ಇಂತಹ ಅಭ್ಯಾಸಗಳೇ, ಕೂದಲುದುರುವುದಕ್ಕೆ ಮೂಲ ಕಾರಣ!

ಕೇಶತೈಲ ಮತ್ತು ಕೇಶ ಉತ್ಪಾದನೆಗಳು

ಮಾರುಕಟ್ಟೆಯಲ್ಲಿ ಲಭ್ಯವಿರುವ ಎಲ್ಲಾ ಕೇಶ ಉತ್ಪಾದನೆಗಳು ಎಲ್ಲರಿಗೂ ಸಮಾನವಾಗಿ ಪರಿಣಾಮಕಾರಿಯಾಗುತ್ತದೆ ಎಂದು ಖಡಾಖಂಡಿತವಾಗಿ ಹೇಳುವಂತಿಲ್ಲ. ಏಕೆಂದರೆ ಕೆಲವು ಉತ್ಪಾದನೆಗಳಲ್ಲಿ ನಿಮ್ಮ ಕೂದಲಿಗೆ ಅಲರ್ಜಿಯಾಗುವ ಕೆಲವು ರಾಸಾಯನಿಕಗಳೂ ಇರಬಹುದು. ಕೂದಲುದುರುತ್ತಿದ್ದರೆ ನೀವು ಬಳಸುತ್ತಿರುವ ಕೇಶಶೃಂಗಾರ ಪ್ರಸಾದನಗಳ ವಿವರಗಳನ್ನು ಚರ್ಮವೈದ್ಯರಿಗೆ ತೋರಿಸಿದರೆ ಇದರಲ್ಲಿ ನಿಮಗಾಗದಿರುವ ಉತ್ಪನ್ನ ಯಾವುದು ಎಂದು ಅವರು ಸೂಚಿಸುತ್ತಾರೆ. ಜೊತೆಗೇ ನಿಮಗೆ ಸೂಕ್ತವಾದ ಪ್ರಸಾದನ ಯಾವುದು ಎಂದೂ ಸೂಚಿಸುತ್ತಾರೆ. ಕೂಡಲೇ ನಿಮ್ಮ ಈ ಪ್ರಸಾದನವನ್ನು ಬದಲಿಸಿಕೊಳ್ಳಿ.

ಕೆಲಸದ ಒತ್ತಡ

ಮನೆಕೆಲಸವೇ ಆಗಲಿ, ಕಛೇರಿಯ ಕೆಲಸವೇ ಆಗಲಿ, ಮನಸ್ಸು ಒತ್ತಡದಲ್ಲಿರುವಾಗ ದೇಹ ಹಲವು ಆಘಾತಗಳನ್ನು ಎದುರಿಸಬೇಕಾಗುತ್ತದೆ. ಕಾಡುವ ಚಿಂತೆ ಕೂದಲುದುರುವಿಕೆಗೆ ಪ್ರಮುಖ ಕಾರಣವಾಗಿದೆ.

ಕುದಿಯುವಷ್ಟು ನೀರಿನಲ್ಲಿ ತಲೆ ಸ್ನಾನ ಮಾಡುವುದು

ಕೆಲವರಿಗೆ ತಲೆಸ್ನಾನ ಮಾಡುವಾಗ ನೀರು ಬಿಸಿಯಿದ್ದಷ್ಟೂ ಒಳ್ಳೆಯದು ಎಂಬ ಅಭಿಪ್ರಾಯವಿದೆ. ವಾಸ್ತವವಾಗಿ ಇದರ ವಿರುದ್ದವೇ ಸತ್ಯ. ಏಕೆಂದರೆ ನೀರು ಬಿಸಿಯಿದ್ದಷ್ಟೂ ತಲೆಯ ಮೇಲಿನ ಚರ್ಮ ಒಣಗಿ, ಎಣ್ಣೆಯನ್ನು ಹೀರಿಕೊಳ್ಳುವ ಸಾಮರ್ಥ್ಯವನ್ನು ಕಳೆದುಕೊಳ್ಳುತ್ತದೆ. ಚರ್ಮದ ಒಳಗಿನಿಂದ ಸ್ರವಿಸಿದ ನೈಸರ್ಗಿಕ ಎಣ್ಣೆ ಕುದಿನೀರಿನಲ್ಲಿ ಕೊಚ್ಚಿ ಹೋಗುವುದರಿಂದ ಪೋಷಣೆ ಇಲ್ಲವಾಗಿ ಕೂದಲುದುರಲು ಕಾರಣವಾಗುತ್ತದೆ. ಆದ್ದರಿಂದ ತಣ್ಣನೆಯ ಅಥವಾ ಉಗುರುಬೆಚ್ಚನೆಯ ನೀರು ತಲೆಸ್ನಾನಕ್ಕೆ ಉತ್ತಮವಾಗಿದೆ.

ಬಿಸಿಗಾಳಿಯಿಂದ ಕೂದಲನ್ನು ಒಣಗಿಸುವುದು

ಬಿಸಿಗಾಳಿಯನ್ನು ಉಪಯೋಗಿಸಿ ತಲೆಗೂದಲನ್ನು ಒಣಗಿಸಿಕೊಳ್ಳುವುದು, ಅದೇ ಸಮಯದಲ್ಲಿ ಸೌಂದರ್ಯಕ್ಕೆ ತಕ್ಕ ವಿನ್ಯಾಸ ನಡೆಸುವುದನ್ನು ಕೆಲವರು ಅನುಸರಿಸುತ್ತಾರೆ. ಆದರೆ ಬಿಸಿಗಾಳಿಯಿಂದ ಕೂದಲಿಗೆ ಅತ್ಯಗತ್ಯವಾಗಿದ್ದ ನೀರಿನ ಪಸೆ ಮತ್ತು ಆರ್ದ್ರತೆ ಒಣಗಿಹೋಗುವುದರಿಂದ ಸೆಳೆತಗೊಳ್ಳುವ ಕೂದಲನ್ನೇ ಸೌಂದರ್ಯದ ಪ್ರತೀಕವನ್ನಾಗಿ ಬಳಸುವುದು ಕೇವಲ ತಾತ್ಕಾಲಿಕವಾಗಿದೆ. ಒಣಗಿದ ಕೂದಲು ನಿಧಾನವಾಗಿ ಕಳಚಿಕೊಳ್ಳುತ್ತಾ ಹೋಗುತ್ತದೆ. ನಿಮಗೆ ತಾತ್ಕಾಲಿಕ ಕೂದಲ ಸೌಂದರ್ಯ ಅಗತ್ಯವೇ ಶಾಶ್ವತವಾಗ ಸೊಂಪಾದ ಕೂದಲು ಅಗತ್ಯವೇ ಎಂದು ನಿಮ್ಮನ್ನು ನೀವೇ ಕೇಳಿಕೊಳ್ಳಿ.

ಸ್ನಾನದ ಬಳಿಕ ಕೂಡಲೇ ತಲೆಬಾಚುವುದು

ಕೆಲವರಿಗೆ ಯಾವುದಕ್ಕೂ ಸಮಯವಿಲ್ಲದೇ ಕೂಡಲೇ ತಯಾರಿಯಾಗಬೇಕೆಂದು ಆರೈಕೆಯನ್ನು ಕಡೆಗಣಿಸುತ್ತಾರೆ. ಸ್ನಾನವಾದ ಬಳಿಕ ತಕ್ಷಣ ತಲೆಬಾಚಿಬಿಡುವುದು ಇದರಲ್ಲಿ ಒಂದು. ಸ್ನಾನವಾದ ಬಳಿಕ ತಲೆಗೂದಲು, ವಿಶೇಷವಾಗಿ ಕೂದಲ ಬುಡ ಹಸಿಯಾಗಿಯೇ ಇದ್ದು ಈ ಕ್ಷಣದಲ್ಲಿ ತಲೆಬಾಚಿದರೆ ಸುಲಭವಾಗಿ, ನೋವಿಲ್ಲದೇ ಬುಡದಿಂದ ಕಿತ್ತು ಬರುತ್ತದೆ. ಇದರ ಬದಲಿಗೆ ಸುಮಾರು ಹತ್ತು ಹದಿನೈದು ನಿಮಿಷ ಕೂದಲನ್ನು ಬಿಡಿಸಿ ಒಣಗಿದ ಬಳಿಕವೇ ಬಾಚಿಕೊಳ್ಳುವುದು ಉತ್ತಮ.