ಕೂದಲಿಗೆ ಹಚ್ಚಿದ್ದ ಬಣ್ಣವನ್ನು ತ್ವರಿತವಾಗಿ ನಿವಾರಿಸಬೇಕೇ?

ಕ್ರಮ 1:

ಮೊದಲು ಸೌಮ್ಯವಾದ ಆಂಟಿ-ಡಾಂಡ್ರಫ್ (ತಲೆಹೊಟ್ಟುನಿವಾರಕ) ಶ್ಯಾಂಪೂ ಉಪಯೋಗಿಸಿ ತಲೆಯನ್ನು ತೊಳೆದುಕೊಳ್ಳಿ. ನಿಮ್ಮ ಆಯ್ಕೆಯ ಮನೆಯಲ್ಲಿಯೇ ತಯಾರಿಸಿದ ತಲೆಹೊಟ್ಟು ನಿವಾರಿಸುವ ಯಾವುದೇ ಲೇಪನವನ್ನೂ ಉಪಯೋಗಿಸಬಹುದು. ಆದರೆ ಈ ಶಾಂಪೂ ಕೊಂಚ ಕ್ಷಾರೀಯವಾಗಿರಬೇಕು, ಅಂದರೆ ಇದರ ಪಿಎಚ್ ಮಟ್ಟ ಕೊಂಚ ಹೆಚ್ಚಿರಬೇಕು. ಶಾಂಪೂ ಹಚ್ಚಿದ ಬಳಿಕ ತಲೆಯನ್ನು ಎರಡು ಬಾರಿಯಾದರೂ ತೊಳೆದುಕೊಳ್ಳಬೇಕು.

ಕ್ರಮ 2:

ಸಮಪ್ರಮಾಣದಲ್ಲಿ ಉಗುರುಬೆಚ್ಚನೆಯ ನೀರು ಮತ್ತು ಅಡುಗೆ ಸೋಡಾ ಬೆರೆಸಿ ಲೇಪನ ತಯಾರಿಸಿ. ಒಂದು ಚಮಚದಲ್ಲಿ ಚೆನ್ನಾಗಿ ಗೊಟಾಯಿಸಿ ಒಂದಿನಿತೂ ಗಂಟುಗಳಿಲ್ಲದಂತೆ ಕಲಸಿ.

ಕ್ರಮ 3

ಈ ಲೇಪನವನ್ನು ತಲೆಗೂದಲ ಬುಡಕ್ಕೆ ಹಚ್ಚಿ ನಯವಾಗಿ ಮಸಾಜ್ ಮಾಡಿ. ಬಳಿಕ ಕೂದಲ ತುದಿಯವರೆಗೆ ಬರುವಂತೆ ಹಚ್ಚಿಕೊಳ್ಳುತ್ತಾ ಹೋಗಿ.

ಕ್ರಮ 4

ಈ ಲೇಪನ ಕೊಂಚ ಒಣಗಲು ಕಾಲಾವಕಾಶ ನೀಡಿ. ಇದಕ್ಕೆ ಸುಮಾರು ಹದಿನೈದು ನಿಮಿಷ ಬೇಕಾಗಬಹುದು. ಒಂದು ವೇಳೆ ಈ ಲೇಪನ ಹಚ್ಚಿದಾಕ್ಷಣ ತುರಿಕೆ ಅಥವಾ ಉರಿಯ ಅನುಭವವಾದರೆ ಈ ಕ್ರಮವನ್ನು ತಕ್ಷಣ ನಿಲ್ಲಿಸಿ ತಣ್ಣೀರಿನಿಂದ ತೊಳೆದುಕೊಂಡು ಮುಕ್ತಾಯ ಮಾಡಿ. ಏಕೆಂದರೆ ಕೆಲವರಿಗೆ ಅಡುಗೆ ಸೋಡಾ ಅಲರ್ಜಿಯಾಗಿರುತ್ತದೆ.

ಕ್ರಮ 5

ಹದಿನೈದು ನಿಮಿಷಗಳ ಬಳಿಕ ನಲ್ಲಿಯ ಅಥವಾ ಶವರ್‌ನ ನೀರು ನೇರವಾಗಿ ಬೀಳುವಂತೆ ಮಾಡಿ ಈ ಪದರ ಕರಗಿ ಹೋಗುವಂತೆ ಮಾಡಿ. ಬಳಿಕ ಮೊದಲು ಉಪಯೋಗಿಸಿದ ಸೌಮ್ಯ ಶಾಂಪೂವಿನಿಂದ ಮತ್ತೊಮ್ಮೆ ತೊಳೆದುಕೊಳ್ಳಿ.

ಕ್ರಮ 6

ಈಗ ಸೌಮ್ಯ ಕಂಡೀಶನರ್ ಉಪಯೋಗಿಸಿ ಕೂದಲ ಬುಡದಿಂದ ತುದಿಯವರೆಗೂ ತೊಳೆಯಿರಿ. ಆದರೆ ಕೂದಲ ಬುಡಕ್ಕೆ ಮಸಾಜ್ ಮಾಡಬೇಡಿ. ಕೇವಲ ಏಳು ಸೆಕೆಂಡ್ ಬಿಟ್ಟು ನೀರಿನಿಂದ ತೊಳೆದುಕೊಳ್ಳಿ.

ಎಚ್ಚರಿಕೆ

* ಈ ಬಗ್ಗೆ ತಜ್ಞರು ಕೂದಲಿಗೆ ಬಣ್ಣ ಹಚ್ಚಿದ ಬಳಿಕ ನಿವಾರಿಸಲು ಕನಿಷ್ಠ ಮೂರು ದಿನಗಳಾದರೂ ಕಾಯುವಂತೆ ಸಲಹೆ ನೀಡುತ್ತಾರೆ. ಏಕೆಂದರೆ ಕೂದಲ ಬಣ್ಣದ ರಾಸಾಯನಿಕದ ಪ್ರಭಾವ ಪೂರ್ಣವಾಗಿ ಅಳಿದ ಬಳಿಕವೇ ಅಡುಗೆ ಸೋಡಾ ಹಚ್ಚುವುದು ಉತ್ತಮ. ಪೂರ್ಣವಾಗಿ ಒಣಗದ ಬಣ್ಣದ ಮೇಲೆ ಅಡುಗೆ ಸೋಡಾ ಪ್ರಭಾವ ಬೀರಿ ಕೂದಲಿಗೆ ಹಾನಿಯುಂಟುಮಾಡಬಹುದು.

* ಅಡುಗೆ ಸೋಡಾ ಉಪಯೋಗಿಸಿದ ಬಳಿಕ ಶಾಂಪೂ ಮತ್ತು ಕಂಡೀಶನರ್ ಉಪಯೋಗಿಸುವುದು ಅಗತ್ಯ. ಇಲ್ಲದಿದ್ದರೆ ಸೋಡಾ ಪ್ರಭಾವದಿಂದ ಕೂದಲು ತೀರಾ ಒಣಗಿ ಒರಟಾಗುತ್ತದೆ. ಆದ್ದರಿಂದ ಶ್ಯಾಂಪೂ ಮತ್ತು ಕಂಡೀಶನರ್ ಇಲ್ಲದೇ ಅಡುಗೆ ಸೋಡಾ ಹಚ್ಚಲು ಹೋಗಲೇಬೇಡಿ.