ಕೂದಲಿನ ಪೋಷಣೆಗೆ ಬೇಕು ಮೊಟ್ಟೆಯ ರಕ್ಷಣೆ

Hair Care

oi-Sumalatha N

By Sumalatha N

Published: Saturday, August 6, 2011, 13:23 [IST]

ಹೊಳೆಯುವ ಕೂದಲೆಂದರೆ ಯಾರಿಗೆ ಇಷ್ಟ ಆಗೋದಿಲ್ಲ ಹೇಳಿ? ಸೌಂದರ್ಯಕ್ಕೆ ಮೆರುಗು ತಂದುಕೊಡೋದೆ ಸುಂದರ ಕೇಶ. ಆದರೆ ಎಷ್ಟೇ ಪ್ರಯತ್ನಪಟ್ಟರೂ ಸರಿ ಹೋಗದ ಕೂದಲನ್ನು ಕಂಡರೆ ಜಿಗುಪ್ಸೆ. ಆದರೆ ಇದಕ್ಕೆ ಚಿಂತೆ ಮಾಡುವ ಅವಶ್ಯಕತೆ ಇಲ್ಲ. ನೈಸರ್ಗಿಕವಾಗಿ ಕೂದಲನ್ನು ಚೆಂದಗೊಳಿಸುವಂಥ ಮೊಟ್ಟೆಯನ್ನು ಬಳಕೆ ಮಾಡಿದರೆ ಕೂದಲಿನ ಸಮಸ್ಯೆಗಳು ಕಡಿಮೆಯಾಗುತ್ತವೆ.

ಮೊಟ್ಟೆಯನ್ನು ಯಾವ ರೀತಿ ಉಪಯೋಗಿಸಿ ಕೂದಲನ್ನು ಸುಪೋಷಿತಗೊಳಿಸುವ ಕೆಲವು ಟಿಪ್ಸ್ :

1. ಮೊಟ್ಟೆಯನ್ನು ಕೂದಲಿಗೆ ಉಪಯೋಗಿಸಬಹುದಾದ ಅತಿ ಸುಲಭ ಮಾರ್ಗವೆಂದರೆ ಎರಡು ಮೊಟ್ಟೆಯನ್ನು ಒಡೆದು, ಅದರ ಲೋಳೆಗೆ 1 ಚಮಚ ಹರಳೆಣ್ಣೆ, ಒಂದೆರಡು ಹನಿ ನೀರು ಬೆರೆಸಿ ತಲೆಯ ಬುಡದಿಂದ ತುದಿಯವರೆಗೂ ಮಸಾಜ್ ಮಾಡಿ 30 ನಿಮಿಷ ಬಿಡಬೇಕು. ನಿಮಗೆ ಹೊಟ್ಟಿನ ಸಮಸ್ಯೆಯಿದ್ದರೆ ಅದಕ್ಕೆ ಒಂದೆರಡು ಹನಿ ನಿಂಬೆರಸವನ್ನು ಸೇರಿಸಬಹುದು.

2. ಕೂದಲು ಸೊಂಪಾಗಿ ಬೆಳೆಯಬೇಕೆಂದರೆ ಮೊಟ್ಟೆಯ ಲೋಳೆಗೆ ಬಾದಾಮಿ ಎಣ್ಣೆ ಸೇರಿಸಿ ಮಸಾಜ್ ಮಾಡಿಕೊಳ್ಳಬೇಕು.

3. ಮೊಟ್ಟೆಯಿಂದ ಕೂದಲಿಗೆ ಪ್ಯಾಕ್ ಹಾಕಿಕೊಳ್ಳಬೇಕೆಂದರೆ 1 ಚಮಚ ನೀರಿನೊಂದಿಗೆ ಒಂದು ಮೊಟ್ಟೆಯ ಹಳದಿ ಲೋಳೆ ಸೇರಿಸಿ ಬುಡದಿಂದ ತುದಿಯವರೆಗೂ ಹಚ್ಚಿಕೊಳ್ಳಬೇಕು. 10-15 ನಿಮಿಷ ಬಿಟ್ಟು ಶಾಂಪೂವಿನಿಂದ ತೊಳೆದುಕೊಳ್ಳಬೇಕು. ಇದು ತುಂಬಾ ಪರಿಣಾಮಕಾರಿ ಹೇರ್ ಕಂಡೀಶನರ್.

4. ಎರಡು ಮೊಟ್ಟೆಗಳನ್ನು ಒಡೆದು ಚೆನ್ನಾಗಿ ಕಲಕಿ ತಲೆಯ ಮೇಲೆ ಹಾಕಿಕೊಂಡು 3 ನಿಮಿಷ ಮಸಾಜ್ ಮಾಡಬೇಕು. ಅದು ಒಣಗಲು ಬಿಟ್ಟು ಆನಂತರ ಶಾಂಪೂ ಹಾಕಿ ವಿನಿಗರ್ ಮತ್ತು ನೀರಿನ ಮಿಶ್ರಣವನ್ನು ಸ್ವಲ್ಪ ಬೆರೆಸಿ ತೊಳೆದುಕೊಳ್ಳಬೇಕು. ಇದು ಕೂದಲನ್ನು ಮೃದುವಾಗಿ ಮಾಡುತ್ತದೆ.

5. ಮೊಟ್ಟೆಗೆ ಮೊಸರು ಮತ್ತು ನಿಂಬೆರಸ ಸೇರಿಸಿ ತಲೆಗೆ ಹಚ್ಚಿ 10 ನಿಮಿಷ ಬಿಡಬೇಕು. ಇದನ್ನು ತಣ್ಣೀರಿನಿಂದ ತೊಳೆದುಕೊಂಡರೆ ಕೂದಲು ಸೊಂಪಾಗಿ ಬೆಳೆಯಲು ಅನುಕೂಲವಾಗುತ್ತದೆ. ಅಷ್ಟೇ ಅಲ್ಲ ತಲೆಹೊಟ್ಟನ್ನು ಹೋಗಲಾಡಿಸಿ ನಿರ್ಜೀವ ಕೂದಲಿಗೆ ಬಲ ಬರುವಂತೆ ಮಾಡುತ್ತದೆ.

6. ಆದರೆ ಮೊಟ್ಟೆಯನ್ನು ಹಚ್ಚಿಕೊಂಡು ತೊಳೆದುಕೊಳ್ಳುವಾಗ ಎಚ್ಚರದಿಂದಿರಬೇಕು. ಕೂದಲು ತೊಳೆದ ನಂತರ ತಲೆಯಲ್ಲಿ ಎಣ್ಣೆಯಂತೆ ಉಳಿದುಕೊಳ್ಳದಿರಲಿ, ಉತ್ತಮವಾದ ಶಾಂಪೂ ಬಳಸಿ ಮತ್ತು ಮೊಟ್ಟೆ ವಾಸನೆ ಕೂದಲಲ್ಲಿ ಉಳಿಯದಂತೆ ಚೆನ್ನಾಗಿ ತೊಳೆದುಕೊಳ್ಳಬೇಕು.