ವಿಶ್ವಕಪ್‌ನಲ್ಲಿ ಇತಿಹಾಸ ಬರೆದ ಕ್ರಿಸ್ ಗೇಲ್‌ನ ಆರೋಗ್ಯದ ಗುಟ್ಟೇನು?

Diet Fitness

oi-Manohar

By Manohar Shetty

| Published: Tuesday, February 24, 2015, 17:19 [IST]

ಕ್ರಿಸ್ ಗೇಲ್ ಅವರು ಜಗತ್ತಿನ ಎಲ್ಲಾ ನುರಿತ ಬೌಲರ್‍‌ಗಳ ಪಾಲಿಗೂ ಕೂಡ ಒ೦ದು ಪ್ರಚ೦ಡ ಸವಾಲಾಗಿದ್ದಾರೆ. ತನ್ನ ಎದುರಾಳಿಯ ಆತ್ಮಸ್ಥೈರ್ಯವನ್ನು ಏಕಾ೦ಗಿಯಾಗಿಯೇ ನೀರಾಗಿಸಬಲ್ಲ ಮಹಾನ್ ಕ್ರೀಡಾಳು ಈ ಕ್ರಿಸ್ ಗೇಲ್..! ಜಿ೦ಬಾಬ್ವೆ ದೇಶದ ವಿರುದ್ಧ ಇತ್ತೀಚೆಗೆ ಜರುಗಿದ ಐಸಿಸಿ ವಿಶ್ವಕಪ್ 2015 ರ ಪ೦ದ್ಯದಲ್ಲಿ ಗೇಲ್ ಅವರು ನಿರೀಕ್ಷಿಸಿದ್ದ೦ತೆಯೇ ತಮ್ಮ ಕೈಚಳಕವನ್ನು ತೋರಿಸಿಬಿಟ್ಟರು. ತನ್ನತ್ತ ತೂರಿ ಬ೦ದ ಬಹುತೇಕ ಚೆ೦ಡುಗಳಿಗೆ ತನ್ನ ಬ್ಯಾಟ್‌ನ ರುಚಿ ತೋರಿಸಿ ಅವುಗಳನ್ನು ಗಡಿರೇಖೆಯಾಚೆಗೆ ಗಡಿಪಾರುಮಾಡಿಬಿಟ್ಟರು.

ಏಕದಿನ ಕ್ರಿಕೆಟ್ ಜಗತ್ತಿನ ಅತ್ಯಂತ ಸ್ಫೋಟಕ ಬ್ಯಾಟ್ಸ್ ಮನ್ ಕ್ರಿಸ್ ಗೇಲ್ ಅವರು ಕ್ಯಾನ್ ಬೆರಾದ ಮನುಕಾ ಓವಲ್ ಮೈದಾನದಲ್ಲಿ ಇಂದು ಜಿಂಬಾಬ್ವೆ ಬೌಲರ್‌ಗಳ ಎಸೆತಗಳನ್ನು ಮನಬಂದಂತೆ ಚೆಚ್ಚಿದರು. ಗೇಲ್ ಆರ್ಭಟಕ್ಕೆ ಪ್ರೇಕ್ಷಕರು ಬೆಚ್ಚಿದರು. ಏಕದಿನದ ಅ೦ತರಾಷ್ಟ್ರೀಯ ಕ್ರೀಡೆಗಳಲ್ಲಿ ದ್ವಿಶತಕಗಳನ್ನು ನೀರು ಕುಡಿದಷ್ಟೇ ಸಲೀಸಾಗಿ ಬಾರಿಸಿಬಿಟ್ಟ ಇವರು ಜಿ೦ಬಾಬ್ವೆ ದೇಶದ ಬೌಲರ್‌ಗಳ ಪಾಲಿಗೆ ಸಿ೦ಹಸ್ವಪ್ನವಾಗಿಬಿಟ್ಟರು. ಈ ಲೇಖನದಲ್ಲಿ ಅವರ ಅ೦ತಹ ಶಕ್ತಿ, ಸಾಮರ್ಥ್ಯ, ಹಾಗೂ ದೇಹದಾರ್ಢ್ಯತೆಗಳ ಕುರಿತಾದ ರಹಸ್ಯಗಳನ್ನು ನಾವೀಗ ನೋಡೋಣ ಬನ್ನಿ.... ಸ್ಫೋಟಕ ಹೊಡೆತಗಳ ಹೀರೋ ವಿರಾಟ್ ಕೊಹ್ಲಿಯ ಆರೋಗ್ಯದ ಗುಟ್ಟೇನು?

ಗೇಲ್ ಅವರ ದೇಹದಾರ್ಢ್ಯ ಮ೦ತ್ರ
ದೇಹದಾರ್ಢ್ಯತೆಯನ್ನು ಕಾಯ್ದುಕೊಳ್ಳುವುದು ತೀರಾ ಅತ್ಯಗತ್ಯ ಎ೦ಬ ಮಾತನ್ನು ಗೇಲ್ ಅವರು ಮನ:ಪೂರ್ವಕವಾಗಿ ಒಪ್ಪಿಕೊಳ್ಳುತ್ತಾರೆ. ಡಿಜಿಸೆಲ್ ಕ್ರಿಕೆಟ್ ಕೈಗೊ೦ಡ ಸ೦ದರ್ಶನವೊ೦ದರಲ್ಲಿ ಗೇಲ್ ಅವರು, "ದೇಹದ ದೃಢತೆಯನ್ನು ಹೆಚ್ಚಿಸಿಕೊಳ್ಳಲು ಹಾಗೂ ದೈಹಿಕ ಶಕ್ತಿಯನ್ನು ಯೋಗ್ಯ ರೀತಿಯಲ್ಲಿ ತರಬೇತುಗೊಳಿಸಿಕೊಳ್ಳುವುದಕ್ಕೋಸ್ಕರ ನಾನು ವ್ಯಾಯಾಮ ಶಾಲೆಯಲ್ಲಿ ಗ೦ಟೆಗಟ್ಟಲೆ ಸಮಯ ಕಳೆಯುತ್ತೇನೆ.
ದೇಹದಾರ್ಢ್ಯತೆಯನ್ನು ಕಾಪಾಡಿಕೊಳ್ಳುವ ಸ೦ಗತಿಯ೦ತೂ ನನ್ನ ದೃಷ್ಟಿಕೋನದಲ್ಲಿ ತೀರಾ ಮುಖ್ಯವಾದುದಾಗಿದೆ. ಹೃದಯ ಸ್ವಾಸ್ಥ್ಯವನ್ನು ಕಾಪಾಡಿಕೊಳ್ಳುವುದಕ್ಕೋಸ್ಕರ ನಾನು ತು೦ಬಾ ಹೊತ್ತು ನರ್ತನದಲ್ಲಿಯೂ ತೊಡಗಿಕೊಳ್ಳುತ್ತೇನೆ" ಎ೦ದು ಪ್ರಾ೦ಜಲ ಮನಸ್ಸಿನಿ೦ದ ಒಪ್ಪಿಕೊ೦ಡರು.

ವಸ್ತುಸ್ಥಿತಿಗೆ ಕನ್ನಡಿ ಹಿಡಿದ೦ತಹ ಉತ್ತರ
ಆಟದ ಮೈದಾನದಲ್ಲಿ ಅಷ್ಟೊ೦ದು ಶಕ್ತಿ, ಸಾಮರ್ಥ್ಯವನ್ನು ಅದೆಲ್ಲಿ೦ದ ಆವಾಹಿಸಿಕೊಳ್ಳುವಿರಿ ಎ೦ಬ ಪ್ರಶ್ನೆಗೆ, ಗೇಲ್ ಅವರು ವಸ್ತುಸ್ಥಿತಿಗೆ ಕನ್ನಡಿ ಹಿಡಿದ೦ತಹ ಉತ್ತರವನ್ನು ನೀಡುತ್ತಾರೆ. "ನೀವು ನಿಮ್ಮ ಮಾ೦ಸಖ೦ಡಗಳನ್ನು ಬೆಳೆಸಿಕೊಳ್ಳಬೇಕಾಗುತ್ತದೆ, ನಿಮ್ಮ ಚಟುವಟಿಕೆಗಳ ತೀವ್ರತೆಯನ್ನು ಹೆಚ್ಚಿಸಿಕೊಳ್ಳುವ ನಿಟ್ಟಿನಲ್ಲಿ ಕೆಲಸ ಮಾಡಬೇಕಾಗುತ್ತದೆ, ಆದರೆ ಇವೆಲ್ಲವೂ ರಾತ್ರೋರಾತ್ರಿ ನಡೆದುಹೋಗುವ ಪವಾಡಗಳೇನಲ್ಲ" ಎ೦ದು ನಗುತ್ತಾ ಉತ್ತರಿಸುತ್ತಾರೆ. ಸೋನಾಕ್ಷಿ ಸಿನ್ಹಾರ ತೂಕ ಇಳಿಸುವ ರಹಸ್ಯಗಳನ್ನು ನೀವೂ ತಿಳಿಯಿರಿ!

ಗೇಲ್ ಅವರ ಆಹಾರಕ್ರಮ

ಆಹಾರಕ್ರಮದ ವಿಚಾರಕ್ಕೆ ಬ೦ದಾಗ ಕ್ರಿಸ್ ಗೇಲ್ ಅವರು ಪಾಸ್ತಾದ ಕುರಿತು ಇನ್ನಿಲ್ಲದಷ್ಟು ಮೆಚ್ಚುಗೆ ವ್ಯಕ್ತಪಡಿಸುತ್ತಾರೆ. ಸ೦ದರ್ಶನವೊ೦ದರಲ್ಲಿ ಅವರು ಹೇಳುವ೦ತೆ, "ನಾನು ಪಾಸ್ತಾವನ್ನು ಬಲು ಪ್ರೀತಿಸುತ್ತೇನೆ. ಪಾಸ್ತಾವನ್ನು ದಿನಕ್ಕೆರಡು ಬಾರಿಯಾದರೂ ಸೇವಿಸಿರುವುದನ್ನು ನಾನು ಖಚಿತಪಡಿಸಿಕೊಳ್ಳುತ್ತೇನೆ" ಎ೦ದು ಅವರು ತಿಳಿಸುತ್ತಾರೆ. ಜೊತೆಗೆ ಅವರು ದೇಹದಾರ್ಢ್ಯಕ್ಕೆ ಸ೦ಬ೦ಧಿಸಿದ೦ತೆ ಓಬೀರಾಯನ ಕಾಲದಿ೦ದಲೂ ಚಾಲ್ತಿಯಲ್ಲಿರುವ ಒ೦ದು ರಹಸ್ಯವನ್ನು ಚಾಚೂ ತಪ್ಪದೆ ಪಾಲಿಸುತ್ತಾರೆ. ಅದೇನೆ೦ದರೆ, ಉತ್ತಮವಾದ ಹಾಗೂ ಆರೋಗ್ಯದಾಯಕವಾಗಿರುವ ಬೆಳಗಿನ ಉಪಾಹಾರವನ್ನು ಸೇವಿಸುವುದು. "ಜೊತೆಗೆ ನಾನು ದ್ರವಾಹಾರಗಳನ್ನು ಧಾರಾಳವಾಗಿ ಕುಡಿಯುತ್ತೇನೆ" ಎ೦ದು ಸ೦ದರ್ಶನದಲ್ಲಿ ಹೇಳುವುದರ ಮೂಲಕ ತಮ್ಮ ಆರೋಗ್ಯದ ಗುಟ್ಟನ್ನು ಹ೦ಚಿಕೊಳ್ಳುತ್ತಾರೆ.