ಸಖತ್ ಶೈನಿ ಕೂದಲು ಪಡೆಯಲು ಏಳೇ ಮಾರ್ಗ

Hair Care

oi-Sumalatha

By Sumalatha

Published: Wednesday, October 19, 2011, 15:36 [IST]

ಹೆಣ್ಣಿಗೆ ಕೂದಲೇ ಆಕರ್ಷಣೆ. ಅದರಲ್ಲು ಕೂದಲು ಹೊಳೆಯುವ ಝರಿಯಂತಿದ್ದರೆ ಇನ್ನೂ ಚೆಂದ. ಆದರೆ ಕೆಲ ಕಾರಣದಿಂದ ಕೂದಲಿನ ನೈಜ ಸೌಂದರ್ಯ ಮಾಸಿಹೋಗಿರಬಹುದು. ಕೂದಲಿನ ಸಹಜ ಸೌಂದರ್ಯ ಮರಳಿಸುವ ಕೆಲವು ನೈಸರ್ಗಿಕ ಮಾರ್ಗವನ್ನು ಇಲ್ಲಿ ನೀಡಲಾಗಿದೆ.

ನೈಸರ್ಗಿಕವಾಗಿ ಹೊಳೆಯುವ ಕೂದಲು ಪಡೆಯುವ ಮಾರ್ಗ:

1. ಸ್ನಾನ ಮಾಡುವ ಕೆಲ ಗಂಟೆಯ ಮುನ್ನ ಕೂದಲಿಗೆ ಆಲಿವ್ ಎಣ್ಣೆ ಹಚ್ಚಿಕೊಳ್ಳಿ. ಚೆನ್ನಾಗಿ ಮಸಾಜ್ ಮಾಡಿಕೊಳ್ಳಬೇಕು. ಇದು ಕೂದಲ ಬುಡದಲ್ಲಿ ಸೇರಿಕೊಂಡ ಅನವಶ್ಯಕ ಎಣ್ಣೆಯಂಶವನ್ನು ಹೊರಗೆಳೆಯುತ್ತದೆ. ನಂತರ ಒಳ್ಳೆಯ ಶಾಂಪು ಬಳಸಿ ಕೂದಲನ್ನು ಚೆನ್ನಾಗಿ ತೊಳೆದುಕೊಳ್ಳಬೇಕು.

2. ತಣ್ಣಗಿನ ನೀರಿನಲ್ಲಿ ಕೂದಲಿಗೆ ಸ್ನಾನ ಮಾಡಿ. ಬಿಸಿ ನೀರು ಕೂದಲಿನ ಮೃದುತ್ವ ಮತ್ತು ಗುಣಮಟ್ಟ ಕಡಿಮೆಮಾಡುತ್ತದೆ. ಆದ್ದರಿಂದ ತಣ್ಣಗಿನ ನೀರಿನಲ್ಲಿ ಸ್ನಾನ ಮಾಡಿದರೆ ಕೂದಲು ಮೃದುವಾಗಿ ಹೊಳೆಯುತ್ತಿರುತ್ತದೆ.

3. ಕೂದಲಿಗೆ ಶಾಂಪೂ ಹಾಕಿ ತೊಳೆದ ನಂತರ ಕಂಡೀಶನರ್ ಉಪಯೋಗಿಸಬಹುದು. ಕಂಡೀಶನರನ್ನು ಕೂದಲಿನಲ್ಲಿ ಎರಡು ನಿಮಿಷ ಬಿಟ್ಟು ನಂತರ ಚೆನ್ನಾಗಿ ತೊಳೆಯಬೇಕು.

4. ವಿನಿಗರ್ ಬಳಸಿಕೊಂಡೂ ಕೂದಲಿಗೆ ಹೊಳಪು ನೀಡಬಹುದು. ನೀರಿಗೆ ಕೆಲವು ಹನಿ ವಿನಿಗರ್ ಬೆರೆಸಿ ಅದನ್ನು ಕೂದಲಿಗೆ ಹಚ್ಚಿಕೊಂಡು 30-40 ಸೆಕೆಂಡ್ ಬಿಟ್ಟು ನಂತರ ತೊಳೆದುಕೊಳ್ಳಬಹುದು.

5. ಸುಂದರ ಹೊಳೆಯುವ ಕೂದಲು ಪಡೆಯಬೇಕೆಂದರೆ ಮೊಟ್ಟೆಯನ್ನೂ ಕೂದಲಿಗೆ ಬಳಸಬಹುದು. ಮೊಟ್ಟೆಯನ್ನು ತಲೆಗೆ ಹಚ್ಚಿಕೊಂಡು 30 ನಿಮಿಷ ಬಿಟ್ಟು ಶಾಂಪೂವಿನಿಂದ ಚೆನ್ನಾಗಿ ತೊಳೆದುಕೊಳ್ಳಬೇಕು. ಇದರಿಂದ ಕೂದಲಿ ಝರಿಯಂತೆ ಹೊಳೆಯುತ್ತದೆ.

6. ತೇವವಿದ್ದ ಕೂದಲನ್ನು ಯಾವುದೇ ಕಾರಣಕ್ಕೂ ಬಾಚಬಾರದು. ಇದು ಕೂದಲು ತುಂಡಾಗುವಂತೆ ಮತ್ತು ಉದುರುವಂತೆ ಮಾಡುತ್ತದೆ. ಕೂದಲು ಸಂಪೂರ್ಣ ಒಣಗಿದ ನಂತರವಷ್ಟೇ ಬಾಚಿದರೆ ಉತ್ತಮ.

7. ಆಲ್ಕೊಹಾಲ್ ಅಂಶ ಹೊಂದಿರುವ ಕೂದಲಿನ ಜೆಲ್ ಬಳಸುವುದನ್ನು ಕಡಿಮೆಮಾಡಬೇಕು. ಇದು ಕೂದಲನ್ನು ಒಣಗುವಂತೆ ಮಾಡುತ್ತದೆ. ಹೇರ್ ಡ್ರೈಯರ್ ಬಳಸುವುದನ್ನು ಕಡಿಮೆಗೊಳಿಸಬೇಕು.