ನಿಮ್ಮ ಕೂದಲಿಗೆ ವಿಟಮಿನ್‌ ಸಿ ಬಳಸಿದರೆ ದೊರೆಯುತ್ತೆ ಈ ಪ್ರಯೋಜನಗಳು, ಬಳಸುವುದು ಹೇಗೆ?

ಉಸಿರಾಟದ ಸಮಸ್ಯೆಯಿಂದ ಬಳಲುತ್ತಿರುವವರಿಂದ ಹಿಡಿದು ಚರ್ಮದ ಆರೋಗ್ಯ ಕಾಪಾಡಿಕೊಳ್ಳುವವರೆಗೆ, ಮಕ್ಕಳಿಂದ ಹಿಡಿದು ಗರ್ಭಿಣಿಯರವೆಗೆ ವಿಟಮಿನ್​ ಸಿ ಎನ್ನುವುದು ಪ್ರತಿಯೊಬ್ಬರಿಗೂ ಬೇಕಾಗಿರುವ ಅಗತ್ಯ ಜೀವಸತ್ವಗಳ ಪಟ್ಟಿಯಲ್ಲಿ ಒಂದಾಗಿದೆ. ವಿಟಮಿನ್​ ಸಿ ಕೇವಲ ಆಹಾರ ಪದಾರ್ಥಗಳಲ್ಲಿ ಮಾತ್ರವಲ್ಲ ನೀವು ಬಳಸುವ ಸೌಂದರ್ಯವರ್ಧಕಗಳಲ್ಲಿಯೂ ಇರುತ್ತದೆ ಎಂದರೆ ನೀವು ನಂಬಲೇಬೇಕು..!

ಅಷ್ಟರ ಮಟ್ಟಿಗಿನ ವ್ಯಾಪ್ತಿಯನ್ನು ವಿಟಮಿನ್​ ಸಿ ಹೊಂದಿದೆ. ಕೂದಲಿನ ಆರೋಗ್ಯವನ್ನು ಕಾಪಾಡುವುದರಲ್ಲಿಯೂ ವಿಟಮಿನ್​ ಸಿ ಹಿಂದೆ ಬಿದ್ದಿಲ್ಲ. ಅಷ್ಟೇ ಏಕೆ ಗರ್ಭದಲ್ಲಿ ಬೆಳೆಯುತ್ತಿರುವ ಭ್ರೂಣದ ಬೆಳವಣಿಗೆಯಲ್ಲಿಯೂ ವಿಟಮಿನ್​ ಸಿ ಪಾತ್ರ ಮಹತ್ವವಾದದ್ದು. ಕೋವಿಡ್​ ಮಹಾಮಾರಿ ಬಂದ ಸಂದರ್ಭದಲ್ಲಿ ವಿಟಮಿನ್​ ಸಿ ಮನುಷ್ಯನಿಗೆ ಎಷ್ಟು ಅಗತ್ಯ ಎನ್ನುವುದು ಬಹುತೇಕ ಎಲ್ಲರ ಗಮನಕ್ಕೂ ಬಂದಿತ್ತು ಎಂದು ಹೇಳಿದರೆ ತಪ್ಪಾಗುವುದಿಲ್ಲ.

ದೇಹದ ಸಮಗ್ರ ಆರೋಗ್ಯಕ್ಕೆ ವಿಟಮಿನ್​ ಸಿ ಒಳ್ಳೆಯದು ಎಂಬುದನ್ನು ನಾವು ಅರಿತಿದ್ದೇವೆ. ಆದರೆ ನಮ್ಮ ಕೇಶರಾಶಿ ಸೊಂಪಾಗಿ ಬೆಳೆಯಲು ವಿಟಮಿನ್​ ಸಿ ಹೇಗೆ ಪಾತ್ರವಹಿಸುತ್ತದೆ..? ಎಂಬ ಪ್ರಶ್ನೆ ನಿಮ್ಮನ್ನು ಕಾಡಬಹುದು. ಈ ವಿಟಮಿನ್​ ಸಿಯಲ್ಲಿ ಅಡಕವಾಗಿರುವ ಯಾವ ಅಂಶವು ನಿಮ್ಮ ಕೂದಲನ್ನು ಸೊಂಪಾಗಿಸುತ್ತದೆ ಎಂಬುದನ್ನು ತಿಳಿದುಕೊಳ್ಳೋಣ.

ವಿಟಮಿನ್​ ಸಿ ಎನ್ನುವುದು ನಮ್ಮ ತ್ವಚೆಯ ಆರೋಗ್ಯ, ಕೂದಲಿನ ಆರೋಗ್ಯ ಅಷ್ಟೇ ಏಕೆ ನಮ್ಮ ನೆತ್ತಿಯ ಆರೋಗ್ಯವನ್ನು ಕಾಪಾಡುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ. ಒಂದು ರೀತಿಯಲ್ಲಿ ವಿಟಮಿನ್​ ಸಿಯನ್ನು ಸೂಪರ್​ ವಿಟಮಿನ್​ ಎಂದು ಕರೆಯಬಹುದಾಗಿದೆ. ಸೂರ್ಯನ ವಿಕಿರಣಗಳಿಂದ ಕೂದಲಿಗೆ ಆಗುವ ಹಾನಿ, ತೇವಾಂಶ ಕಳೆದುಕೊಂಡ ಕೂದಲು, ನೆತ್ತಿಯ ಆರೋಗ್ಯ ಸಮಸ್ಯೆ ಹೀಗೆ ನಾನಾ ಸಮಸ್ಯೆಗಳಿಗೆ ವಿಟಮಿನ್​ ಸಿ ಪರಿಹಾರ ನೀಡುತ್ತದೆ.

ವಿಟಮಿನ್​ ಸಿ ಯಾವೆಲ್ಲ ರೀತಿಯಲ್ಲಿ ಕೂದಲಿನ ಆರೋಗ್ಯ ಕಾಪಾಡುತ್ತದೆ ಎಂಬುದನ್ನು ತಿಳಿದುಕೊಳ್ಳೋಣ :
ಕೂದಲು ಬಲಪಡಿಸುವಿಕೆ : ಬಲವಾದ ಕೂದಲು ಹೊಂದಬೇಕು ಎಂದರೆ ಕಾಲೋಜಿನ್​ ಅಂಶ ಇರಬೇಕು. ವಿಟಮಿನ್​ ಸಿ ಈ ಕಾಲೋಜಿನ್​ ಅಂಶವನ್ನು ಬಲಪಡಿಸುವ ಸಾಮರ್ಥ್ಯ ಹೊಂದಿರುತ್ತದೆ. ಇದರಿಂದ ನಮ್ಮ ಕೇಶರಾಶಿ ದಟ್ಟವಾಗಿ ಬೆಳೆಯುತ್ತದೆ.

ನೆತ್ತಿಯ ಗಾಯ ವಾಸಿ : ಅನೇಕರಿಗೆ ತೇವಾಂಶಯುಕ್ತ ಹೊಟ್ಟಿನಿಂದಾಗಿ ನೆತ್ತಿಯಲ್ಲಿ ಗಾಯಗಳಾಗಿರುತ್ತದೆ. ಆದರೆ ವಿಟಮಿನ್​ ಸಿ ನೆತ್ತಿಗೆ ಸೂಕ್ತ ಶಕ್ತಿಯನ್ನು ಒದಗಿಸುವ ಮೂಲಕ ನೆತ್ತಿಯಲ್ಲಿ ಗಾಯಗಳಾಗದಂತೆ ನೋಡಿಕೊಳ್ಳುತ್ತದೆ. ನೆತ್ತಿಯ ಆರೋಗ್ಯ ಸರಿಯಾಗಿದೆ ಎಂದರೆ ನಿಮ್ಮ ಕೂದಲು ಆರೋಗ್ಯವಾಗಿದೆ ಎಂದೇ ಅರ್ಥ.
ಹೊಸ ಕೂದಲುಗಳ ಜನನ : ವಿಟಮಿನ್​ ಸಿ ಅಂಶಯುಕ್ತ ಆಹಾರ ಸೇವನೆ, ವಿಟಮಿನ್​ ಸಿ ಅಂಶಯುಕ್ತ ಕೇಶವರ್ಧಕಗಳ ಬಳಕೆಯಿಂದಾಗಿ ಕ್ರಮೇಣವಾಗಿ ನೀವು ಹೊಸ ಕೂದಲುಗಳನ್ನು ನೆತ್ತಿಯ ಮೇಲೆ ಕಾಣಲಿದ್ದೀರಿ.

ಹಾರ್ಮೋನ್​ಗಳ ಏರಿಳಿತ ನಿಯಂತ್ರಣ : ಅನೇಕರಿಗೆ ಒತ್ತಡ ಉಂಟಾಗಾದ ಹಾರ್ಮೋನ್​ಗಳಲ್ಲಿ ಏರಿಳಿತ ಕಂಡುಬರುತ್ತದೆ. ಇದರಿಂದ ಅನೇಕರಿಗೆ ಕೂದಲು ಉದುರುವಿಕೆ ಉಂಟಾಗುತ್ತದೆ. ಆದರೆ ವಿಟಮಿನ್​ ಸಿ ಅಂಶಯುಕ್ತ ಅಹಾರಗಳ ಸೇವನೆಯಿಂದಾಗಿ ಹಾರ್ಮೋನ್​ಗಳ ಏರಿಳಿತವನ್ನು ನಿಯಂತ್ರಣಕ್ಕೆ ತರಬಹುದಾಗಿದೆ. ಇದರಿಂದ ಕೂದಲು ಉದುರುವಿಕೆ ಕೂಡ ಕಡಿಮೆಯಾಗುತ್ತದೆ.

ವಿಟಮಿನ್​ ಸಿ ಅಂಶ ಹೆಚ್ಚಿಸಲು ಯಾವೆಲ್ಲ ಆಹಾರ ಪದಾರ್ಥಗಳನ್ನು ಸೇವಿಸಬೇಕು..?
ವಿಟಮಿನ್​ ಸಿ ಸಾಮಾನ್ಯವಾಗಿ ಬಹುತೇಕ ಆಹಾರಗಳಲ್ಲಿ ಸಿಗುತ್ತದೆ. ನಿಮ್ಮ ಸುತ್ತಮುತ್ತಲೇ ಸಿಗುವ ಕಿತ್ತಳೆ ಹಣ್ಣು, ನಿಂಬೆ ಹಣ್ಣು, ಬಸಳೆ, ಪಪ್ಪಾಯ, ಕಿವಿ ಹಣ್ಣು, ಬ್ರೊಕೊಲಿ, ದ್ರಾಕ್ಷಿ, ಬೆರ್ರಿ ಜಾತಿಗೆ ಸೇರಿದ ಹಣ್ಣುಗಳು, ಕಾಳು ಮೆಣಸು, ನೆಲ್ಲಿಕಾಯಿ ಹೀಗೆ ಸಾಕಷ್ಟು ಆಹಾರ ಪದಾರ್ಥಗಳು ವಿಟಮಿನ್​ ಸಿಯನ್ನು ಹೊಂದಿರುತ್ತವೆ.
ಕೇವಲ ವಿಟಮಿನ್​ ಸಿ ಅಂಶಯುಕ್ತ ಆಹಾರ ಪದಾರ್ಥಗಳು ಮಾತ್ರವಲ್ಲ. ಮಾರುಕಟ್ಟೆಯಲ್ಲಿ ನಿಮಗೆ ವಿಟಮಿನ್​ ಸಿ ಅಂಶವನ್ನು ಒಳಗೊಂಡ ಸಾಕಷ್ಟು ಕೇಶವರ್ಧಕ ಉತ್ಪನ್ನಗಳು ದೊರೆಯುತ್ತವೆ. ವಿಟಮಿನ್​ ಸಿ ಅಂಶವನ್ನು ಒಳಗೊಂಡ ಶಾಂಪೂ, ಕಂಡೀಷನರ್​, ಹೇರ್​ ಪ್ಯಾಕ್​ಗಳು, ಹೇರ್​ ಸೀರಂಗಳನ್ನು ನಿರಂತರ ಬಳಕೆ ಮಾಡುವ ಮೂಲಕ ಕೂಡ ನೀವು ನಿಮ್ಮ ನೆತ್ತಿಯ ಹಾಗೂ ಕೂದಲಿನ ಆರೋಗ್ಯವನ್ನು ಕಾಪಾಡಿಕೊಳ್ಳಲು ಸಾಧ್ಯವಿದೆ ಎನ್ನಲಾಗಿದೆ.

ವಿಟಮಿನ್​ ಸಿ ಆ್ಯಂಟಿ ಆಕ್ಸಿಡಂಟ್​ ಗುಣಗಳನ್ನು ಹೊಂದಿರುವುದರಿಂದ ಕೂದಲಿಗೆ ಅತ್ಯಂತ ಅವಶ್ಯಕವಾಗಿ ಬೇಕಾದ ಜೀವಸತ್ವಗಳಲ್ಲಿ ಒಂದಾಗಿದೆ. ಕೂದಲನ್ನು ಹಾನಿಗೊಳಗಾಗುವುದರಿಂದ ರಕ್ಷಿಸುವುದು ಮಾತ್ರವಲ್ಲದೇ, ನೆತ್ತಿಯ ಆರೋಗ್ಯ ಕಾಪಾಡುವ ಮೂಲಕ ಕೂದಲನ್ನು ಬಲಪಡಿಸಿ, ಹೊಸ ಕೂದಲುಗಳ ಉಗಮಕ್ಕೆ ಅವಕಾಶ ಒದಗಿಸುವ ಕಾರ್ಯವನ್ನು ಮಾಡುವ ವಿಟಮಿನ್​ ಸಿ ಕೇಶರಾಶಿಯ ಆರೋಗ್ಯದ ವಿಚಾರದಲ್ಲಿ ಆಲ್​ರೌಂಡರ್​ ಎಂದೇ ಹೇಳಬಹುದಾಗಿದೆ.