ಬಿಳಿ ಸೀರೆ ಆಕರ್ಷಕವಾಗಿ ಉಡುವ ರೀತಿ ಗೊತ್ತಿದೆಯೇ?

ಬಿಳಿ ಅನ್ನುವುದು ಶುಭದ ಸೂಚಕ. ಆದರೆ ಮದುವೆಯಾದ ಬಳಿಕ ಬಿಳಿ ಸೀರೆ ಧರಿಸಲು ಹೆಚ್ಚಿನವರು ಇಷ್ಟಪಡುವುದಿಲ್ಲ. ಗಂಡನಿದ್ದರೆ ಬಿಳಿ ಸೀರೆ ಕಟ್ಟಬಾರದೆಂದು ಹಿರಿಯರ ಕಟ್ಟಪ್ಪಣೆ ಇರುತ್ತದೆ. ಆದರೆ ಆಕರ್ಷಕ ವಿನ್ಯಾಸ ಹೊಂದಿರುವ ಶುಭ್ರವಾದ ಬಿಳಿ ಸೀರೆಯನ್ನು ನೋಡುವಾಗ ಪ್ರತಿ ಹೆಣ್ಣಿನ ಮನಸ್ಸು ಶ್ವೇತಾಂಬರಿಯಾಗಿ ಕಾಣಲು ಇಷ್ಟಪಡುತ್ತದೆ. ಮುತ್ತೈದೆಯರು ಬರೀ ಬಿಳಿ ಸೀರೆ ಉಡಬಾರದು, ಆದರೆ ವಿನ್ಯಾಸವನ್ನು ಹೊಂದಿರುವ ಸೀರೆಯನ್ನು ಧರಿಸಬಹುದಾಗಿದೆ. ಬಿಳಿ ಸೀರೆಯನ್ನು ಉಡುವ ಕಲೆ ಗೊತ್ತಿರಬೇಕು. ಇಲ್ಲದಿದ್ದರೆ ನರ್ಸ್ ಗಳನ್ನು ನೋಡಿದಂತೆ ಕಾಣುವುದು. ಹಾಗಾದರೆ ಶ್ವೇತ ಸುಂದರಿಯಾಗಿ ಕಾಣಲು ಏನು ಮಾಡಬೇಕು ಎಂದು ತಿಳಿಯಲು ಮುಂದೆ ಓದಿ.

1. ಬಿಳಿ ಮತ್ತು ಚಿನ್ನದ ಬಣ್ಣ: ಬಿಳಿ ಮತ್ತು ಗೋಲ್ಡನ್ ಬಣ್ಣ ಮಿಶ್ರವಿದ್ದರೆ ಸೀರೆ ಅಂದವಾಗಿ ಕಾಣುವುದು ಮಾತ್ರವಲ್ಲ, ನಾರಿಯ ಅಂದ ಹೆಚ್ಚುವುದು. ಬಿಳಿ ಬಣ್ಣದ ಕಾಟನ್ ಸೀರೆಯಲ್ಲಿ, ಗೋಲ್ಡನ್ ವಿನ್ಯಾಸವಿರುವ ಸೀರೆ ಹೆಚ್ಚಾಗಿ ಕೇರಳದವರ ಸಾಂಪ್ರದಾಯಕವಾದ ಉಡುಗೆಯಾಗಿದೆ. ಈ ಸೀರೆ ಉಡುವಾಗ ಅದಕ್ಕೆ ಕೆಂಪು ಅಥವಾ ಅದೇ ಬಣ್ಣದ ಬ್ಲೌಸ್ ಉತ್ತಮವಾದ ಮ್ಯಾಚಿಂಗ್ ಆಗಿದೆ. ಈ ರೀತಿ ಸೀರೆ ಉಟ್ಟು ಚಿನ್ನದ ಆಭರಣ ಧರಿಸಿದರೆ ಮತ್ತಷ್ಟು ಆಕರ್ಷಕವಾಗಿ ಕಾಣುವುದು.

2. ಬಿಳಿ ಬಣ್ಣದ ಶಿಫೋನ್ ಸೀರೆ: ತೆಳು ಬಣ್ಣದ ಶಿಪೋನ್ ಸೀರೆ ತುಂಬಾ ಫ್ಯಾಷನೇಬಲ್ ಆಗಿರುತ್ತದೆ. ಈ ರೀತಿ ರೀತಿ ಸ್ಯಾರಿ ಧರಿಸಿದರೆ ಸರಳವಾದ ಆಭರಣಗಳನ್ನು ಧರಿಸಬೇಕು. ಈ ಸೀರೆ ಯುವತಿಯರಿಗೆ ಹೆಚ್ಚು ಆಕರ್ಷಕವಾಗಿ ಕಾಣುವುದು. ಈ ಸೀರೆ ಉಟ್ಟು ಕೂದಲನ್ನು ಸಡಿಲವಾಗಿ ಬಿಟ್ಟು ಸರಳವಾದ ಅಲಂಕಾರ ಮಾಡಿದರೆ , ಸೀರೆ ಮತ್ತು ಮೇಕಪ್ ನಿಮ್ಮ ಚೆಲುವನ್ನು ಇಮ್ಮಡಿಸುತ್ತದೆ.

3. ಬಿಳಿ ಮತ್ತು ಕಪ್ಪು: ಬಿಳಿ ಮತ್ತು ಕಪ್ಪು ತುಂಬಾ ಒಳ್ಳೆಯ ಕಾಂಬಿನೇಷನ್ ಆಗಿದೆ. ಬಿಳಿ ಬಣ್ಣದ ಸೀರೆಗೆ ಕಪ್ಪು ಬಣ್ಣದ ಬ್ಲೌಸ್ ಧರಿಸಿದರೆ ತುಂಬಾ ಆಕರ್ಷಕವಾಗಿ ಮತ್ತು ಸಾಂಪ್ರದಾಯಕವಗಿ ಕಾಣಬಹುದು. ಬ್ಲೌಸ್ ಅನ್ನು ಮೆಗಾ ಸ್ಲೀವ್ ಬ್ಲೌಸ್ ಆಗಿ ಅಥವಾ ಮೊಣ ಕೈ ಉದ್ದವಿರುವ ಬ್ಲೌಸ್ ಕೂಡ ಧರಿಸಬಹುದು. ಈ ರೀತಿ ಸೀರೆ ಉಟ್ಟಾಗ ಸಾಂಪ್ರದಾಯಕವಾಗಿ ಅಲಂಕಾರ ಮಾಡಬೇಕು.

4. ಬಿಳಿ, ಗೋಲ್ಡನ್ ಮತ್ತು ಹಸಿರು: ಬಿಳಿ ಸೀರೆಯಲ್ಲಿ ಹಸಿರು ಬಾರ್ಡರ್ ಮತ್ತು ಗೋಲ್ಡನ್ ವಿನ್ಯಾಸವಿರುವ ಬ್ಲೌಸ್ ಧರಿಸಿ, ಸಾಂಪ್ರದಾಯಕವಾಗಿ ಅಲಂಕಾರ ಮಾಡಿದರೆ ಶ್ವೇತ ಸುಂದರಿಯಾಗಿ ಕಾಣಬಹುದು.

ಬಿಳಿ ಸೀರೆ ಎಲ್ಲಾ ರೀತಿಯ ಮೈ ಬಣ್ಣದವರಿಗೆ ಒಪ್ಪುವುದರಿಂದ, ಆಕರ್ಷಕ ವಿನ್ಯಾಸದ ಬಿಳಿ ಸೀರೆ ಮಹಿಳೆಯ ಚೆಲುವನ್ನು ಮತ್ತಷ್ಟು ಹೆಚ್ಚು ಮಾಡುತ್ತದೆ.