ಕಡು ಕೆಂಪಿನ ಮೆಹಂದಿ ಬಣ್ಣಕ್ಕಾಗಿ 6 ಸಲಹೆಗಳು

ಕೈಗೆ ಮೆಹಂದಿ ಹಚ್ಚುವುದು ಎಂದರೆ ಹೆಚ್ಚಿನ ಹೆಣ್ಣು ಮಕ್ಕಳಿಗೆ ತುಂಬಾ ಇಷ್ಟವಾಗುವುದು. ಅಲ್ಲದೆ ಮದುವೆ ಸಮಾರಂಭಗಳಲ್ಲಿ ಮೆಹಂದಿ ಹಚ್ಚುವುದು ನಮ್ಮ ಸಂಪ್ರದಾಯ ಕೂಡ. ಮದುವೆಯ ಹಿಂದಿನ ದಿನ ಮೆಹಂದಿ ಶಾಸ್ತ್ರ ಅಂತ ಮಾಡಲಾಗುವುದು. ಮದು ಮಗಳು ಅಂದ ಮೇಲೆ ಅವಳ ಕೈಯಲ್ಲಿ ಮೆಹಂದಿಯ ಅಲಂಕಾರ ಇದ್ದರೆ ಮಾತ್ರ ನೋಡಲು ಆಕರ್ಷಣೆ.

ಅದಲ್ಲದೆ ಹಬ್ಬಗಳ ಸಮಯದಲ್ಲಿ, ಫ್ರೆಂಡ್ಸ್ ಮದುವೆಗೆ ಹೋಗುವಾಗ ಕೈಗೆ ಮೆಹಂದಿ ಅಲಂಕಾರ ಮಾಡಿಕೊಳ್ಳುತ್ತೇವೆ. ಆದರೆ ಹೀಗೆ ಮೆಹಂದಿ ಹಚ್ಚಿದಾಗ ಮೆಹಂದಿಯ ಬಣ್ಣ ಸರಿಯಾಗಿ ಕೈಗೆ ಹಿಡಿಯದಿದ್ದರೆ ಕೈ ಆಕರ್ಷಕವಾಗಿ ಕಾಣುವುದಿಲ್ಲ. ಕಡು ಕೆಂಪು ಬಣ್ಣ ಪಡೆದರೆ ಮಾತ್ರ ಆಕರ್ಷಕವಾಗಿ ಕಾಣುವುದು. ಮೆಹಂದಿಯಿಂದ ಬರೆದ ಆಕರ್ಷಕವಾದ ವಿನ್ಯಾಸ ಕಡು ಕೆಂಪಾಗಿ ಕಾಣಲು ಈ ಕೆಳಗಿನ ಸಲಹೆಗಳನ್ನು ಪಾಲಿಸಬಹುದು:

1. ಮೆಹಂದಿ ಎಲೆ ಅಥವಾ ಮೆಹಂದಿ ಪುಡಿಯನ್ನು ಟೀಯಲ್ಲಿ ಹಾಕಿ ಒಂದು ರಾತ್ರಿಯಿಟ್ಟು ಮಾರನೇಯ ದಿನ ಹಾಕಿದರೆ ಮೆಹಂದಿ ಕೈಯಲ್ಲಿ ಚೆನ್ನಾಗಿ ಹಿಡಿದು ನೋಡಲು ತುಂಬಾ ಆಕರ್ಷಕವಾಗಿ ಕಾಣುತ್ತದೆ.

2. ಮೆಹಂದಿಯ ಬಣ್ಣ ಕಾಫಿ ಬ್ರೌನ್ ಕಲರ್ ಬರಬೇಕೆಂದರೆ ಮೆಹಂದಿ ಪುಡಿ ಜೊತೆ ಸ್ವಲ್ಪ ಕಾಫಿ ಪುಡಿ ಹಾಕಿ ಒಂದು ರಾತ್ರಿಯಿಟ್ಟು ಮಾರನೆಯ ದಿನ ಬೆಳಗ್ಗೆ ಇಟ್ಟರೆ ಸಾಕು.

3. ನಿಂಬೆರಸ ಹಾಗೂ ಸಕ್ಕರೆಯನ್ನು ಹಾಕಿ ಸಿರಪ್ ರೀತಿ ಮಾಡಿ ಅದನ್ನು ಮೆಹಂದಿ ಪುಡಿಗೆ ಹಾಕಿದರೆ ಮೆಹಂದಿ ಕೈಗೆ ಹಾಕಿದಾಗ ಬೇಗನೆ ಕೆಂಪಾಗುತ್ತದೆ.

4. ಮೆಹಂದಿ ಹಾಕಿ ಕೈಯಲ್ಲಿ 2 ಗಂಟೆಗಳವರೆಗೆ ಇಟ್ಟರೆ ಸಾಕು, ಮೆಹಂದಿ ಒಣಗುವಾಗ ಸ್ವಲ್ಪ ನಿಂಬೆ ರಸ ಹಿಂಡಿದರೆ ಸಾಕು. ಈ ರೀತಿ ಮಾಡಿದರೆ ಮೆಹಂದಿ ಬಣ್ಣ ಚೆನ್ನಾಗಿ ಕೈಗೆ ಹಿಡಿಯುತ್ತದೆ.

5. ಕೈಗೆ ನೋವು ನಿವಾರಕ ಕ್ರೀಮ್ ಹಚ್ಚಿ ನಂತರ ಮೆಹಂದಿ ಹಚ್ಚಿದರೆ ಕೈ ತುಂಬಾ ಕೆಂಪಗಾಗುತ್ತದೆ.

6. ಮೆಹಂದಿ ಹಚ್ಚಿ ತೊಳೆದ ನಂತರ ಕೈಗೆ ಕೊಬ್ಬರಿ ಎಣ್ಣೆ ಹಚ್ಚಿದರೆ ಮೆಹಂದಿಯ ಬಣ್ಣ ಮತ್ತಷ್ಟು ಕೆಂಪಾಗಿ ಆಕರ್ಷಕವಾಗಿ ಕಾಣುವುದು.