ಮುದ್ದಾದ ಮುಂಗುರುಳಿದ್ದರೆ ಮನಸೋಲಲೇ ಬೇಕು

ಮುಂಗುರುಳಿನಲ್ಲೂ ಅನೇಕ ಬಗೆಯಿದೆ. ಅದರಲ್ಲಿ ನಿಮ್ಮ ಕೇಶ ಶೈಲಿಗೆ ಮತ್ತು ನಿಮ್ಮ ಮುಖಕ್ಕೆ ತಕ್ಕಂತಹ ಮುಂಗುರುಳನ್ನು ಬಿಟ್ಟು ಬೋಲ್ಡ್ ಅಂಡ್ ಬ್ಯೂಟಿಫುಲ್ ಆಗಿ ಕಾಣಬಹುದು.

ಮುಂಗುರುಳಿನ ವಿಧಗಳು:

* ಸೈಡ್ ಕ್ರಾಫ್ ಮುಂಗುರುಳು: ನಿಮ್ಮ ಕೂದಲನ್ನು ಓರೆಯಾಗಿ ಒಂದೆಡೆ ಭಾಗ ಮಾಡಿ ಬಾಚುತ್ತೀರ (ಸೈಡ್ ಕ್ರಾಫ್) ಎಂದಾದರೆ ಮುಂಗುರುಳು ನಿಮಗೆ ಚೆಂದವಾಗಿ ಒಪ್ಪುತ್ತದೆ. ಹೆಗಲಿನ ಮೇಲೆ ಬರುವಂತೆ ಅಥವಾ ಸ್ವಲ್ಪ ತುಂಡವಾಗಿ ಕತ್ತರಿಸಿದರೆ ನೋಡಲು ಚೆಂದ. ಬಾಲಿವುಡ್ ನಟಿ ಪ್ರಿಯಾಂಕ ಛೋಪ್ರಾಳ ಇತ್ತೀಚಿನ ಹೇರ್ ಸ್ಟೈಲ್ ಇದು. ಹುಡುಗಿಯರು ಬೋಲ್ಡ್ ಆಗಿ ಕಾಣಲು ಇಚ್ಛಿಸಿದರೆ ಈ ಹೇರ್ ಸ್ಟೈಲ್ ಮಾಡಿನೋಡಿ.

* ಉದ್ದ ಕೂದಲಿನ ಮುಂಗುರುಳು: ನಿಮಗೆ ಉದ್ದ ಕೂದಲಿದ್ದರೆ ಮುಂದಲೆಯ ಕೂದಲನ್ನು ನಿಮ್ಮ ಹಣೆಯ ಮೇಲೆ ನಿಲ್ಲುವಂತೆ ಸ್ವಲ್ಪ ತುಂಡವಾಗಿ ಕತ್ತರಿಸಿ ನೋಡಿ, ಅದು ನಿಮ್ಮನ್ನು ಬೊಂಬೆಯಂತೆ ಸುಂದರವಾಗಿ ಕಾಣುವಂತೆ ಮಾಡುತ್ತದೆ. ಕತ್ರೀನಾ ಕೈಫ್ ಇತ್ತೀಚೆಗೆ ಕಾಣಿಸಿಕೊಳ್ಳುತ್ತಿರುವುದು ಇದೇ ಶೈಲಿಯಲ್ಲಿ.

* ತುಂಡು ಕೂದಲಿನ ಮುಂಗುರುಳು: ನಿಮಗೆ ಚಿಕ್ಕದಾದ ಮತ್ತು ಗುಂಗುರು ಕೂದಲಿದ್ದರೆ ಮಧ್ಯೆ ಭಾಗ ಮಾಡಿಕೊಂಡು ಎರಡೂ ಪಕ್ಕಕ್ಕೂ ಕೂದಲು ಕತ್ತರಿಸಿಕೊಳ್ಳಬಹುದು. ಈ ಹಿಂದೆ ಮಾಧುರಿ ದೀಕ್ಷಿತ್ ಕೇಶ ವಿನ್ಯಾಸ ಇದ್ದುದ್ದು ಇದೇ ರೀತಿ. ಈ ಕೇಶಶೈಲಿ ನಿಮ್ಮನ್ನು ಮುದ್ದಾಗಿ ಕಾಣುವಂತೆ ಮಾಡುತ್ತದೆ.

* ಚಿಕ್ಕ ಕೂದಲಿಗೆ ಉದ್ದವಾದ ಮುಂಗುರುಳು: ಚಿಕ್ಕ ಕೂದಲಿದ್ದವರು ಒಂದು ಕಡೆ ಮಾತ್ರ ಉದ್ದವಾದ ಮುಂಗುರುಳನ್ನು ಬಿಡುವುದು ರೂಢಿ. ಒಂದು ಕಡೆ ಮಾತ್ರ ಮುಂಗುರುಳು ಬಿಟ್ಟರೂ ಕೆಲವೊಬ್ಬರಿಗೆ ಚೆಂದವಾಗಿ ಕಾಣುತ್ತದೆ.

ನಿಮಗೂ ಮುಂಗುರುಳನ್ನು ಬಿಡಬೇಕೆಂಬ ಆಸೆಯಿದ್ದರೆ ಇದರಲ್ಲಿ ಯಾವುದಾದರೂ ಒಂದನ್ನು ಆಯ್ಕೆ ಮಾಡಿಕೊಂಡು ಮುಂಗುರುಳು ಬಿಟ್ಟು ನೋಡಿ.