ಫ್ಲೂ ಗೆ ಎ.ಸಿ ಕಾರಣವಾಗಬಹುದು ಎಚ್ಚರಿಕೆ!

ಹೌದು. ಮಳೆಗಾಲ ತನ್ನ ಜೊತೆ ವೈರಸ್ ಗಳನ್ನೂ ಕರೆದುಕೊಂಡು ಬರುತ್ತೆ. ವೈರಲ್ ರೋಗಗಳು ( ಫ್ಲೂ ) ತಗುಲುವ ಸಾಧ್ಯತೆ ಈ ಕಾಲದಲ್ಲಿ ಹೆಚ್ಚು. ಅದರಲ್ಲೂ ನೀವು ಏರ್ ಕಂಡೀಶನರ್ ಇದ್ದ ಜಾಗದಲ್ಲಿ ಹೆಚ್ಚು ಹೊತ್ತು ಕಳೆದರೆ ರೋಗದ ಸಾಧ್ಯತೆ ದುಪ್ಪಟ್ಟು.

ಎ.ಸಿ ಇರುವೆಡೆ ನೀವು ತುಂಬಾ ಹೊತ್ತು ಇದ್ದರೆ ಮಳೆಗಾಲದಲ್ಲಿ ಕಾಣಿಸಿಕೊಳ್ಳುವ ಗಂಭೀರ ರೋಗಗಳು ತಗುಲುವ ಸಾಧ್ಯತೆ ಹೆಚ್ಚಿದೆಯಂತೆ.

ಆಸ್ಪತ್ರೆಗೆ ಬರುವ ಸುಮಾರು ಕೇಸುಗಳಲ್ಲಿ ಎಸಿಯಲ್ಲಿ ಕೆಲಸ ಮಾಡುವವರೇ ಇಂತಹ ವೈರಲ್ ರೋಗಗಳಿಗೆ ಹೆಚ್ಚು ಒಳಗಾಗುವುದು ಎಂಬ ಅಂಶ ತಿಳಿದು ಬಂದಿದೆ. ಏರ್ ಕಂಡೀಶನರ್ ಗಳು ವೈರಸ್ ಗಳನ್ನು ಹರಡಲು ಅನುವು ನೀಡುವುದು ಇದಕ್ಕೆ ಕಾರಣ ಎನ್ನಲಾಗಿದೆ.

ಜುಲೈ-ಸೆಪ್ಟೆಂಬರ್ ತಿಂಗಳಿನ ಅವಧಿಯಲ್ಲೇ ಹೆಚ್ಚಾಗಿ ವೈರಲ್ ಖಾಯಿಲೆಗಳು ಕಂಡುಬರುವುದು, ಕೆಮ್ಮು, ಗಂಟಲು ನೋವು, ನೆಗಡಿ, ಜ್ವರ ಮತ್ತು ಮೈ ಕೈ ನೋವು ಬಂದರೆ ಅದು ಖಂಡಿತ ವೈರಲ್ ಫೀವರ್ ಆಗಿರುತ್ತೆ ಮತ್ತು ಈ ಕುರಿತು ಸೂಕ್ತ ಚಿಕಿತ್ಸೆಯನ್ನು ತೆಗೆದುಕೊಳ್ಳಲೇಬೇಕಾದ ಅಗತ್ಯವಿರುತ್ತದೆ ಎಂದು ಡಾ. ರಾಮನ್ ರಾವ್ ತಿಳಿಸಿದ್ದಾರೆ.

ವರ್ಷ ವರ್ಷವೂ ವೈರಲ್ ರೋಗಗಳ ಸಂಖ್ಯೆ ಹೆಚ್ಚುತ್ತಲೇ ಇದೆ. ಹವಾಮಾನದ ಬದಲಾವಣೆ ಮತ್ತು ಒತ್ತಡದ ಜೀವನ ಶೈಲಿಯೂ ಕೂಡ ಇದಕ್ಕೆ ಕಾರಣ. ಆದರೆ ರೋಗನಿರೋಧಕ ಶಕ್ತಿ ಕಡಿಮೆ ಇದ್ದವರು ಮತ್ತು ಅನಾರೋಗ್ಯಕರ ಜೀವನ ಶೈಲಿ ಅನುಸರಿಸುತ್ತಿರುವವರು ಮಾತ್ರ ಬೇಗನೆ ರೋಗಕ್ಕೆ ತುತ್ತಾಗುತ್ತಾರೆ. ಅಲ್ಲದೆ ಮಳೆಗಾಲ ಬರುತ್ತಿದ್ದಂತೆ ಶಾಲೆಗೆ ಹೋಗುವ ಮಕ್ಕಳು ಬೇಗನೆ ರೋಗಗಳಿಗೆ ಗುರಿಯಾಗುವುದೂ ವೈರಸ್ ಗಳ ಕಾರಣದಿಂದ ಎಂದಿದ್ದಾರೆ.