ತುಟಿಗೆ ಮಾತ್ರವಲ್ಲ, ಮುಖದ ಮೇಕಪ್‌ಗೂ ಲಿಪ್‌ಸ್ಟಿಕ್‌!

ತುಟಿಯ ಅಂದ ಹೆಚ್ಚಿಸಲು ಲಿಪ್‌ಸ್ಟಿಕ್‌ ಬಳಸುವುದು ಸಹಜ. ಮುಖಕ್ಕೆ ಕ್ರೀಮ್, ಬ್ಲಷರ್ , ಬಿಂದಿ ಅಂತ ಹಾಕಿ ಮೇಕಪ್ ಪೂರ್ಣವಾದ ಮೇಲೆ ಲಿಪ್‌ಸ್ಟಿಕ್‌ ಟಚ್ ಕೊಡುತ್ತೇವೆ. ಮೇಕಪ್ ಮಾಡಿ ಲಿಪ್‌ಸ್ಟಿಕ್‌ ಹಾಕದೇ ಹೋದರೂ ನಡೆಯುತ್ತೆ. ಆದರೆ ಲಿಪ್‌ಸ್ಟಿಕ್‌ ಹಾಕಿ ಮೇಕಪ್ ಮಾಡದಿದ್ದರೆ ಮುಖದಲ್ಲಿ ಮೇಕಪ್ ಅಪೂರ್ಣವಾದಂತೆ ಕಾಣುವುದು.

ಕೆಲವೊಮ್ಮೆ ಪಾರ್ಟಿಗೆ ಅಂತ ದೂರದ ಸಂಬಂಧಿಕರಲ್ಲಿಗೆ ಹೋಗಿರುತ್ತೇವೆ. ಆದರೆ ಮೇಕಪ್ ಸಾಧನಗಳಾದ ಬ್ಲಷರ್, ಬಿಂದಿಯೆಲ್ಲಾ ತರುವುದಕ್ಕೆ ಮರೆತು ಹೋಗಿರುತ್ತದೆ, ಬ್ಯಾಗಿನಲ್ಲಿ ಲಿಪ್‌ಸ್ಟಿಕ್‌ ಮಾತ್ರ ಇರುತ್ತದೆ. ಈ ಸಮಯದಲ್ಲಿ ಅಯ್ಯೋ ಮೇಕಪ್ ಇಲ್ಲದೆ ಹೇಗಪ್ಪಾ ಪಾರ್ಟಿಗೆ ಹೋಗುವುದು ಅಂತ ಚಿಂತಿಸಬೇಡಿ. ಏಕೆಂದರೆ ಲಿಪ್‌ಸ್ಟಿಕ್‌ ಒಂದಿದ್ದರೆ ಸಾಕು, ಮುಖದ ಅಂದ ಹೆಚ್ಚಿಸಬಹುದು. ಅದು ಹೇಗೆ ಎಂದು ತಿಳಿಯಲು ಮುಂದೆ ಓದಿ.

1. ಬ್ಲಷರ್: ಸಂಬಂಧಿಕರ ಮನೆಗೆ ಪಾರ್ಟಿಗೆ, ಅವರ ಮನೆಯಲ್ಲಿ ಹೋಗಿ ಮೇಕಪ್ ಮಾಡುವ ಅಂತ ಬೇಗನೆ ಹೊರಟು ಬಂದಿರುತ್ತೀರಿ. ಆದರೆ ಅಲ್ಲಿ ಹೋಗಿ ಮೇಕಪ್ ಬಾಕ್ಸ್ ನೋಡುವಾಗ ಬ್ಲಷರ್ ತಂದಿಲ್ಲ ಅಂತ ಗೊತ್ತಾಗುತ್ತದೆ. ಈ ಸಂದರ್ಭದಲ್ಲಿ ಬ್ಲಷರ್ ಇಲ್ಲದೆ , ಲಿಪ್‌ಸ್ಟಿಕ್‌ನಿಂದ ಬ್ಲಷರ್ ಲುಕ್ ಕೊಡಬಹುದು. ಅದಕ್ಕಾಗಿ ಲಿಪ್‌ಸ್ಟಿಕ್‌‌ ಅನ್ನು ಹೆಬ್ಬೆರಳಿಗೆ ತೆಳುವಾಗಿ ಉಜ್ಜಿ , ಅದನ್ನು ಕೆನ್ನೆಗೆ ಉಜ್ಜಬೇಕು. ಈ ರೀತಿ ಮಾಡಿದರೆ ಕೆನ್ನೆ ಬ್ಲಷರ್ ಹಾಕಿದ ಚೆಲುವನ್ನು ಪಡೆಯುವುದು.

2. ಐ ಶ್ಯಾಡೊ: ಲಿಪ್ ಸ್ಟಿಕ್ ಅನ್ನು ಐ ಶ್ಯಾಡೊ ಆಗಿ ಕೂಡ ಬಳಸಬಹುದು. ಈ ರೀತಿ ಬಳಸುವಾಗ ಮೊದಲು ನ್ಯೂಡ್ ಕಲರ್ ಲಿಪ್‌ಸ್ಟಿಕ್‌ ಅನ್ನು ಮೊದಲು ಹಚ್ಚಿ , ನಂತರ ತೆಳು ಕೆಂಪು ಅಥವಾ ಕಂದು ಬಣ್ಣದ ಲಿಪ್‌ಸ್ಟಿಕ್‌‌ ಅನ್ನು ಐ ಶ್ಯಾಡೊವಾಗಿ ಬಳಸಬಹುದು.

3. ಬಿಂದಿ: ಲಿಪ್‌ಸ್ಟಿಕ್‌‌ ಹಚ್ಚಿ ಅದೇ ಬಣ್ಣದ ಬಿಂದಿ ಹಚ್ಚಿದರೆ ತುಂಬಾ ಆಕರ್ಷಕವಾಗಿ ಕಾಣುವುದು. ಲಿಪ್‌ಸ್ಟಿಕ್‌ನಿಂದ ಚುಕ್ಕಿ ಹಾಕಬಹುದೇ ಹೊರತು, ಅದರಿಂದ ವಿನ್ಯಾಸ ಮಾಡಲು ಹೋಗಬಾರದು.

4. ಬಿಳಿ ಕೂದಲನ್ನು ಮರೆಮಾಚಲು: ಪಾರ್ಟಿಗೆ ಹೋಗಬೇಕೆಂದು ಅಲಂಕಾರ ಮುಗಿಸಿ ಕನ್ನಡಿ ಮುಂದೆ ನಿಂತಾಗ ಬಿಳಿ ಕೂದಲೊಂದು ಮಿಂಚುತ್ತಿದ್ದರೆ ನಿರಾಸೆ ಆಗುತ್ತದೆ. ಹಾಗಂತ ಆ ಕೂದಲನ್ನು ಕೀಳಬೇಡಿ, ಅದರ ಬದಲು ಕಂದು ಬಣ್ಣದ ಲಿಪ್‌ಸ್ಟಿಕ್‌ ನಿಂದ ಆ ಕೂದಲನ್ನು ಉಜ್ಜಿದರೆ ಸಾಕು ಬಿಳಿ ಕೂದಲು ಮರೆಮಾಚುವುದು.