ಸುಂದರವಾಗಿರುವವರು ತುಂಬಾ ಸ್ವಾರ್ಥಿಗಳಂತೆ ಹೌದಾ!

Make Up

oi-Sumalatha N

By Sumalatha N

Published: Saturday, September 3, 2011, 17:58 [IST]

ನಿಮ್ಮ ಬಾಳ ಸಂಗಾತಿ ತುಂಬಾ ಸುಂದರವಾಗಿರಬೇಕು ಅಂತ ನೀವು ಕನಸು ಕಾಣುತ್ತಿದ್ದೀರಾ? ಹಾಗಾದರೆ ಇಲ್ಲೊಮ್ಮೆ ನೋಡಿ. ಇತ್ತೀಚೆಗೆ ನಡೆಸಿದ ಅಧ್ಯಯನವೊಂದು, ನೋಡಲು ತುಂಬಾ ಆಕರ್ಷಿತವಾಗಿದ್ದವರು ಅಷ್ಟೇ ಸ್ವಾರ್ಥಿಗಳಾಗಿರುತ್ತಾರೆ ಎಂಬ ಆಶ್ಚರ್ಯಕರವಾದ ಅಂಶವನ್ನು ತಿಳಿಸಿಕೊಟ್ಟಿದೆ.

ಅಂದಕ್ಕೂ, ಸ್ವಾರ್ಥಕ್ಕೂ ಎಲ್ಲಿಂದೆಲ್ಲಿಯ ಸಂಬಂಧ? ಇದೆಲ್ಲಾ ಹೇಗೆ ಸಾಧ್ಯ ಎಂದು ನೀವನ್ನಬಹುದು. ಆದ್ರೆ ಆಕರ್ಷಕ ಮುಖ ಚರ್ಯೆ ಮತ್ತು ಮೈಮಾಟ ಹೊಂದಿದ್ದವರು ಮಾಮೂಲಿ ಜನರಿಗಿಂತ ಸ್ವಲ್ಪ ಹೆಚ್ಚೇ ಸ್ವಾರ್ಥಿಗಳಾಗಿರುತ್ತಾರೆ ಎಂದು ಬಾರ್ಸೆಲೋನ ಮತ್ತು ಮ್ಯಾಡ್ರಿಡ್ ವಿಶ್ವವಿದ್ಯಾಲಯ ನಡೆಸಿದ ಸಂಶೋಧನೆ ಸಾಬೀತು ಪಡಿಸಿದೆಯಂತೆ.

ಸಾಮಾನ್ಯ ಮುಖಚರ್ಯೆ ಹೊಂದಿದವರಿಗೆ ಹೋಲಿಸಿದರೆ ತುಂಬಾ ಚೆಲುವಾಗಿದ್ದವರು ಕೇವಲ ತಮ್ಮ ಬಗ್ಗೆ, ತಮ್ಮ ಅಂದ ಚೆಂದದ ಬಗ್ಗೆ ಮತ್ತು ತಮ್ಮ ಒಡವೆ ವಸ್ತ್ರ, ತಮ್ಮ ಲುಕ್ ಬಗ್ಗೆ ಮಾತ್ರ ಹೆಚ್ಚು ಪ್ರಾಮುಖ್ಯತೆ ನೀಡುತ್ತಾರೆ, ಬೇರೆಯವರ ವಿಷಯಗಳತ್ತ ಗಮನ ಕೊಡುವುದು ಕಡಿಮೆ, ಅನ್ಯರೊಂದಿಗೆ ಬೆರೆಯುವುದೂ ಕಡಿಮೆ, ಬೆರತರೂ ಕೇವಲ ತಮಗೆ ಹೊಂದಿಕೊಳ್ಳುವಂತಿದ್ದರೆ ಮಾತ್ರ ಸ್ನೇಹ ಬೆಳೆಸುತ್ತಾರೆ ಎಂದಿದೆ. ಇನ್ನೊಂದು ಮುಖ್ಯ ವಿಷಯವೆಂದರೆ ಅತಿ ಸುಂದರವಾಗಿದ್ದವರು ಇನ್ನೊಬ್ಬರಿಂದ ಸಹಾಯವನ್ನೂ ಹೆಚ್ಚು ನಿರೀಕ್ಷಿಸುವುದಿಲ್ಲವಂತೆ.

ಅಧ್ಯಯನದಲ್ಲಿ ಸಂಶೋಧನಾಕಾರರು ನಡೆಸಿದ ಸರಳ ಪರೀಕ್ಷೆಯಿಂದ ಈ ಫಲಿತಾಂಶ ಹೊರಹೊಮ್ಮಿರುವುದಾಗಿ ಡೈಲಿ ಮೇಲ್ ವರದಿ ಮಾಡಿದೆ. ಹಾಗಾದರೆ ಇನ್ನು ಮುಂದೆ ನಿಮ್ಮ ಸಂಗಾತಿ ನೋಡಲು ಸುಂದರವಾಗಿರಬೇಕು ಎಂದು ಬಯಸುವುದಾದರೆ ಅವರ ಸ್ವಾರ್ಥ ಗುಣವನ್ನೂ ಸಹಿಸಿಕೊಳ್ಳುವ ಮನೋಸ್ಥಿತಿ ನಿಮ್ಮದಾಗಿರಬೇಕಂತೆ.