ಗಂಡ-ಹೆಂಡತಿಯ ನಡುವಿನ ಗುಟ್ಟು ಗುಟ್ಟಾಗಿಯೇ ಇರಲಿ!

Love And Romance

oi-Staff

By Super

| Published: Monday, November 9, 2015, 10:55 [IST]

ಪ್ರತಿಯೊಬ್ಬರಲ್ಲೂ ತಮ್ಮದೇ ಆದ ವೈಯಕ್ತಿಕ ಗುಟ್ಟುಗಳಿರುತ್ತವೆ. ವಿವಾಹದ ಬಳಿಕ ನಮ್ಮ ಜೀವನಸಂಗಾತಿಗಳಲ್ಲಿ ಎಲ್ಲಾ ಗುಟ್ಟುಗಳನ್ನು ಹಂಚಿಕೊಂಡರೂ ಕೆಲವು ಗುಟ್ಟುಗಳ ಬಗ್ಗೆ ಚಕಾರವೆತ್ತದೇ ಇರುವುದು ಸುಖ ದಾಂಪತ್ಯಕ್ಕೆ ಅನಿವಾರ್ಯವಾಗಿದೆ. ಕೆಲವೊಂದು ಗುಟ್ಟುಗಳು ಕೊಂಚ ಕಹಿಯಾಗಿದ್ದರೂ ವಿವಾಹಕ್ಕೂ ಮುನ್ನವೇ ತಿಳಿಸಿ ಸ್ಪಷ್ಟಪಡಿಸಿಕೊಳ್ಳುವುದು ಉತ್ತಮ.

ಏಕೆಂದರೆ ಭವಿಷ್ಯದಲ್ಲಿ ಎಂದಾದರೊಮ್ಮೆ ಈ ಗುಟ್ಟು ಥಟ್ಟನೇ ಹೊರಬಂದು ಅಥವಾ ಮೂರನೆಯ ವ್ಯಕ್ತಿಯ ಮೂಲಕ ತಿಳಿಯಲ್ಪಟ್ಟು ಸುಖದಾಂಪತ್ಯದಲ್ಲಿ ಹುಳಿ ಹಿಂಡುವ ಸಾಧ್ಯತೆ ಇದೆ. ಅದರಲ್ಲೂ ಮಹಿಳೆಯರು ಸಂಬಂಧಗಳನ್ನು ಕುರಿತು ಕಾಳಜಿ ವಹಿಸುವಲ್ಲಿ ಪುರುಷರಿಗಿಂತಲೂ ಹೆಚ್ಚು ವ್ಯಾಕುಲತೆ ತೋರುತ್ತಾರೆ. ಆದರೆ ಕೆಲವು ಗುಟ್ಟು ಮತ್ತು ವೈಯಕ್ತಿಕ ವಿಷಯಗಳನ್ನು ಗುಟ್ಟಾಗಿಯೇ ಇಟ್ಟುಕೊಳ್ಳುವುದು ಉತ್ತಮ. ಈ ಗುಟ್ಟುಗಳು ಯಾವುವು ಎಂದು ಕುತೂಹಲ ಮೂಡಿತೇ? ಬನ್ನಿ ಈ ಬಗ್ಗೆ ಹೆಚ್ಚಿನ ಮಾಹಿತಿಯನ್ನುನೀಟಲಾಗಿದೆ ಮುಂದೆ ಓದಿ...

ಕ್ಷಣಿಕ ಪ್ರೇಮದ ಬಗ್ಗೆ
ಸಾಮಾನ್ಯವಾಗಿ ಮಹಿಳೆಯರು ತಮ್ಮ ಹದಿಹರೆಯದಲ್ಲಿ ಆದ ನಡವಳಿಕೆಯ ಬಗ್ಗೆಯೇ ಅವರನ್ನು ಅಳೆಯಲಾಗುತ್ತದೆ ಎಂಬ ನಂಬಿಕೆ ಹೊಂದಿರುತ್ತಾರೆ. ಆದ್ದರಿಂದ ವಯಸ್ಸಿನ ಆಕರ್ಷಣೆಗೆ ಮಣಿದು ನಡೆದ ಕ್ಷಣಿಕ ಪ್ರೇಮವ್ಯವಹಾರಗಳನ್ನು ಎಂದಿಗೂ ವಿವಾಹದ ಬಳಿಕ ಪತಿಯರಲ್ಲಿ ಹೇಳಿಕೊಳ್ಳಬಾರದು. ಏಕೆಂದರೆ ಇದು ಅವರಲ್ಲಿ ಮತ್ಸರದ ಭಾವನೆಯನ್ನುಂಟುಮಾಡಬಹುದು. ಅಲ್ಲದೇ ಇಂತಹ ವ್ಯವಹಾರ ವಿವಾಹದ ಬಳಿಕವೂ ನಡೆದರೆ ಎಂಬ ಅನುಮಾನ ಅವರಲ್ಲಿ ಉಂಟುಮಾಡಬಹುದು. ಆದ್ದರಿಂದ ಒಂದು ವೇಳೆ ಈ ಕ್ಷಣಿಕ ಪ್ರೇಮವ್ಯವಹಾರ ಮುಂದೆಂದಾದರೂ ತೊಂದರೆ ತಂದೊಡ್ಡುವ ಅಪಾಯವಿದ್ದರೆ ಸೂಚ್ಯವಾಗಿ ವಿವಾಹಕ್ಕೂಮುನ್ನವೇ ತಿಳಿಸಿದರೆ ಉತ್ತಮ. ಇದು ಸಾಧ್ಯವಿಲ್ಲದಿದ್ದಲ್ಲಿ ಜೀವನಪೂರ್ತಿ ಇದನ್ನು ಹೊಟ್ಟೆಯಲ್ಲಿ ಅಡಗಿಸಿಟ್ಟುಕೊಳ್ಳುವುದು ಉತ್ತಮ ಮತ್ತು ಅನಿವಾರ್ಯ.

ಮಹಿಳಾ ಗಾಸಿಪ್ ಬಗ್ಗೆ
ಸಾಮಾನ್ಯವಾಗಿ ಮಹಿಳೆಯರೇ ಗುಂಪಾಗುವ ಪಾರ್ಟಿಗಳಲ್ಲಿ ವಿಷಯಗಳು ಇತರ ಮಹಿಳೆಯರ ಪ್ರೇಮ ವ್ಯವಹಾರದ ಸುತ್ತವೇ ಸುತ್ತುತ್ತಿರುತ್ತವೆ. ಇದು ಕಿವಿಯಿಂದ ಕಿವಿಗೆ ಹರಡುವ ವೇಳೆ ತನ್ನೊಂದಿಗೆ ಉಪ್ಪು ಖಾರ ಹುಳಿ ಸೇರುತ್ತಾ ಹತ್ತನೆಯ ಕಿವಿಗೆ ತಲುಪುವವರೆಗೆ ವಿಷಯದ ಮುಖ್ಯ ಭಾಗವೇ ಬದಲಾಗಿರುತ್ತದೆ. ಇದನ್ನೇ ಗಾಸಿಪ್ ಎಂದು ಕರೆಯುತ್ತಾರೆ. ಆದ್ದರಿಂದ ಗಾಸಿಪ್ ನಲ್ಲಿ ಕೇಳಿದ ವಿಷಯಗಳನ್ನು ಜೀವನಸಂಗಾತಿಯೊಡನೆ ವಿಮರ್ಷಿಸದಿರುವುದೇ ವಾಸಿ.

ನಿಮ್ಮ ಮೇಕಪ್ ಕಿಟ್ ಬಗ್ಗೆ
ಪುರುಷರಿಗೆ ಮಹಿಳೆಯರು ಸೌಂದರ್ಯವತಿಯರಾಗಿ ಕಾಣುವುದು ಮುಖ್ಯವೇ ಹೊರತು ಇದಕ್ಕಾಗಿ ಹೇಗೆ ಅಲಂಕರಿಸಿಕೊಂಡರು ಎಂಬ ಮಾಹಿತಿಯಲ್ಲ. ಮೊಡವೆಗಳನ್ನು ಮರೆಮಾಚುವ, ಸೌಂದರ್ಯವನ್ನು ಪ್ರಖರಗೊಳಿಸುವ ಮೊದಲಾದ ಇತರರಿಗೆ ತಿಳಿದಿರದ ಹತ್ತು ಹಲವಾರು ಗುಟ್ಟುಗಳು ನಿಮ್ಮಲ್ಲಿದ್ದರೂ ಪುರುಷರು ಇದನ್ನು ಕೇಳಬಯಸುವುದಿಲ್ಲ. ಆದ್ದರಿಂದ ಈ ಗುಟ್ಟುಗಳನ್ನು ಗುಟ್ಟಾಗಿಯೇ ಇಡಿ.

ವಿವಾಹಪೂರ್ವದ ಸಂಬಂಧದ ಬಗ್ಗೆ
ಒಂದು ವೇಳೆ ಈ ವಿವಾಹಕ್ಕೂ ಮುನ್ನ ಬೇರೊಂದು ಸಂಬಂಧ ಕುದುರುವುದಿದ್ದು ಕಾರಣಾಂತರಗಳಿಂದ ಇದು ರದ್ದಾಗಿದ್ದರೆ ಹಿಂದಿನ ವಿಷಯಗಳನ್ನು ಕೆದಕದಿರುವುವೇ ವಾಸಿ. ವಿವಾಹಕ್ಕೂ ಮುನ್ನ ಈ ಬಗ್ಗೆ ಸೂಚ್ಯವಾಗಿ ತಿಳಿಸಿದರೆ ಉತ್ತಮ. ಆದರೆ ವಿವಾಹದ ಬಳಿಕ ಈ ಬಗ್ಗೆ ಚಕಾರವೆತ್ತದಿರುವುದೇ ಉತ್ತಮ.

ನಿಮ್ಮ ಪತಿಯ ಮನೆಯವರ ಬಗ್ಗೆ ಇರುವ ಗುಟ್ಟುಗಳು

ಪ್ರತಿ ವ್ಯಕ್ತಿಯ ವ್ಯಕ್ತಿತ್ವವೂ ಬೇರೆಬೇರೆಯಾಗಿರುತ್ತದೆ. ಪತಿಯ ಮನೆಗೆ ಬಂದ ಬಳಿಕ ಪತಿಯ ಮನೆಯ ಸದಸ್ಯರ ವ್ಯಕ್ತಿತ್ವವೂ ನಿಮಗೆ ಹೊಸದಾಗಿ ಮತ್ತು ವಿಚಿತ್ರವಾಗಿ ಕಾಣಬಹುದು. ಆದರೆ ಈ ಬಗ್ಗೆ ನಿಮ್ಮ ಪತಿಯಲ್ಲಿ ವಿಮರ್ಶಿಸಿದರೆ ಅವರು ನಿಮ್ಮನ್ನೇ ಅನುಮಾನದ ದೃಷ್ಟಿಯಿಂದ ನೋಡಬಹುದು. ಆದ್ದರಿಂದ ಪತಿಯ ಮನೆಯ ಸದಸ್ಯರನ್ನು ಬದಲಿಸಲು ಯತ್ನಿಸದೇ ಉತ್ತಮ ರೀತಿಯಲ್ಲಿ ವ್ಯವಹರಿಸಲು ಯತ್ನಿಸಿ. ಇದು ನಿಮ್ಮ ಸಂಬಂಧವನ್ನು ಸುಖಮಯವಾಗಿಸುತ್ತದೆ. ಒಂದು ವೇಳೆ ಇಂತಹ ಉತ್ತಮ ಮಾಹಿತಿ ತಮ್ಮಲ್ಲಿದ್ದರೆ ನಮ್ಮೊಂದಿಗೆ ಖಂಡಿತಾ ಹಂಚಿಕೊಳ್ಳಿ. ಇದಕ್ಕಾಗಿ ಮುಖ್ಯ ಪುಟದ ಕೆಳಗಿರುವ ಕಮೆಂಟ್ಸ್ ಸ್ಥಳವನ್ನು ಬಳಸಿಕೊಳ್ಳಿ.