ರೇಷ್ಮೆಯಂತಹ ಕೂದಲಿಗಾಗಿ ನೈಸರ್ಗಿಕ ಕಂಡೀಷನರ್

Hair Care

oi-Reena

By Hema S

Published: Saturday, May 19, 2012, 12:32 [IST]

ಹೇರ್ ಸ್ಟೈಟ್ನಿಂಗ್ ಮಾಡಿಸಿದ ಮೇಲೆ ಕೂದಲಿಗೆ ಉತ್ತಮವಾದ ಕಂಡೀಷನರ್ ಹಾಕಿ ಆರೈಕೆ ಮಾಡಬೇಕು. ಈ ರೀತಿ ಆರೈಕೆ ಮಾಡುವಾಗ ನೈಸರ್ಗಿಕವಾದ ವಿಧಾನವನ್ನು ಬಳಸುವುದು ಒಳ್ಳೆಯದು. ರೇಷ್ಮೆಯಂತಹ ನುಣಪಾದ ಕೂದಲು ಬೇಕೆನ್ನುವವರು ಕೆಮಿಕಲ್ ಶ್ಯಾಂಪೂಗಳು ಮತ್ತು ಕಂಡೀಷನರ್ ಬಳಸುವ ಬದಲು ಈ ಕೆಳಗಿನ ಕಂಡೀಷನರ್ ಬಳಸಿದರೆ ಕೂದಲಿಗೆ ಯಾವುದೇ ರೀತಿಯ ಅಡ್ಡ ಪರಿಣಾಮ ಬೀರುವುದಿಲ್ಲ.

ಮೊಸರು: ಮೊಸರು ಹಚ್ಚಿ ಅರ್ಧ ಗಂಟೆಯ ಬಳಿಕ ತಲೆ ತೊಳೆದರೆ ಕೂದಲು ಮೃದುವಾಗುವುದು ಮತ್ತು ಹೊಳಪನ್ನು ಪಡೆಯುತ್ತದೆ. ಮೊಸರಿನ ಜೊತೆ ಒಂದು ಚಮಚ ಜೇನು ಸೇರಿಸಿ ಹಚ್ಚಿದರೆ ಕೂದಲು ಮತ್ತಷ್ಟು ಹೊಳಪನ್ನು ಪಡೆಯುತ್ತದೆ. ಆದರೆ ಮೊಸರು ಹಚ್ಚಿ ತುಂಬಾ ಹೊತ್ತು ಬಿಡಬಾರದು. ಏಕೆಂದರೆ ತಲೆ ವಾಸನೆ ಬರಲಾರಂಭಿಸುತ್ತದೆ. ತಲೆಹೊಟ್ಟು ಇದ್ದರೆ ಮೊಸರಿನ ಜೊತೆ ನಿಂಬೆರಸ ಸೇರಿಸಿ ಹಚ್ಚಿದರೆ ತಲೆಹೊಟ್ಟು ನಿವಾರಣೆಯಾಗುವುದು.

ಬಿಸಿ ಎಣ್ಣೆ ಮಸಾಜ್: ಬಿಸಿ ಎಣ್ಣೆ ಮಸಾಜ್ ವಾರಕ್ಕೊಮ್ಮೆಯಾದರೂ ಮಾಡುವುದು ಒಳ್ಳೆಯದು. ಹದ ಬಿಸಿ ಎಣ್ಣೆಯನ್ನು ತಲೆಗೆ ಹಚ್ಚಿ ಮಸಾಜ್ ಮಾಡಿ ನಂತರ ಟವಲ್ ಅನ್ನು ಬಿಸಿ ನೀರಿನಲ್ಲಿ ಅದ್ದಿ ಹಿಂಡಿ ತಲೆಗೆ ಸುತ್ತಿ ಅರ್ಧ ಗಂಟೆ ಇಟ್ಟು ತಲೆ ತೊಳೆಯಬೇಕು. ಈ ರೀತಿ ಮಾಡಿದರೆ ಕೂದಲಿನ ಬುಡ ಬಲವಾಗುತ್ತದೆ. ಈ ರೀತಿ ಎಣ್ಣೆ ಮಸಾಜ್ ಗೆ ತೆಂಗಿನೆಣ್ಣೆ ಅಥವಾ ಬಾದಾಮಿ ಎಣ್ಣೆಯನ್ನು ಬಳಸಬಹುದು.

ಮೊಟ್ಟೆಯ ಪ್ಯಾಕ್: ಮೊಟ್ಟೆಯ ಬಿಳಿಯನ್ನು ಮಾತ್ರ ಒಂದು ಬಟ್ಟಲಿಗೆ ಹಾಕಿ ಚೆನ್ನಾಗಿ ಕದಡಿ ಅದನ್ನು ತಲೆಗೆ ಹಚ್ಚಿ 20 ನಿಮಿಷದ ಬಳಿಕ ಮೃದುವಾದ ಶ್ಯಾಂಪೂ ಹಚ್ಚಿ ತಲೆ ತೊಳೆಯಬೇಕು. ಈ ರೀತಿ ಮಾಡಿದರೆ ಕೂದಲು ಮೃದು ಮತ್ತು ಹೊಳಪನ್ನು ಹೊಂದುವುದು.

ವಿನಿಗರ್: ತಲೆಯನ್ನು ತೊಳೆದ ಬಳಿಕ 1 ಚಮಚ ಸೈಡರ್ ವಿನಿಗರ್ ಅನ್ನು ಅರ್ಧ ಬಕೆಟ್ ನೀರಿಗೆ ಹಾಕಿ ಅದರಿಂದ ತಲೆ ತೊಳೆದುಕೊಂಡರೆ ಕೂದಲು ಆಕರ್ಷಕವಾಗಿ ಕಾಣುವುದು.

ಟೀ : ನೀರಿನಲ್ಲಿ ಸ್ವಲ್ಪ ಟೀ ಎಲೆಯನ್ನು ಹಾಕಿ ಕುದಿಸಬೇಕು. ನಂತರ ಇದನ್ನು ಒಂದು ಪಾತ್ರೆಯಲ್ಲಿ ಸುರಿದು ತಣ್ಣಗಾಗಲು ಇಡಬೇಕು. ನಂತರ ಟೀಯನ್ನು ತಲೆಗೆ ಹಚ್ಚಿ 20 ನಿಮಿಷದ ಬಳಿಕ ತಲೆ ತೊಳೆದರೆ ಕೂದಲು ಬಲವಾಗುವುದರ ಜೊತೆಗೆ ಆಕರ್ಷಕ ಬಣ್ಣವನ್ನು ಪಡೆಯುತ್ತದೆ.