ಕೂದಲಿನ ರಕ್ಷಣೆಗೆ ಮಾಡಿ ಮೆಹಂದಿಯಿಂದ ಆರೈಕೆ

Hair Care

oi-Reena

By Hema S

Published: Thursday, June 21, 2012, 11:22 [IST]

ಅಕಾಲಿಕ ನೆರೆ ಕೂದಲು ಉಂಟಾದರೆ ಅದನ್ನು ಮರೆ ಮಾಚಲು ಮೆಹಂದಿ ಹಚ್ಚುತ್ತೇವೆ. ಆದರೆ ಮೆಹಂದಿ ಬರೀ ಅಕಾಲಿಕ ನೆರೆಯನ್ನು ಮರೆ ಮಾಚುವುದು ಮಾತ್ರವಲ್ಲ ಕೂದಲಿನ ಆರೈಕೆಯನ್ನು ಕೂಡ ಮಾಡುತ್ತದೆ. ಆದರೆ ಮೆಹಂದಿ ಕೊಳ್ಳುವಾಗ ಉತ್ತಮ ಗುಣ ಮಟ್ಟದ ಮೆಹಂದಿಯನ್ನು ನೋಡಿ ಕೊಂಡುಕೊಳ್ಳಬೇಕು. ಕೆಲ ಕೃತಕ ಮೆಹಂದಿಗಳು ಕೂಡ ಇದ್ದು ಕಮ್ಮಿ ಬೆಲೆಗೆ ಕೊಂಡು ಅದನ್ನು ಹಚ್ಚಿದರೆ ಕೂದಲಿಗೆ ಹಾನಿಯಾಗುವುದು. ಆದ್ದರಿಂದ ಮೆಹಂದಿಯನ್ನು ಕೊಳ್ಳುವಾಗ ಗುಣಮಟ್ಟದ ಮೆಹಂದಿಯನ್ನೇ ಕೊಳ್ಳಬೇಕು. ಕೈ ಅಲಂಕಾರಕ್ಕೆ ಅಂತ ಹೆಚ್ಚು ಬಣ್ಣ ಕೊಡುವ ಮೆಹಂದಿ ಪುಡಿಗಳಿರುತ್ತವೆ, ಅಂತಹ ಪುಡಿಗಳನ್ನು ತಲೆಗೆ ಹಚ್ಚಬಾರದು.

ಸಲಹೆ: ಮೆಹಂದಿಯನ್ನು ತಲೆಗೆ ಹಚ್ಚುವಾಗ ಸ್ವಲ್ಪ ಮೊಸರು ಮತ್ತು ನಿಂಬೆರಸ ಮಿಶ್ರ ಮಾಡಿ ಹಚ್ಚಿದರೆ ಕೂದಲಿಗೆ ತುಂಬಾ ಒಳ್ಳೆಯದು ಅಲ್ಲದೆ ಹೊಟ್ಟು ಕೂಡ ನಿವಾರಣೆಯಾಗುತ್ತದೆ. ಮೆಹಂದಿ ಹಚ್ಚಿ ತಲೆ ತುಂಬಾ ಕೆಂಪಾಗುವುದು ಬೇಡ ಅಂದರೆ ಮೆಹಂದಿ ಹಚ್ಚುವ ಮೊದಲು ಎಣ್ಣೆಯನ್ನು ಹಚ್ಚಿ ನಂತರ ಮೆಹಂದಿಯನ್ನು ಹಚ್ಚಿದರೆ ಕೂದಲು ಅಷ್ಟಾಗಿ ಕೆಂಪಾಗುವುದಿಲ್ಲ. ಮೆಹಂದಿ ಹಚ್ಚಿದ ನಂತರ ತಣ್ಣೀರಿನಿಂದ ಅಥವಾ ಹದಬಿಸಿ ನೀರಿನಿಂದ ತಲೆ ತೊಳೆಯಬೇಕು. ಆದರೆ ತಲೆಯನ್ನು ಸೋಪು ಅಥವಾ ಶ್ಯಾಂಪೂ ಹಾಕದೆ ತೊಳೆದು ತಲೆಯನ್ನು ಒಣಗಿಸಬೇಕು. ನಂತರ ಎಣ್ಣೆ ಹಚ್ಚಿ ಮಾರನೆ ದಿನ ಶ್ಯಾಂಪೂ ಹಚ್ಚಿ ತಲೆ ತೊಳೆಯಬೇಕು. ಈ ರೀತಿ ಮಾಡಿದರೆ ಮೆಹಂದಿ ಹಚ್ಚುವುದರಿಂದ ಅಧಿಕ ಪ್ರಯೋಜನವನ್ನು ಪಡೆಯಬಹುದು.

ಮೇಲೆ ಹೇಳಿದ ಸಲಹೆಯನ್ನು ಪಾಲಿಸಿ ತಲೆಗೆ ಮೆಹಂದಿ ಹಚ್ಚಿದರೆ ಈ ಕೆಳಗಿನ ಪ್ರಮುಖ ಪ್ರಯೋಜನಗಳನ್ನು ಪಡೆಯಬಹುದು:

* ಕೂದಲು ಉದುರುವುದು: ಮೆಹಂದಿ ಹಚ್ಚಿದರೆ ಅದು ತಲೆಗೆ ತಂಪನ್ನು ನೀಡುತ್ತದೆ ಅಲ್ಲದೆ ಕೂದಲು ಒಣಗುವುದನ್ನು ತಡೆಯುವುದರಿಂದ ಕೂದಲು ಉದುರುವ ಸಮಸ್ಯೆಯನ್ನು ನಿವಾರಿಸಬಹುದು.

* ಕೂದಲಿಗೆ ರಕ್ಷಣೆ: ಮುಖಕ್ಕೆ ಸನ್ ಸ್ಕ್ರೀನ್ ರಕ್ಷಣೆ ಕೊಡುವಂತೆ , ಮೆಹಂದಿ ಕೂದಲಿಗೆ ರಕ್ಷಣೆಯನ್ನು ಕೊಡುತ್ತದೆ. ಇದು ಸೂರ್ಯನ ಕಿರಣಗಳಿಂದ ಮಾತ್ರವಲ್ಲ, ನೀರಿನಲ್ಲಿರುವ ಕ್ಲೋರಿನ್ ಕೂದಲು ಹಾಳಾಗದಂತೆ ರಕ್ಷಣೆಯನ್ನು ಕೊಡುತ್ತದೆ.

* ಅಕಾಲಿಕ ನೆರೆ: ಮೆಹಂದಿಯನ್ನು ತಿಂಗಳಿಗೆ ಎರಡು ಬಾರಿ ತಲೆಗೆ ಹಚ್ಚುವುತ್ತಾ ಬಂದರೆ ನೆರೆಕೂದಲು ಮರೆ ಮಾಚುವುದು ಅಷ್ಟೇ ಅಲ್ಲ, ಅಕಾಲಿಕ ನೆರೆ ಉಂಟಾಗದಂತೆ ಕೂದಲನ್ನು ರಕ್ಷಿಸುತ್ತದೆ.

* ಮೆಹಂದಿ ಕಂಡೀಷನರ್ :ಮೆಹಂದಿ ಕೂದಲಿಗೆ ಉತ್ತಮ ಕಂಡೀಷನರ್ ಆಗಿದ್ದು ಇದನ್ನು ಹಚ್ಚಿದರೆ ಕೂದಲು ಮೃದುವಾಗುವುದು ಮತ್ತು ಹೊಳಪನ್ನು ಪಡೆಯುತ್ತದೆ. ಕೃತಕ ಬಣ್ಣಗಳನ್ನು ಹಚ್ಚಿ ಕೂದಲಿನ ಆರೋಗ್ಯ ಕಳೆಯುವುದಕ್ಕಿಂತ ಇದನ್ನು ಹಚ್ಚುವುದು ಒಳ್ಳೆಯದು.

ಮೆಹಂದಿ ಗಿಡದಿಂದ ಎಲೆಗಳನ್ನು ಕಿತ್ತು ಅದನ್ನು ಪೇಸ್ಟ್ ರೀತಿ ಮಾಡಿ ಹಚ್ಚುವುದು, ಮೆಹಂದಿ ಪುಡಿಯನ್ನು ಬಳಸುವುದಕ್ಕಿಂತ ಹೆಚ್ಚು ಪ್ರಯೋಜನಕಾರಿ.