂಟು ಮಾಡುವ ಸೌಂದರ್ಯವರ್ಧಕಗಳ ಮತ್ತು ಮೇಕಪ್ ಉತ್ಪನ್ನಗಳ ಪಟ್ಟಿಯನ್ನು ನೀಡಿದ್ದೇವೆ, ಮುಂದೆ ಓದಿ...

ಕಾಡಿಗೆ

ಕಾಡಿಗೆಯು ಕಣ್ಣಿನ ಮೇಲೆ ಹಲವಾರು ಅಡ್ಡ ಪರಿಣಾಮಗಳನ್ನುಂಟು ಮಾಡುತ್ತದೆ. ಉದಾಹರಣೆಗೆ ಇದು ಕಣ್ಣಿನಲ್ಲಿ ರಾಸಾಯನಿಕ, ವಿಷಕಾರಿ ಮತ್ತು ನಂಜುಕಾರಕ ಸಂಯುಕ್ತಗಳ ಬೆಳವಣಿಗೆಗೆ ಕಾರಣವಾಗಿ, ಒಣ ಕಣ್ಣು ಉಂಟುಮಾಡುತ್ತದೆ ಮತ್ತು ಕಣ್ಣಿನ ಬಣ್ಣವನ್ನು ಕುಂದಿಸುತ್ತದೆ. ಹಾಗಾಗಿ ಕಾಜಲ್ ಮತ್ತು ಕಣ್ಣಿನ ಒಳಗೆ ಹೋಗುವ ಯಾವುದೇ ಸೌಂದರ್ಯವರ್ಧಕಗಳನ್ನು ಬಳಸುವುದನ್ನು ನಿಲ್ಲಿಸಿ.

ನೇಲ್ ಪಾಲಿಶ್

ಡಾರ್ಕ್ ನೇಲ್ ಪಾಲಿಶ್‍ಗಳು ನಿಮ್ಮ ಉಗುರುಗಳನ್ನು ಹಳದಿ ಬಣ್ಣಕ್ಕೆ ತಿರುಗುವಂತೆ ಮಾಡುತ್ತವೆ. ಮತ್ತೊಂದು ಅಂಶವೇನೆಂದರೆ ನಿಮ್ಮ ನೇಲ್ ಪಾಲಿಶ್‍ನಲ್ಲಿ ಅಸಿಟೋನ್ ಇದ್ದರೆ, ಅವುಗಳು ನಿಮ್ಮ ಉಗುರಿನ ಸಾಮರ್ಥ್ಯವನ್ನು ಕುಂಠಿತಗೊಳಿಸುತ್ತವೆ. ಅಸಿಟೋನ್ ಒಂದು ಅಪಾಯಕಾರಿ ರಾಸಾಯನಿಕವೆಂಬುದನ್ನು ಮರೆಯಬೇಡಿ.

ಟಾಲ್ಕಂ ಪೌಡರ್

ಟಾಲ್ಕಂ ಪೌಡರ್ ನಲ್ಲಿರುವ ಸಿಲಿಕೇಟ್ಸ್ ಟಾಲ್ಕ್‌ಗಳು ಕೇವಲ ಪ್ರಬಲವಾದ ಕಾರ್ಸಿನೊಜೆನ್‍ಗಳಷ್ಟೇ ಅಲ್ಲ, ಇವುಗಳು ಶ್ವಾಸಕೋಶದಲ್ಲಿ ಅಲರ್ಜಿಗಳನ್ನು ಮತ್ತು ಇನ್‍ಫೆಕ್ಷನ್ ಅನ್ನು ಉಂಟು ಮಾಡುತ್ತವೆ. ಟಾಲ್ಕಂ ಪೌಡರ್ ಬೆವರನ್ನು ನಿಯಂತ್ರಿಸಲು ನಮ್ಮ ದೇಹದಲ್ಲಿರುವ ತೇವಾಂಶವನ್ನು ಹೀರಿಕೊಳ್ಳುತ್ತದೆ. ಆದರೆ ಹೀಗೆ ಹೀರಿಕೊಳ್ಳುವುದರಿಂದ ನಮ್ಮ ಚರ್ಮಕ್ಕೆ ಮತ್ತಷ್ಟು ಹಾನಿಯುಂಟಾಗುತ್ತದೆ.

ಹೇರ್ ಕಲರ್ ಮತ್ತು ಹೇರ್‌ಡೈಗಳು

ನಿಮ್ಮ ಕೂದಲಿಗೆ ಬಣ್ಣವನ್ನು ಬಳಿದುಕೊಳ್ಳುವ ಮೊದಲು ಅವುಗಳಿಂದ ನಿಮ್ಮ ಕೂದಲಿನ ಮೇಲೆ ಉಂಟಾಗುವ ಅಲರ್ಜಿಯ ಪರಿಣಾಮಗಳ ಬಗ್ಗೆ ಮೊದಲು ಯೋಚಿಸಿ. ಇದರಿಂದ ಕೂದಲು ಉದುರುವಿಕೆ, ಕೂದಲು ಸುಟ್ಟು ಹೋಗುವುದು, ಒಡೆದ ಕೂದಲು, ಮುಖದ ಮೇಲೆ ಬಾವುಗಳುಂಟಾಗುವುದು, ಉಸಿರಾಟದ ತೊಂದರೆಗಳು ಉಂಟಾಗುವ ಸಾಧ್ಯತೆಗಳು ಇವೆ. ಹೇರ್ ಡೈಗಳಲ್ಲಿ ಹಲವಾರು ರಾಸಾಯನಿಕಗಳು ಇದ್ದು, ಅವುಗಳಿಂದ ಮಾನವನ ಆರೋಗ್ಯದ ಮೇಲೆ ಪ್ರತಿಕೂಲ ಪರಿಣಾಮಗಳುಂಟಾಗುತ್ತವೆಯೆಂದು ತಿಳಿದು ಬಂದಿದೆ.

ಡಿಯೋಡ್ರೆಂಟ್
ವೈಜ್ಞಾನಿ ಅಧ್ಯಯನಗಳ ಪ್ರಕಾರ ಡಿಯೋಡ್ರೆಂಟ್‌ಗಳಲ್ಲಿರುವ ಅಂಶಗಳು ನಿಮ್ಮ ತ್ವಚೆ ಮತ್ತು ದೇಹಕ್ಕೆ ಹಾನಿಯುಂಟು ಮಾಡುತ್ತವೆ. ಎಲ್ಲರಿಗು ತಿಳಿದ ವಿಚಾರವೇನೆಂದರೆ ಡಿಯೋಡ್ರೆಂಟ್‌‌ಗಳು ಚರ್ಮದಲ್ಲಿ ತುರಿಕೆಯನ್ನುಂಟು ಮಾಡುತ್ತವೆ (ಏಕೆಂದರೆ ಇವುಗಳಲ್ಲಿ ಆಲ್ಕೋಹಾಲ್ ಇರುತ್ತದೆ) ಮತ್ತು ಕೆಂಪಗೆ ಗುಳ್ಳೆಗಳನ್ನುಂಟು ಮಾಡುತ್ತವೆ. ಇದು ತುರಿಕೆಯನ್ನು ಹೆಚ್ಚು ಮಾಡಿ, ಕೊನೆಗೆ ಚರ್ಮದ ಬುಡದವರೆಗೆ ತುರಿಕೆ ಹಬ್ಬುವಂತೆ ಮಾಡುತ್ತವೆ.

ಸುಗಂಧ ದ್ರವ್ಯಗಳು
ಸೌಂದರ್ಯವರ್ಧಕಗಳಲ್ಲಿ ಅಪಾಯಕಾರಿ ರಾಸಾಯನಿಕಗಳು ಇವೆ ಎಂದು ತಿಳಿದುಕೊಳ್ಳುವುದು ಅತ್ಯಂತ ಅವಶ್ಯಕ. ಸುಗಂಧ ದ್ರವ್ಯದಲ್ಲಿ ಸಹ ರಾಸಾಯನಿಕಗಳು ಇವೆ. ಈ ಸುಗಂಧ ದ್ರವ್ಯಗಳು ಫ್ಯಾಬ್ರಿಕ್ ಸಾಫ್ಟನರ್ಸ್, ಲಾಂಡ್ರಿ ಡಿಟರ್ಜೆಂಟ್‍ಗಳು, ಪರ್ಸನಲ್ ಕೇರ್ ಉತ್ಪನ್ನಗಳು, ಪರ್ಫ್ಯೂಮ್ಸ್, ಏರ್ ಫ್ರೆಶ್‍ನರ್ಸ್ ಮತ್ತು ಇನ್ನಿತರ ಉತ್ಪನ್ನಗಳು ಆರೋಗ್ಯ ಮತ್ತು ಪರಿಸರದ ಸಮಸ್ಯೆಗಳಿಗೆ ತಮ್ಮ ಕೊಡುಗೆಯನ್ನು ನೀಡುತ್ತವೆ..!