ಸುಂದರ ಮೊಣಕಾಲಿಗೆ ದೃಷ್ಟಿ ಬೊಟ್ಟು ಏಕೆ?

Body Care

oi-Sumalatha N

By Sumalatha N

Published: Tuesday, September 6, 2011, 11:11 [IST]

ಮೈಬಣ್ಣ ಬೆಳ್ಳಗಿದ್ದು ಮಂಡಿ ಮತ್ತು ಮೊಣಕೈ ಮಾತ್ರ ಕಪ್ಪಗಿದ್ದರೆ ಏನೋ ಮುಜುಗರ. ನಿಮ್ಮ ಅಂದಕ್ಕೆ ದೃಷ್ಟಿ ಬೊಟ್ಟಿದ್ದಂತೆ. ಸುಂದರ ತ್ವಚೆ ಪಡೆಯಲು ಏನೆಲ್ಲಾ ಕಾಳಜಿ ವಹಿಸಿ, ಮಂಡಿ ಮತ್ತು ಮೊಣಕೈ ಕಪ್ಪನ್ನು ಹಾಗೆ ಬಿಟ್ಟರೆ ನಿಮ್ಮ ಶ್ರಮವೆಲ್ಲಾ ವ್ಯರ್ಥ. ಆದ್ದರಿಂದ ಮಂಡಿ ಮತ್ತು ಮೊಣಕೈ ಕೀಲಿನ ಕಪ್ಪನ್ನು ಬೆಳ್ಳಗಾಗಿಸುವ ಸುಲಭ ವಿಧಾನ ಇಲ್ಲಿವೆ.

ಮಂಡಿ ಮತ್ತು ಮೊಣಕೈ ಕಪ್ಪನ್ನು ಬೆಳ್ಳಗಾಗಿಸುವ ನೈಸರ್ಗಿಕ ವಿಧಾನ:

1. ಮಂಡಿ ತುಂಬಾ ಕಪ್ಪಗಿದ್ದರೆ ದಿನಕ್ಕೆ ಎರಡು ಬಾರಿ ಹತ್ತಿಯನ್ನು ನಿಂಬೆ ರಸದಲ್ಲಿ ಅದ್ದಿ ಹಚ್ಚಿಕೊಂಡು 15-20 ನಿಮಿಷ ಬಿಟ್ಟು ತೊಳೆಯಬೇಕು ಅಥವಾ ನಿಂಬೆ ಸಿಪ್ಪೆಯನ್ನು ಕಪ್ಪಗಿರುವ ಜಾಗಕ್ಕೆ 4-5 ನಿಮಿಷ ಉಜ್ಜಿಕೊಂಡು ರಾತ್ರಿ ಯಾವುದಾದರೂ ಕ್ರೀಂ ಹಚ್ಚಿಕೊಂಡು ಮಲಗಬೇಕು. ಇಲ್ಲದಿದ್ದರೆ ನಿಂಬೆ ಚರ್ಮವನ್ನು ಒಣಗಿಸಬಹುದು.

2. ಕೊಬ್ಬರಿ ಎಣ್ಣೆಯನ್ನು 5-8 ನಿಮಿಷ ಮಂಡಿಗೆ ಮಸಾಜ್ ಮಾಡಿಕೊಂಡು ತೊಳೆದುಕೊಳ್ಳಬೇಕು ಅಥವಾ ಕೊಬ್ಬರಿ ಎಣ್ಣೆಗೆ ನಿಂಬೆ ರಸ ಸೇರಿಸಿ ಮಸಾಜ್ ಮಾಡಿದರೆ ಉತ್ತಮ ಫಲಿತಾಂಶ ನೀಡುತ್ತದೆ.

3. ಮೊಸರಿನೊಂದಿಗೆ ಸ್ವಲ್ಪ ವೆನಿಗರ್ ಅಥವಾ ನಿಂಬೆ ರಸ ಬೆರೆಸಿ ಹಚ್ಚಿಕೊಂಡರೂ ಮಂಡಿಯ ಕಪ್ಪು ತಂತಾನೆ ದೂರವಾಗುತ್ತದೆ.

4. ಅಡುಗೆ ಸೋಡಾದೊಂದಿಗೆ ಸಕ್ಕರೆ ಬೆರೆಸಿ ಮೊಣಕೈ ಮತ್ತು ಮೊಣಕಾಲಿಗೆ 3-4 ನಿಮಿಷ ಸ್ಕ್ರಬ್ ನಂತೆ ಉಜ್ಜಿ 10-15 ನಿಮಿಷದ ನಂತರ ತೊಳೆದು ಬಾಡಿ ಲೋಶನ್ ಹಚ್ಚಿಕೊಳ್ಳಬಹುದು.

5. ಸಾಸಿವೆ ಎಣ್ಣೆ ಮತ್ತು ಕೊಬ್ಬರಿ ಎಣ್ಣೆಯ ಮಿಶ್ರಣವನ್ನು ಮಸಾಜ್ ಮಾಡಿದರೆ ಕಪ್ಪನ್ನು ಹೋಗಲಾಡಿಸಬಹುದು.

6. ಬಾದಾಮಿ ಎಣ್ಣೆಗೆ ಸಕ್ಕರೆ ಮತ್ತು ಜೇನು ಬೆರೆಸಿ ಹಚ್ಚಿಕೊಂಡು 10-15 ನಿಮಿಷದ ನಂತರ ತೊಳೆಯಬೇಕು.

7. ಹೊರಗೆ ಹೋಗುವಾಗ ಸನ್ ಸ್ಕ್ರೀನ್ ಲೋಷನ್ ಹಚ್ಚಿಕೊಂಡು ಹೋಗುವುದನ್ನು ಮರೆಯಬೇಡಿ.

8. ಸಾಸಿವೆ ಎಣ್ಣೆಗೆ ಸ್ವಲ್ಪ ಉಪ್ಪು ಬೆರೆಸಿ 5-8 ನಿಮಿಷ ಕಪ್ಪಗಾಗಿದ್ದ ಜಾಗವನ್ನು ಚೆನ್ನಾಗಿ ಉಜ್ಜಬೇಕು. ಇದರಿಂದ ಕ್ರಮೇಣ ಕಪ್ಪು ಕಡಿಮೆಯಾಗುತ್ತದೆ.