ತುಟಿ ಒಡೆಯುವ ಸಮಸ್ಯೆಗೆ ಗುಡ್ ಬೈ ಹೇಳಬೇಕೆ?

ಚಳಿಗಾಲದಲ್ಲಿ ತುಟಿ ಒಣಗುವುದು ಸಾಮಾನ್ಯವಾಗಿ ಕಂಡು ಬರುವ ಸಮಸ್ಯೆಯಾಗಿದೆ. ಈ ರೀತಿ ತುಟಿ ಒಡೆದರೆ ತುಂಬಾ ನೋವಾಗುತ್ತದೆ, ನಗುವುದು ಕೂಡ ಕಷ್ಟವಾಗುತ್ತದೆ. ತುಟಿಯನ್ನು ಆರೈಕೆ ಮಾಡಿದರೆ ತುಟಿ ಒಡೆಯುವ ಸಮಸ್ಯೆಯನ್ನು ತಡೆಗಟ್ಟಬಹುದು. ಅದರಲ್ಲೂ ಈ ಕೆಳಗಿನ ಸಲಹೆಗಳ್ನು ಪಾಲಿಸಿದರೆ ಚಳಿಗಾಲದಲ್ಲೂ ತುಟಿಯನ್ನು ಮೃದುವಾಗಿ ಹಾಗೂ ಆಕರ್ಷಕವಾಗಿ ಇಡಬಹುದು.

1. ಮಾಯಿಶ್ಚರೈಸರ್: ಪ್ರತಿದಿನ ಮಾಯಿಶ್ಚರೈಸರ್ ಅಮ್ಮು ತುಟಿಗೆ ಹಚ್ಚಿದರೆ ತುಟಿ ಚಳಿಗಲದಲ್ಲಿ ತನ್ನ ಮೃದುತ್ವ ಕಳೆದುಕೊಳ್ಳುವುದಿಲ್ಲ. ತುಟಿಗೆ ಬಳಸುವ ಮಾಯಿಶ್ಚರೈಸರ್ ಅಥವಾ ಲಿಪ್ ಆಯಿಲ್ ಗುಣಮಟ್ಟದಾಗಿರಲಿ.

2. ತುಟಿ ಕಚ್ಚ ಬೇಡಿ: ತುಟಿ ತುಂಬಾ ಒಣಗಿದಾಗ ಅದರ ಮೇಲಿನ ಚರ್ಮವನ್ನು ಕಚ್ಚಿ ತೆಗೆಯುವ ಪ್ರಯತ್ನ ಮಾಡಬೇಡಿ. ಈ ರೀತಿ ಮಾಡಿದರೆ ತುಟಿ ಒಡೆಯುವ ಸಮಸ್ಯೆ ಮತ್ತಷ್ಟು ಜಾಸ್ತಿಯಾಗುವುದು.

3. ವಿಟಮಿನ್ ಗಳು: ವಿಟಮಿನ್ ಬಿ ಇರುವ ಆಹಾರ ತುಂಬಾ ಒಳ್ಳೆಯದು. ಮೊಟ್ಟೆ, ಚಸ್, ಕೆಂಪಕ್ಕಿ ಅನ್ನ ಮುಂತಾದವುಗಳ ಸೇವನೆ ತುಂಬಾ ಒಳ್ಳೆಯದು.

4. ನೀರು: ಚಳಿಗಾಲದಲ್ಲಿ ತುಂಬಾ ದಾಹವಾಗುವುದಿಲ್ಲ. ಹಾಗಂತ ನೀರು ಕುಡಿಯುವುದು ಕಡಿಮೆ ಮಾಡಬಾರದು. ದಿನದಲ್ಲಿ 7-8 ಲೋಟ ನೀರು ಕುಡಿಯಲೇಬೇಕು. ದೇಹದಲ್ಲಿ ನೀರಿನಂಶ ಇದ್ದರೆ ತುಟಿ ಒಣಗುವ ಸಮಸ್ಯೆ ಕಡಿಮೆಯಾಗುವುದು.

5. ಲಿಪ್ ಸ್ಟಿಕ್: ತುಟಿಗೆ ಒಡೆದಿದ್ದರೆ ಲಿಪ್ ಸ್ಟಿಕ್ ಹಚ್ಚಬೇಡಿ, ಲಿಪ್ ಸ್ಟಿಕ್ ಹಚ್ಚಿದರೆ ತುಟಿ ಒಡೆಯುವ ಸಮಸ್ಯೆ ಮತ್ತಷ್ಟು ಹೆಚ್ಚಾಗುವುದು.

6. ನೈಸರ್ಗಿಕ ವಿಧಾನ: ಹಾಲಿನ ಕೆನೆ, ಜೇನು ಇವುಗಳನ್ನು ಹಚ್ಚಿದರೆ ತುಟಿ ಒಡೆಯುವ ಸಮಸ್ಯೆ ಕಡಿಮೆಯಾಗುವುದು, ಅಲ್ಲದೆ ತುಟಿಯ ಹೊಳಪು ಹೆಚ್ಚಾಗುವುದು.

ಈ ಮೇಲಿನ ಸಲಹೆಗಳನ್ನು ಪಾಲಿಸಿದರೆ ಚಳಿಗಾಲದಲ್ಲಿ ತುಟಿ ಒಡೆಯುವ ಸಮಸ್ಯೆ ಕಂಡು ಬರುವುದಿಲ್ಲ.